بۇگىن كەنشىلەر شاحارىندا ۇيقاماقتا وتىرعان  ەكس-پرەمەر سەرىك احمەتوۆكە قاتىستى سوت پروتسەسسى باستالدى.

«ءىرى كولەمدە بيۋدجەت اقشاسىن جىمقىردى»،  «ميللياردتتاپ پارا الدى» دەپ ايىپتالعان احمەتوۆپەن بىرگە قاراعاندى وبلىسى مەن قالاسىنىڭ بۇرىنعى اكىمدەرى، باسقا دا ونداعان شەنەۋنىك پەن كاسىپكەر دە سوت الدىندا جاۋاپ بەرۋدە دەپ حابارلايدى كتك.

تاۋەلسىز قازاقستاننىڭ تاريحىندا ۇكىمەت باسشىسىنا قاتىستى وسىنداي اشىق پروتسەسس ەشقاشان ءوتىپ كورمەگەن. سوندىقتان ءوز تۋعان جەرىندە  شاتىلىپ جاتقان ەلىمىزدىڭ 8-ءىنشى پرەمەر-ءمينيسترىنىڭ اتىشۋلى ءىسى ناعىز سەنساتسيا بوپ تۇر.

تاڭ اتا قاراعاندىداعى وبلىستىق سوت ماڭايىندا قاپىلىس. قاۋىپسىزدىك شارالارى كۇشەيتىلىپ، ءتىپتى ونىڭ الدىنداعى شۇرىق تەسىك جول جامالىپ،اسفالت توسەلىپتى. جولاقتار جاڭارىپ، اينالا دەرەۋ تازارتىلىپ جاتىر.

قاراعاندىداعى سەرىك احمەتوۆتىڭ ءزاۋلىم كوتتەدجىنىڭ الدىندا دا تاڭ اتقالى قىزۋ قاربالاس. قىراعى كۇزەتىلەتىن ۇيگە قىزمەتتىك كيىمى جوق ادامدار قايتا-قايتا كىرىپ جاتىر. سالدەن سوڭ استانالىق ءنومىر تاققان دجيپ قاقپاعا كىرىپ، 8 اي دالاعا شىقپاعان باستى كۇدىكتىنى سوتقا اكەلدى.

فەميدا عيماراتى ەكس-پرەمەردىڭ ۇيىنە ىرگەلەس ورنالاسقان ەكەن. Cوندىقتان 2 مينۋتتا جەتتى.  ال احمەتوۆتىڭ جۇزىنەن، ءجۇرىس تۇرىسىنان، وزىنە سەنىمدىلىك بايقالادى. ەكس-پرەمەر جاسىرىن ەمەس، كوپپەن بىرگە الدىڭعى ەسىكتەن كىرىپ، حالىقپەن امانداستى.

احمەتوۆ ۇيىنەن دجيپپەن كەلسە، باسقا ايىپتالۋشىلار يزولياتوردان اۆتوزاكپەن جەتكىزىلدى. سوتقا قاتىسۋعا كەلگەندەردىڭ كوپ بولعانى سونشا، عيماراتتا ينە شانشار جەر جوق. تار زالعا سىيماعان تىلشىلەر مەن ءىستى بولعانداردىڭ تۋىستارى وتىرىستى تىكەلەي ەكراننان كورۋگە ءماجبۇر بولدى.

ەكس-پرەمەر 5 ادۆوكاتىمەن زالدىڭ قاق ورتاسىنا جايعاسسا، قاراعاندى وبلىسى مەن قالاسىنىڭ بۇرىنعى اكىمدەرى باۋىرجان ابدىشەۆ  پەن مەيرام سماعۇلوۆ باستاعان ءبىر توپ لاۋازىمدى شەنەۋنىك تورعا قامالعان.

ال قىلمىستىق توپتى تۇتقىنداعان جەمقورلىققا قارسى اگەنتتىك بۇرىنعى پرەمەرگە 6 باپ بويىنشا، ونىڭ ىشىندەگى ەڭ اۋىرى قىزمەت بابىن اسىرا پايدالانىپ 1 ميلليارد 100 ميلليون تەڭگە بيۋدجەت اقشاسى جەدى، جارتى ميلليارد تەڭگە پارا الدى دەگەن ايىپ تاعىپ وتىر.

تەرگەۋ ماتەريالدارىنا سۇيەنسەك، احمەتوۆتىڭ ءسوزىن ەكى ەتپەيتىن، كەزىندە قاراماعىندا ىستەگەن   قاراعاندىنىڭ 20 اتقامىنەرى تەندەردى بولىسكە سالىپ، الاياقتىق جاساعان. بىراق، كۇدىكتىلەردىڭ ءبىرىنىڭ ادۆوكاتى قىلمىستىق ىسپەن تانىسىپ ۇلگەرمەۋىنە بايلانىستى 338 تومعا جۇك بولعان العاشقى پروتسەسسى بار-جوعى 15 مينۋتقا سوزىلدى.

ءۇزىلىس كەزىندە 57 جاستاعى سەرىك احمەتوۆتەن دەنساۋلىعى مەن ايىپقا قاتىستى ويىن سۇراعان ەدىك، ول  ءسوزىن وتە قىسقا قايىردى.

— دەنساۋلىعىڭىز قالاي

— جاقسى.

— تاعىلعان ايىپپەن كەلىسەسىز بە؟

— ازىرشە، ەشتەڭە ايتپايمىن.

احمەتوۆ سوزگە ساراڭ بولعانىمەن ادۆوكاتى ونىڭ ۇستانىمىن ءبىلدىردى.

«سەرىك احمەتوۆ تاعىلعان ايىپتاردىڭ بىرىمەن كەلىسپەيدى. كىناسىزدىگىن دالەلدەيتىن ايعاقتارىمىزدى سوت بارىسىندا كورسەتەمىز»، — دەيدى سەرىك احمەتوۆتىڭ ادۆوكاتى گەورگي ماتۆەەنكوۆ.

ۇزىلىسكە بايلانىستى ەكس-پرەمەر ۇيىنە قايتقانىمەن 4 ساعاتتان سوڭ قايتىپ كەلدى. ەندى الداعى بىرنەشە اي بويى ايىپتالىپ جاتقان شەنەۋنىكتەر وسىلاي توپ-توبىمەن سوتقا سابىلاتىن بولادى. ال بۇگىنگى وتىرىستان كەيبىر كۇدىكتىلەردىڭ تۋىستارى جىلاپ شىقتى.

مەملەكەتكە كەلتىرىلدى دەگەن شىعىننىڭ جارتىسىنا جۋىعىن احمەتوۆتىڭ اعاسى قايتارىپ بەرىپتى. بەرىك احمەتوۆتىڭ ءوزى دە قازىر سوتقا كۋاگەر رەتىندە قاتىسۋدا. ال باسقاراتىن «ستال-تسينك» كومپانياسى وسى توم-توم قىلمىستىق ىستە بىرنەشە رەت اتالعان.

ياعني، قاراعاندى كوشەلەرىن جارىقتاندىرۋعا بولىنگەن تەندەردى سول كەزدەگى بيلىك «بارماق باستى، كوز قىستىمەن» ەكس-پرەمەردىڭ اعاسىنا ۇتتىرىپ بەرگەن دەيدى تەرگەۋشىلەر.

وتىرىس ەرتەڭ دە جالعاسادى. جالپى 338 توم قىلمىستىق ءىستى قاراپ، ونداعان ايىپتالۋشى مەن جۇزدەگەن كۋاگەردەن جاۋاپ الۋ بىرەر اپتانىڭ شارۋاسى ەمەسى  انىق.