“جۇماققا كىرۋ ءۇشىن”
“جۇماققا كىرۋ ءۇشىن” ساۋ ەلىنەن جەرىنىپ، ساۋ اناسىن دەرتتى ەتىپ، ساۋ اقىلدان اينىپ، ساۋ دەنەسىن جارىپ جاتقاندارعا وزدەرى ءجيى سىلتەمە جاسايتىن حاديستەرگە سۇيەنە وتىرىپ بۇل ماقساتتارىنا جەتۋدىڭ الدەقايدا ءتيىمدى ءھام بەيبىت جولدارىن ۇسىنعىم كەلەدى. ءجانناتتى اڭسايدى ەكەنسىڭ، جەسىرگە ۇيلەنىپ باعىن اش، جەتىمدى اسىراپ جەتكىز، قامقورشىسىز قارياعا كومەك قىل، حوسپيستەگى سىرقاتتى كۇتىپ كوڭىلىن اۋلا، مۇگەدەك بالانىڭ ەمىن ىزدەس، قاڭعىباس حايۋاندى اسىرا، كوك ءتۇتىن شاھارعا اعاش ەك، وتالعان ورماندى قورى، لاستانعان بۇلاقتىڭ كوزىن اش، پاراقوردىڭ ارتىنا شام الىپ ءتۇس، ۇكىمەت نازارىن ساپاسىز جولعا ءھام كوپىرسىز جارلى اۋىلعا اۋدار. قازاقستاندا وسىنداي كوپكە پايدالى، ناعىز ساۋاپتى ىسپەن ونداعان جىلدار بويى اينالىسىپ كەلە جاتقان بەلسەندىلەر بار. سولاردىڭ قاراسىن كوبەيت، ءۇنىن زورايت. باتىستى وركەنيەت جولىنا تۇسىرگەن دە قوعامنىڭ ار-وجدانىنا اينالعان سونداي ناعىز ازاماتتار. ال ءتورت كلاستىق بىلىمىڭمەن ارامزا مولدانىڭ قولىنداعى سوقىر قارۋعا اينالىپ، جەتپىس جەتى اتاڭا قاتىسى جوق قايداعى ءبىر دۇمشەلەردىڭ كەگىن قۋىپ، جاتتىڭ قۋ مەكيەن دالاسىندا، قۇلازىعان جۇرتىندا، يا بولماسا بەيبىت جاتقان ىرگەلى ەلدىڭ ۇلكەن شاھارىنداعى بەيقام بالا-شاعانىڭ ورتاسىندا پىرس ەتىپ جارىلعانىڭنان – وزىڭە قول جۇمساپ، وزگەنىڭ بەيكۇنا قانىن توككەنىڭنەن نە ساۋاپ تاباتىنىڭدى، نە قايىر كورەرىڭدى جاقسىلاپ ءبىر اقىلعا سال. ءىس جۇزىندە كىمنىڭ مۇسىلمان ەكەنىن ءبىر ويلا.
عالىم بوقاشتىڭ facebook پاراقشاسىنان الىندى
پىكىر قالدىرۋ