جاڭالىقتار زۋقا باتىر 150 جىل قازاق حاندىعىنا 550 جىل
الماتىدا دۇنيەجۇزى قازاقتارىنىڭ حالىقارالىق ونەر فەستيۆالى وتەدى
دۇنيەجۇزى قازاقتارىنىڭ قاۋىمداستىعى ءداستۇرلى شەتەلدەگى قازاقتار اراسىندا وتەتىن ونەر فەستيۆالىن وتكىزەدى. قازان ايىنىڭ 7-ءسى كۇنى وتەتىن حالىقارالىق ونەر دوداسى “الماتى – تاۋەلسىزدىكتىڭ التىن بەسىگى” دەپ اتالادى. قازاقستان رەسپۋبليكاسىنىڭ تاۋەلسىزدىگىنە 25 جىل تولۋىنا جانە الماتى قالاسىنىڭ 1000 جىلدىعىنا وراي وتەتىن شارا الىستاعى اعايىندى ءبىر-بىرىمەن بايلانىستىرىپ، ءبىر-بىرىمەن تانىستىرۋدى كوزدەيدى، دەيدى BAQ.kz ءتىلشىسى.
قر مادەنيەت جانە سپورت مينيسترلىگى تىلدەردى دامىتۋ جانە قوعامدىق-ساياسي جۇمىس كوميتەتىنىڭ قولداۋىمەن دۇنيەجۇزى قازاقتارىنىڭ قاۋىمداستىعى ۇيىمداستىرىپ وتىرعان حالىقارالىق فەستيۆالگە 21 مەملەكەتتە تۇراتىن قانداستارىمىز قاتىسۋعا نيەت ءبىلدىرىپ وتىر. فەستيۆال اياسىندا “دوڭگەلەك ۇستەل”، سۋرەت كورمەسى، ءمۇشايرا، تەرمە سايىسى جانە گالا كونتسەرت وتەتىن بولادى.
سونىمەن قاتار، بيىلعى فەستيۆال بارىسىندا زۋحا باتىردىڭ 150 جىلدىعىنا قاتىستى دا الىس-جاقىننان كەلگەن قانداستارىمىزدىڭ اراسىندا تولىقتاي تانىستىرۋ جۇمىستارى ءجۇرىلىپ، باتىردىڭ قازاق تاريحىندا الار ورىنى تۋرالى ءسوز بولماقشى.
ءىس-شارا قازان ايىنىڭ 7-ءسى كۇنى الماتىداعى م.اۋەزوۆ اتىنداعى قازاق مەملەكەتتىك اكادەميالىق دراما تەاترىندا وتەدى.
قازاقستان رەسپۋبليكاسى مادەنيەت جانە سپورت مينيسترلىگىنىڭ تىلدەردى دامىتۋ جانە قوعامدىق-ساياسي جۇمىس كوميتەتى 2016 جىلدىڭ قازان ايىندا الماتى قالاسىندا «الماتى – تاۋەلسىزدىكتىڭ التىن بەسىگى» اتتى شەتەلدە تۇراتىن جانە ورالمان قازاق جاستارىنىڭ ونەر فەستيۆالى اياسىندا سۋرەت كورمەسىن وتكىزۋدى جوسپارلاپ وتىر.
ەرەجەسى
ماقساتى: شەتەلدەگى دارىندى قازاق جاستارىنىڭ بەينەلەۋ ونەرى تۇرلەرىن مەڭگەرۋدەگى شىعارماشىلىق شەبەرلىگىنە باسا نازار اۋدارۋ. ولاردىڭ وتانسۇيگىشتىك، رۋحاني، ۇلتتىق ناقىشتا بەينەلەنگەن، سومدالعان تىڭ تاقىرىپتاعى شىعارمالارىن ناسيحاتتاۋ.
مىندەتى: بەينەلەۋ ونەرى تۇرلەرى سالاسىندا شىعارماشىلىق شىنايى تۋىندىلارىن شىڭداپ جۇرگەن شەتەلدەگى قانداس جاستارىمىز بەن ورالمان قازاق جاستارىنىڭ ەڭبەكتەرىن كوپشىلىككە تانىتۋ.
كورمەگە قاتىسۋ شارتتارى:
1. سۋرەتشىنىڭ جاس مولشەرى 18-35 جاس ارالىعىندا بولۋى ءتيىس،
2. اۆتوردىڭ ءومىربايانى، تولىق مەكەنجايى جانە وقۋ ورنى، جۇمىسى، تەلەفونى كورسەتىلۋى كەرەك،
3. كەسكىندەمە شىعارما كولەمى 100×150 سم-دەن كەم نەمەسە اسپاۋى ءتيىس (ماتەريالدارى: مايلى بوياۋ، گۋاش، اكۆارەل، كەنەپ، كارتون، اق قاعاز)
4. گرافيكالىق شىعارما كولەمى 40×90 سم (ماتەريالدارى: وفورت، لينوگراۆيۋرا، گراۆيۋرا، ليتوگرافيا ت.ب.) كوركەمدىك دەڭگەيى تالاپقا ساي، تاقىرىپقا مەيلىنشە لايىق بولۋى ءتيىس.
ءاربىر اۆتوردىڭ كوركەم شىعارماسى تالاپقا ساي بەزەندىرىلىپ (باگەت), سانى
5-7-دەن اسپاۋى كەرەك.
سۋرەتشىلەر وزدەرىنىڭ تولىق اتى-ءجونى، ءومىربايانى، بايلانىس تەلەفوندارى، تۇرعىلىقتى مەكەنجايىن كورسەتىپ، حات جازۋى كەرەك. ۇيىمداستىرۋشىلار اۆتورلارعا وزدەرى كورسەتكەن بايلانىس تەلەفوندارى ارقىلى حابارلاسادى.
جەڭىمپازدار ديپلومدارمەن جانە اقشالاي سىيلىقتارمەن ماراپاتتالادى.
سۋرەتشىلەر وزدەرىنىڭ حاتتارىن مىنا مەكەنجايعا جىبەرە الادى:
دۇنيەجۇزى قازاقتارى قاۋىمداستىعىنىڭ ءۇيى (الماتى قالاسى، ش.ءۋاليحانوۆ كوشەسى، 43ا نەمەسە ەلەكتروندىق ادرەس: kazaktar.kz@mail.ru, tugan_til79@mail.ru
تەل.: 8(727) 2739025; تەل./فاكس: 8(727) 2739997
وعان قوسا:
شەتەلدىك جانە ورالمان قازاق جاستارىنىڭ اراسىندا قازاقستان تاۋەلسىزدىگىنىڭ 25 جىلدىعىنا وراي جىر ءمۇشايراسى مەن تەرمەشىلەر سايىسى وتەدى.
قازاقستان رەسپۋبليكاسى مادەنيەت جانە سپورت مينيسترلىگىنىڭ تىلدەردى دامىتۋ جانە قوعامدىق-ساياسي جۇمىس كوميتەتى 2016 جىلدىڭ قازان ايىندا الماتى قالاسىندا «الماتى – تاۋەلسىزدىكتىڭ التىن بەسىگى» اتتى شەتەلدە تۇراتىن جانە ورالمان قازاق جاستارىنىڭ ونەر فەستيۆالى اياسىندا جىر ءمۇشايراسى مەن تەرمەشىلەر سايىسىن وتكىزەدى.
ەرەجەسى
ءمۇشايرا مەن تەرمە سايىسىنىڭ ماقساتى:
- شەتەلدەگى جاس قازاق اقىندارىنىڭ جىرلارىن بايقاۋعا قاتىستىرۋ ارقىلى ولاردىڭ ۇلتتىق، وتانشىلدىق سەزىمىن، اتاجۇرتقا دەگەن ماحابباتىن ارتتىرۋ، مەملەكەتتىك ءتىلدىڭ مارتەبەسىن ودان ءارى كوتەرۋ، ءالى تانىلا قويماعان اقىنداردى، جىرشى-تەرمەشىلەردى انىقتاۋ، جاس دارىن يەلەرىن جۇرتشىلىققا تانىستىرۋ;
- قازاق جاستارى اراسىندا وتانسۇيگىشتىكتى كەڭىنەن ناسيحاتتاۋ، وسكەلەڭ ۇرپاقتىڭ بويىنا ۇلتتىق رۋحتى ءسىڭىرۋ، تاۋەلسىزدىكتى تەرەڭ سەزىندىرۋ، ەلدىك ماسەلەلەرگە سەرگەك قاراۋ.
ءمۇشايرا مەن تەرمە سايىسىنىڭ شارتى:
ءمۇشايرا مەن تەرمە سايىسىنا 35 جاسقا دەيىنگى شەتەلدە تۇراتىن جانە ەلىمىزدەن تىس ايماقتاردا تۋىپ-ءوسىپ، قازىر اتاجۇرتقا ورالعان جاس قازاق اقىندارى مەن جىرشى-تەرمەشىلەرى قاتىسا الادى.
اۆتوردىڭ شىعارماسى بۇرىن ەش جەردە جاريالانباعان بولۋى كەرەك.
ءبىر اقىن ءۇش ولەڭمەن قاتىسا الادى.
ءبىرىنشى ولەڭى – اتامەكەن، ەل مەن جەر، ەلدىك، پاتريوتتىق ماسەلەلەر تاقىرىبىندا بولۋى كەرەك (مىندەتتى);
ەكىنشى ولەڭى – زۋقا باتىردىڭ تۋعانىنا 150 جىل تولۋىنا وراي باتىردىڭ ەرلىگى مەن ءومىرى تۋرالى (مىندەتتى);
ءۇشىنشىسى ەركىن تاقىرىپتاعى ولەڭ بولۋى قاجەت.
تەرمە سايىسى ەركىن تاقىرىپقا قۇرىلادى. تەرمەشىلەردىڭ ورىنداۋشىلىق شەبەرلىگىنە باعا بەرىلەدى.
تەرمەشىلەر دۇنيەجۇزى قازاقتارى قاۋىمداستىعىنىڭ «اتاجۇرت» باسپا ورتالىعىنا الدىن الا حابارلاسىپ، تىركەۋدەن وتۋگە، مۇمكىندىگى بولسا، ورىندايتىن تەرمەلەرىنىڭ ءۇنجازباسىن تاپسىرۋعا مىندەتتى.
ولەڭدەر 2016 جىلدىڭ 15 قىرگۇيەگىنە دەيىن قابىلدانادى. جىبەرىلەتىن ولەڭ ءماتىنىنىڭ استىنا اۆتوردىڭ تولىق اتى-ءجونى، ءومىربايانى، بايلانىس تەلەفوندارى، تۇرعىلىقتى مەكەنجايى كورسەتىلۋى شارت.
ۇيىمداستىرۋشىلار اۆتورلارعا وزدەرى كورسەتكەن بايلانىس تەلەفوندارى ارقىلى حابارلاسادى. الدىن الا ىرىكتەۋدەن ءوتىپ، كونكۋرسقا جىبەرىلگەندەردىڭ اراسىنان ارنايى ادىلقازىلار القاسىنىڭ قاتىسۋىمەن جۇلدەگەرلەردى انىقتاۋ، ولاردى ماراپاتتاۋ ءراسىمى 2016 جىلدىڭ قازان ايىنداعى فەستيۆال اياسىندا وتكىزىلەدى.
ادىلقازىلار القاسىنىڭ شەشىمىمەن جەڭىمپازدارعا بەس دارەجە بويىنشا جۇلدە (اقىندارعا بولەك، تەرمەشىلەرگە بولەك) تاعايىندالادى.
ءمۇشايرا مەن تەرمە سايىسىنىڭ جەڭىمپازدارى ديپلومدارمەن جانە اقشالاي سىيلىقتارمەن ماراپاتتالادى.
اقىندار ولەڭدەرىن «مۇشارايعا» دەگەن اتپەن مىنا مەكەنجايعا جىبەرە الادى: دۇنيەجۇزى قازاقتارى قاۋىمداستىعىنىڭ ءۇيى (الماتى قالاسى، ش.ءۋاليحانوۆ كوشەسى، 43ا نەمەسە ەلەكتروندىق ادرەس: kazaktar.kz@mail.ru, tugan_til79@mail.ru
تەل.: 8(727) 2739025; تەل./فاكس: 8(727) 2739997
پىكىر قالدىرۋ