«Euraziya» birinşi arnasın” miting turalı habarğa qatıstı sotqa berdi
Qarağandılıq advokat Nwrhan Jwmabekov bügin Almatınıñ Bostandıq audandıq sotına «Euraziya» birinşi arnasına” tiesili «Euraziya+ORT» kompaniyasınıñ üstinen şağım tüsirdi. Advokat kompaniyadan moral'dıq şığın retinde 100 mıñ teñge talap etedi. Şağımğa arnanıñ jürgizuşisi Aymira Şaukentaevanıñ jer mäselesi boyınşa mitingterdi ötkizgen adamdarğa “aqşa tölengeni” turalı mälimdemesi sebep bolğan.
2016 jılı 30 säuirde Şaukentaeva «Rwqsat etilmegen mitingke kelgen ärbir adamğa wyımdastıruşılar, yağni, joğarıdağı besinşi kolonna 50 men 150 dollar aralığında aqşa tölegen» dep aytqan edi. Ötken aptada «Euraziya» birinşi arnasınıñ jurnalisteri jer mäseleleri boyınşa ötken mitingterdiñ “aqşa tölep jasalğanına däleli barın” da habarlağan. «Dälel» retinde körsetilgen videoda betteri körsetilmegen adamdardıñ bir-birine dollar berip jatqanı körsetilgen.
- Mitingke şıqqan adamdarğa teledidar arqılı topıraq şaşıp jatqanına qınjılam. Şaukentaevanıñ sözinşe, azamattar tek jasandı türde ğana narazılıqtarın körsete aladı eken, – deydi Nwrhan Jwmabekov Azattıq tilşisine.
Bostandıq audanınıñ azamattıq ister boyınşa sotı Azattıqqa arnağa qarsı mwnday şağım tüskenin rastaydı.
- Bügin Nwrhan Jwmabekovten «Euraziya+ORT» JŞS-ine qarsı şağım tüsti. Onı sud'ya Tat'yana Çernış qaraydı. Şağım bes jwmıs küni işinde qaraladı, – dedi sot ökili Sayat Serikov.
Qazaqstannıñ türli aymaqtarında säuir ayınıñ soñında jäne mamır ayınıñ basında jer mäseleleri boyınşa mitingter boldı. Mitingterge qatısqandar jerdiñ satıluı men şeteldikterge wzaq merzimge jalğa berilune qarsı şığıp, arnayı zañdağı özgeristerdi joyudı talap etken bolatın.
Mamırdıñ 5-i küni Qazaqstan prezidenti Nwrswltan Nazarbaev qoğamda dau tuğızğan jer kodeksindegi özgeristerdiñ küşine enuine 2016 jıldıñ soñına deyin uaqıtşa moratoriy jariyaladı.
Azat Europa / Azattıq radiosı
Pikir qaldıru