قازاقستان پرەزيدەنتى نۇرسۇلتان نازارباەۆ G20 ءسامميتىنىڭ گالا-كونتسەرتىن سۇيسىنە تاماشالادى. ەلباسى كونتسەرتتەن العان اسەرىمەن قازاقستاندىق جۋرناليستەرگە ارنالعان بريفينگتە ءبولىستى. بۇل تۋرالى «قازاقپارات» پورتالى حابارلايدى.
«قازاقستاندىقتارعا كورسەتىڭىزدەر. كەشە بىزگە كورسەتكەن كونتسەرتى كۇشتى اسەر ەتتى، عالامات! سۋداعى «اققۋ كولى»: سۋدى جالاڭ اياق شالپىلداتىپ كەشىپ، بيلەدى، سۋبۇرقاقتاردى قولمەن، وجاۋمەن جاسايدى. بارلىعى ءجۇزىپ ءجۇر جانە كەتىپ قالادى: قابىرعالار، وركەستر، ورىنداۋشىلار. جالپى عاجاپ بولدى، قانشاما تەحنيكا قولدانىلدى. رەجيسسەرى وليمپيادا ويىندارىنىڭ (2008 جىلعى بەيجىڭ جازعى ويىندارى قازاقپارات ەسكەرتپەسى) اشىلۋىن قويعان ادام ەكەن»، – دەدى مەملەكەت باسشىسى.
وسى ورايدا قر پرەزيدەنتى G20 ءسامميتى گالا-كونتسەتىن قويعان قىتايلىق رەجيسسەردى قازاقستان تاۋەلسىزدىگىنىڭ 25 جىلدىعىنا ارنالعان كونتسەرتتى دايىنداۋعا شاقىرۋ جايىندا ويلانىپ قالعانىن ايتتى.
«ال ءبىز قايدا جاسايمىز؟ ەسىلدە مە؟ بىزدە سۋدا جاساۋعا كەلمەيدى. مۇمكىن قاردىڭ ۇستىنە شىعار؟ ءبىز كوپ نارسەنى كورەمىز، بىراق ولار (قىتاي – ەسكەرتپە) مۇنى تاماشا، اۋقىمدى جاساي الادى. مەن بۇل جەرگە ءبىرىنشى رەت كەلىپ وتىرعانىم جوق»، – دەدى ن.نازارباەۆ.
بۇل رەتتە مەملەكەت باسشىسى تاۋەلسىزدىك سارايى عيماراتىنىڭ اۋقىمى قحر حالىق جينالىسى بۇكىلقىتايلىق حالىق وكىلدەرى جينالىسى عيماراتىنا بالاما رەتىندە جاسالعانىن اتاپ ءوتتى.
«تاۋەلسىزدىك سارايىن مەن ۇلگى رەتىندە الدىم. وسى جەردەگى حالىق وكىلدەرى ءۇيىن كوردىم، ول وتە ۇلكەن، ۇلكەن جيىندار وتكىزۋگە ارنالعان. استانادا وسىنداي عيمارات سالۋ كەرەك دەپ شەشتىم. ارينە، بىزدە مۇنداي ۇلكەن ەمەس. بىراق، مەنىڭشە، بىزگە جارايدى»، – دەدى ن.نازارباەۆ.
ەسكە سالساق، 1 قىركۇيەكتە ن. نازارباەۆ قحر توراعاسى سي ءتسزينپيننىڭ شاقىرۋىمەن G20 سامميتىنە قاتىسۋ ءۇشىن قىتايعا كەلدى. ءبىرىنشى سەسسيادا مەملەكەت باسشىسى جاھاندىق ەكونوميكا ماسەلەلەرىن شەشۋ جولدارى تۋرالى ءوز بولجامدارىن ايتتى.
Abai.kz
پىكىر قالدىرۋ