Qazaqstan Respublikasınıñ Ortalıq memlekettik muzeyi qızmetkerleri Keyki batırdıñ bas süyegi qalay saqtaulı twrğanın körsetti. Bwl turalı Tengrinews.kz habarladı. Muzey direktorınıñ orınbasarı Beybitqali Qaqabaevtıñ aytuınşa, muzeydegiler Keyki batır jetkizilgen arnayı konteynerdi aşpağan.
Sonımen qatar, muzeyde Keyki batırdıñ bassüyegin qoyatın arnayı bölmeniñ bölingeni belgili boldı. Döñgelegi bar konteyner bölmeniñ ortasında ornalasqan. Konteyner qızıl matamen oralıp, mayşam qosılğan.
“Konteynerdiñ işin biz eşkimge körsetken joqpız. Ol barlığına körsetuge bolatın qanday da bir zat emes, ol – adamnıñ bassüyegi. Sondıqtan biz onı aşpauğa tırısamız. Juırda, yağni 1-2 künniñ işinde biz Keyki batırdıñ bassüyegin Vengriyağa saraptamağa jiberemiz. Qazir qajetti qwjattar räsimdelip jatır”, – dedi Beybitqali Qaqabaev.
“Vengriyada bizdiñ maqsatımız – ğılımi jäne genetikalıq zertteuler jürgizu. Keyin elektrondıq tehnologiyalarmen süyekterdi qayta qalpına keltirip, Keyki batırdıñ pişinin köruge böledi. Vengriyada ğalımdar mwnday zertteulermen jaqsı aynalısadı. Olarğa bwl zertteu qızıq boladı, sebebi olar özderin qıpşaq sanaydı”, – dedi Qaqabaev. Sonday-aq, ol zertteulerdiñ bes ayğa sozıluı mümkin ekenin ayttı. Al keyinirek Keyki batırdıñ bassüyegi qaytarılıp, Qostanay oblısında jerlenetin boladı.
Sonımen qatar, Antropologiya jäne etnografiya muzeyiniñ qızmetkerleri tüsirgen jädigerlerdiñ suretteri payda boldı. Ol suretter Kunstkameradağı mwrağatta 90 jıldan asa uaqıt saqtalğan eken.
Sonday-aq, memlekettik muzey qızmetkerleri Kunstkameradağı jädigerlerdi qalay alğandarın aytıp berdi.
“Bastapqıda Reseydegi muzeydiñ mwrağatında saqtaulı twrğan bassüyekti tarihi-mädeni qwndılığı joq dünie dep sanaldı. Sol uaqıttan beri ol jädiger retinde emes, adamnıñ bassüyegi esebinde saqtaulı twrğan. Keyinnen saqtaulı twrğan bassüyek bizge jetkizildi”, – dedi QR Ortalıq memlekettik muzeydiñ qızmetkerleri.
Mwnıñ aldında Ortalıq memlekettik muzeydiñ direktorı Nwrsan Älimbay 12 qazan küni Keyki batırdıñ bas süyegi antropologiyalıq saraptama üşin Vengriyağa jetkiziletinin mälimdegen bolatın.
Abay-aqparat
Pikir qaldıru