قايرات جاماليەۆكە “جابىرلەنۋشىنىڭ دارمەنسىز كۇيىن پايدالانىپ ەركەك پەن ەركەكتىڭ جىنىستىق قاتىناس جاساۋى” تۋرالى بىرنەشە باپتار بويىنشا ايىپ تاعىلدى
استانالىق ءالىبي جۇماعۇلوۆتى سوققىعا جىعۋ ءىسى بويىنشا ايىپتالىپ وتىرعان كاسىپكەر قايرات جاماليەۆكە “كۇش قولدانۋ ارقىلى جىنىستىق زورلىق-زومبىلىق جاسادى” دەگەن ايىپ تاعىلدى. بۇل تۋرالى ءالىبي جۇماعۇلوۆتىڭ ادۆوكاتى حاميدا ايتقاليەۆا Facebook-تەگى پاراقشاسىندا حابارلادى.
ايتقاليەۆانىڭ سوزىنشە، جاماليەۆكە قىلمىستىق كودەكستىڭ “قىلمىستىق توپ ارقىلى اسا ءىرى كولەمدە بوپسالاۋ”، “ادامدى ۇرلاۋمەن بايلانىستى ەمەس زاڭسىز باس ەركىنەن ايىرۋ” جانە “كۇش قولدانىپ نەمەسە ونى قولدانۋ قاتەرىن ءتوندىرىپ نە جابىرلەنۋشىنىڭ دارمەنسىز كۇيىن پايدالانىپ ەركەك پەن ەركەكتىڭ جىنىستىق قاتىناس جاساۋى” تۋرالى باپتار بويىنشا ايىپ تاعىلاتىنى جايلى قاۋلى شىققان.
بيزنەسمەن ءارى بىرنەشە كومپانيانىڭ يەسى قايرات جاماليەۆ پەن ونىڭ جۇرگىزۋشىسى وتكەن ايدا ۇستالىپ، كەيىن قامالعان. بۇل ءىس بويىنشا تاعى ءبىر كۇدىكتىگە ىزدەۋ جاريالانعان. جاماليەۆتىڭ مۇلىكتەرىنە ارەست سالىنعان.
استانالىق نۇرلان جۇماعۇلوۆ 24 جاستاعى بالاسى ءالىبيدىڭ اياۋسىز سوققىعا جىعىلعانىن ايتىپ، الەۋمەتتىك جەلىگە ۇلىنىڭ ۆيدەوسى مەن سۋرەتتەرىن جاريالاپ، كومەك سۇراعان جازباسى قوعامدا نارازى پىكىرلەرگە ۇلاسىپ, جۇرتشىلىق بۇل ءىستىڭ «كوررۋپتسياسىز» تەكسەرىلۋىن تالاپ ەتكەن ەدى.
ازاتتىق راديوسى
پىكىر قالدىرۋ