اۋىل شارۋاشىلىعى سالاسىندا قىتايدان قاشا بەرۋگە بولمايدى، قايتا ولارعا بارۋىمىز كەرەك. بۇگىن جەر رەفورماسى جونىندەگى كوميسسيانىڭ وتىرىسىندا پرەمەر-ءمينيستردىڭورىنباسارى، كوميسسيا توراعاسى باقىتجان ساعىنتاەۆ وسىلاي ءمالىم ەتتى.

بۇل تۋرالى nur.kz حابارلايدى.

«قىتايمەن اۋىل شارۋاشىلىعى سالاسىنداعى ساۋدانى دامىتۋ بۇگىنگى كۇنى كوتەرىلگەن ماسەلە ەمەس، ءبىرشاما جىلدار بويى اينالىسىپ كەلەمىز. ويتكەنى، قىتاي وزىنە كىرەتىن اۋىل شارۋاشىلىعى تاۋارلارىنىڭ ءبارىن ستاندارتتاپ تاستاعان. ولارعا سىرتتان ءونىم كىرمەيدى. ەندى قازاقستان نە ىستەي الادى؟ ەتتى الساق، بىلتىر التى مىڭ توننا عانا ەت شەتەلگە شىعاردىق. ونى رەسەيگە عانا اپاردىق. ال شەكارالىق اۋماقتاعى قىتاي جىلىنا قازاقستاننان ءتورت مىڭ توننا ەتتى ساتىپ الۋعا ازىرلىگىن تانىتىپ جاتىر»، – دەدى باقىتجان ساعىنتاەۆ.

ونىڭ ايتۋىنشا، قازاقستانعا قىتاي ۇلكەن مۇمكىندىكتەر بەرىپ وتىر. ال مال ونىمدەرىنىڭ، ەتتىڭ ساپاسى قازاقستاندا جاقسى، باعاسى دا باسەكەگە قابىلەتتى. سوندىقتان دا، قازاقستاننىڭ ەتىن الۋعا قىتاي مۇددەلى.

«بۇعان دەيىن قىتايعا استىق وتكىزۋ وتە قيىن بولاتىن. سونى ۇزاق جىلدار بويى كەلىسىپ ءجۇرىپ، كەلىستىك. قىتايعا بۇرىن قاپپەن عانا بيداي تاسۋعا رۇقسات ەتىلگەن ەدى. قازىر ونىڭ قاپشىعىن العىزىپ تاستادىق، قالاي اپارساق تا بولادى. كۆوتاسىن الدىق. ەندى وسىنداي كەلىسىمشارتتاردان ءبىز نە ۇتىلامىز؟»، دەدى ساعىنتاەۆ.

«جالپى قىتايدان قاشۋعا بولمايدى. كەرىسىنشە، ولارعا بارۋعا ءتيىسپىز. ەلباسى كەشە تاعى دا ايتتى، شەتەلدىك ينۆەستورلارعا، بىزگە سەنىڭدەر دەدى. اقشا قۇيىڭدار، جۇمىس ورىندار اشىڭدار، سالىق تولەڭدەر دەپ وتىر. ودان قازاق ۇتىلا ما؟ سوندىقتان دا، دۇرىس تۇسىنەيىك، دۇرىس تۇسىندىرۋگە تىرىسايىق. جەردى ەشكىم دە شەتەلدىككە ساتايىن دەپ وتىرعان جوق. ءبىز اۋىل شارۋاشىلىعىن دامىتقىمىز كەلەدى. وسىنى جۇرتقا دۇرىس تۇسىندىرسەڭىزدەر»، – دەدى پرەمەر-ءمينيستردىڭ ورىنباسارى.