22-ғасырдағы бір ‘iSheep’ биограф жазған әдеби естелік
Жақсы адам еді. iPhone 1-дің кезінде туып, 4S-тің кезінде мектепке барды. 5-тің кезінде алғашқы өлеңі вебсайтта жарияланды. iPhone 6 қалтаға салса, майысып қалатыны белгілі боп жатқан кезде бірінші әдеби жүлдесін алды. Алғашқы видеоблогын SE-мен жазып, 7 Plus-тің кезінде оқырмандарымен live режимде әңгімелесті. 10S-пен қатар мектеп бітіріп, университетке түсті. 15 Plus-ке тартылған үйлену тойы интернетте ең көп көрілген клиптің біріне айналды. 20S заманында жазған поэмасы “ұлттың рухани мұрасы” деп жарияланды. Ал iPhone 25-і ішіндегі чат-өлеңдерімен бірге мемлекеттік мұражайға қойылды. Марқұм телепортация тетігі орнатылған iPhone 50-ді көре алмай кетті. Бірақ 3D принтер функциясы бар 49S-ке жазған арнауында ондай күн туарын да болжап үлгерген еді. Бақұл бол, бауырым. Артыңда қалған ұл-қызың 100S-тің қызығын көрсін!
Пікір қалдыру