ساعىنتاەۆ الماتى وبلىسىنداعى كىسى ءولىمىن تەرگەۋدى باقىلاۋدى تاپسىردى
پرەمەر-مينيستر باقىتجان ساعىنتاەۆ ىشكى ىستەر ءمينيسترى قالمۇحانبەت قاسىموۆقا الماتى وبلىسىندا كىسى قولىنان قازا بولعان اعايىندىلار ءولىمى ءىسىن تەرگەۋدى باقىلاۋعا الۋدى تاپسىردى دەپ حابارلادى Tengrinews.kz سايتى.
استانادا ءوتىپ جاتقان ۇكىمەت وتىرىسىندا ساعىنتاەۆ اعايىندى كىسىلەردىڭ ءوىلىمى جۇرتتى الاڭداتىپ وتىرعاندىقتان بۇل ءىستى باقىلاۋىنا الۋدى جانەوزىنە وعان قاتىستى مالىمەت بەرۋدى سۇراعان.
وتكەن اپتادا وسىدان بىرنەشە جىل بۇرىن قازاقستانعا قىتايدان كوشىپ كەلگەن ورالمان ءۇش ازامات – جارقىنبەك دولدانۇلى، مۇقيات زارلىحانۇلى جانە قادىلبەك ءالىمحان الماتى تۇبىندەگى ۇزىناعاش اۋىلىنداعى بازارعا مال ساتۋعا كەلگەن سوڭ حابارسىز كەتىپ، بىرنەشە كۇننەن سوڭ قايتىس بولعانى حابارلانعان.
قاسىموۆ بۇل وقيعاعا قاتىستى مالىمەتتى ناقتىلاپ ايتىپ بەردى. “20 قىركۇيەكتە بىزگە ازاماتتاردىڭ الماتىعا مال ساتۋعا كەتىپ، جوعالىپ كەتكەنى تۋرالى ارىز ءتۇستى. 21 قىركۇيەكتە ءبىز ءبىر كولىكتى تاپتىق. ولار ەكى كولىكپەن 41 باس مالدى الماتى وبلىسىنداعى بازارعا ساتۋعا اپارعان. 23 قىركۇيەك كۇنى ەكىنشى كولىكتى تاپتىق” دەدى قاسىموۆ.
ءمينيستردىڭ سوزىنشە، اعايىندىلاردى ءولتىردى دەگەن كۇدىكپەن جامبىل اۋدانىنىڭ ەكى تۇرعىنى ۇستالعان. كۇدىكتىلەر اعايىندىلاردى مالدارىن ساتىپ الامىز دەپ الداپ تاۋعا اپارىپ، ۇشەۋىن دە ولتىرگەن. كۇدىكتىلەر ولتىرگەن ادامدارىن كومگەن ورىندى كورسەتىپ، ءتيىستى ساراپتاما تاعايىندالعان.
قاسىموۆتىڭ ەسەبىنەن سوڭ ساعىنتاەۆ تاياۋ ۋاقىتتا قوعامدىق قاۋىپسىزدىك پەن زورلىق-زومبىلىقپەن كۇرەس ماسەلەلەرى ۇكىمەت وتىرىسىندا قارالاتىنىن ايتقان.
بۇعان دەيىن اعايىندى كىسىلەردىڭ تۋىسى تۇرسىن ءامىربايۇلى ازاتتىققا پوليتسيا وزدەرىنە جوعالعانداردىڭ سۇيەكتەرى الماتىدان 200 كيلومەتردەي قاشىقتىقتان تابىلعانىن ايتقانىن حابارلاعان. ءامىربايۇلىنىڭ سوزىنە قاراعاندا، الماتى وبلىسى كوكسۋ اۋدانىندا تۇرعان ءۇش ازاماتتىڭ ارقايسىسىنىڭ ارتىندا ۇشتەن، ەكىدەن جاس بالاسى، قارت اتا-اناسى قالعان.
مارقۇمداردى جەرلەۋ ءراسىمى بۇگىن ءوتىپ جاتىر.
ازات ەۋروپا / ازاتتىق راديوسى
پىكىر قالدىرۋ