«ەۋرازيا» ءبىرىنشى ارناسىن” ميتينگ تۋرالى حابارعا قاتىستى سوتقا بەردى
قاراعاندىلىق ادۆوكات نۇرحان جۇمابەكوۆ بۇگىن الماتىنىڭ بوستاندىق اۋداندىق سوتىنا «ەۋرازيا» ءبىرىنشى ارناسىنا” تيەسىلى «ەۋرازيا+ورت» كومپانياسىنىڭ ۇستىنەن شاعىم ءتۇسىردى. ادۆوكات كومپانيادان مورالدىق شىعىن رەتىندە 100 مىڭ تەڭگە تالاپ ەتەدى. شاعىمعا ارنانىڭ جۇرگىزۋشىسى ايميرا شاۋكەنتاەۆانىڭ جەر ماسەلەسى بويىنشا ميتينگتەردى وتكىزگەن ادامدارعا “اقشا تولەنگەنى” تۋرالى مالىمدەمەسى سەبەپ بولعان.
2016 جىلى 30 ساۋىردە شاۋكەنتاەۆا «رۇقسات ەتىلمەگەن ميتينگكە كەلگەن ءاربىر ادامعا ۇيىمداستىرۋشىلار، ياعني، جوعارىداعى بەسىنشى كولوننا 50 مەن 150 دوللار ارالىعىندا اقشا تولەگەن» دەپ ايتقان ەدى. وتكەن اپتادا «ەۋرازيا» ءبىرىنشى ارناسىنىڭ جۋرناليستەرى جەر ماسەلەلەرى بويىنشا وتكەن ميتينگتەردىڭ “اقشا تولەپ جاسالعانىنا دالەلى بارىن” دا حابارلاعان. «دالەل» رەتىندە كورسەتىلگەن ۆيدەودا بەتتەرى كورسەتىلمەگەن ادامداردىڭ ءبىر-بىرىنە دوللار بەرىپ جاتقانى كورسەتىلگەن.
- ميتينگكە شىققان ادامدارعا تەلەديدار ارقىلى توپىراق شاشىپ جاتقانىنا قىنجىلام. شاۋكەنتاەۆانىڭ سوزىنشە، ازاماتتار تەك جاساندى تۇردە عانا نارازىلىقتارىن كورسەتە الادى ەكەن، – دەيدى نۇرحان جۇمابەكوۆ ازاتتىق تىلشىسىنە.
بوستاندىق اۋدانىنىڭ ازاماتتىق ىستەر بويىنشا سوتى ازاتتىققا ارناعا قارسى مۇنداي شاعىم تۇسكەنىن راستايدى.
- بۇگىن نۇرحان جۇمابەكوۆتەن «ەۋرازيا+ورت» جشس-ىنە قارسى شاعىم ءتۇستى. ونى سۋديا تاتيانا چەرنىش قارايدى. شاعىم بەس جۇمىس كۇنى ىشىندە قارالادى، – دەدى سوت وكىلى سايات سەرىكوۆ.
قازاقستاننىڭ ءتۇرلى ايماقتارىندا ءساۋىر ايىنىڭ سوڭىندا جانە مامىر ايىنىڭ باسىندا جەر ماسەلەلەرى بويىنشا ميتينگتەر بولدى. ميتينگتەرگە قاتىسقاندار جەردىڭ ساتىلۋى مەن شەتەلدىكتەرگە ۇزاق مەرزىمگە جالعا بەرىلۋنە قارسى شىعىپ، ارنايى زاڭداعى وزگەرىستەردى جويۋدى تالاپ ەتكەن بولاتىن.
مامىردىڭ 5-ءى كۇنى قازاقستان پرەزيدەنتى نۇرسۇلتان نازارباەۆ قوعامدا داۋ تۋعىزعان جەر كودەكسىندەگى وزگەرىستەردىڭ كۇشىنە ەنۋىنە 2016 جىلدىڭ سوڭىنا دەيىن ۋاقىتشا موراتوري جاريالادى.
ازات ەۋروپا / ازاتتىق راديوسى
پىكىر قالدىرۋ