Besin namazın oqiın dep meşitke kirsem, qazaqtıñ taqiyasın kigen bala közime ottay basıldı. Janına jaqındadım da:
– Kim bolasıñ? – dep swradım. Ol da:
– Qazaqpın! – dedi.
– Atıñ kim?
– Islam.
– Neşedesiñ?
– Ondamın.
– Äkeñ atı kim?
– Bauırjan?
– Mwnda ne istep jürsiñ?
– Osında twramız.
– Äkeñ qayda?
– Qazaqstanda, Pavlodarda.
– Sen kimmen twrasıñ?
– Türik äkemmen.
– Esimi kim?
– Fevzi.
– Qanşa jıl boldı kelgenderiñe?
– Tört jıl boldı.
– Oqisıñ ba?
– Iä, mektepte oqimın.
– Qanşa ağayınsıñdar?
– Beseumiz.
– Beseuiñ de tuğansıñdar ma?
– Joq, ülken eki äpkem jäne men – bir tuğanbız. Qalğan eki bauırım – türik.
– Äkeñ nemen aynalısadı?
– Qayıq-keme jöndeydi.
– Elge barıp twrasıñdar ma?
– Iä. Atam men äjeme barıp twramız.
– Qay el bolasıñ?
– Qoñırat.
– Atañ men äjeñ qayda?
– Atırauda.
– Öziñ qay jerde tuğansıñ?
– Semeyde. Al äpkelerim Aqsuatta.
– Anañ namaz oqi ma?
– Oqidı.
– Äkeñ şe?
– Jwma namazına ğana baradı.
– Anaña sälem ayt. Bir qazaq kördim dep ayt.
– Jaraydı. Biraq men sizdi sırtıñızdan birneşe märte körgenmin…
– Solay ma?
– Iä…
– Osı meşitke jii kep twrsañ, äli talay kezdesermiz.
– Jazda Qwran kursı boladı. Soğan qatısamın Alla jazsa.
– Bärekeldi! Jaqsı onda, kezdeskenşe!
– Sau bolıñız.
***
Islamğa qazaqtıñ taqiyasın anası kigizip jiberetin sekildi. “Qoñırat” ekenin de qwlağına qwyıp tastaptı. “Türiktiñ elinde jürseñ de, öz eliñdi wmıtpa!” degen bolu kerek. Istambwldıñ şetindegi Pendik audanınan osılay bir emes, birneşe qazaq pen qazaqstandıq kezdestirip qalamız ara-twra…
saltan.islam.kz
Pikir qaldıru