Sağıntaev Almatı oblısındağı kisi ölimin tergeudi baqılaudı tapsırdı
Prem'er-ministr Baqıtjan Sağıntaev işki ister ministri Qalmwhanbet Qasımovqa Almatı oblısında kisi qolınan qaza bolğan ağayındılar ölimi isin tergeudi baqılauğa aludı tapsırdı dep habarladı Tengrinews.kz saytı.
Astanada ötip jatqan ükimet otırısında Sağıntaev ağayındı kisilerdiñ öilimi jwrttı alañdatıp otırğandıqtan bwl isti baqılauına aludı jäneözine oğan qatıstı mälimet berudi swrağan.
Ötken aptada osıdan birneşe jıl bwrın Qazaqstanğa Qıtaydan köşip kelgen oralman üş azamat – Jarqınbek Doldanwlı, Mwqiyat Zarlıhanwlı jäne Qadılbek Älimhan Almatı tübindegi Wzınağaş auılındağı bazarğa mal satuğa kelgen soñ habarsız ketip, birneşe künnen soñ qaytıs bolğanı habarlanğan.
Qasımov bwl oqiğağa qatıstı mälimetti naqtılap aytıp berdi. “20 qırküyekte bizge azamattardıñ Almatığa mal satuğa ketip, joğalıp ketkeni turalı arız tüsti. 21 qırküyekte biz bir kölikti taptıq. Olar eki kölikpen 41 bas maldı Almatı oblısındağı bazarğa satuğa aparğan. 23 qırküyek küni ekinşi kölikti taptıq” dedi Qasımov.
Ministrdiñ sözinşe, ağayındılardı öltirdi degen küdikpen Jambıl audanınıñ eki twrğını wstalğan. Küdiktiler ağayındılardı maldarın satıp alamız dep aldap tauğa aparıp, üşeuin de öltirgen. Küdiktiler öltirgen adamdarın kömgen orındı körsetip, tiisti saraptama tağayındalğan.
Qasımovtıñ esebinen soñ Sağıntaev tayau uaqıtta qoğamdıq qauipsizdik pen zorlıq-zombılıqpen küres mäseleleri ükimet otırısında qaralatının aytqan.
Bwğan deyin ağayındı kisilerdiñ tuısı Twrsın Ämirbaywlı Azattıqqa policiya özderine joğalğandardıñ süyekteri Almatıdan 200 kilometrdey qaşıqtıqtan tabılğanın aytqanın habarlağan. Ämirbaywlınıñ sözine qarağanda, Almatı oblısı Köksu audanında twrğan üş azamattıñ ärqaysısınıñ artında üşten, ekiden jas balası, qart ata-anası qalğan.
Marqwmdardı jerleu räsimi bügin ötip jatır.
Azat Europa / Azattıq radiosı
Pikir qaldıru