ەل تاۋەلسىزدىگىنىڭ 25 جىلدىعى اياسىندا اسا مارتەبەلى مەيماندار قاتىساتىن حالىقارالىق كونفەرەنتسيا وتكىزۋ جوسپارلانىپ وتىر
كەزدەسۋدە ە.ىدىرىسوۆ مەملەكەت باسشىسىنا 2017 جىلعى قاڭتاردا باستالاتىن قازاقستاننىڭ بۇۇ قاۋىپسىزدىك كەڭەسىنە مۇشەلىگى اياسىنداعى جۇمىستارعا ازىرلىك بارىسى تۋرالى باياندادى.
ەلباسى سىرتقى ساياسي قىزمەتتى اتقارۋ كەزىندە رەسپۋبليكا تاۋەلسىزدىگىنىڭ 25 جىلدىعىنا باسا نازار اۋدارۋ قاجەتتىگىن اتاپ ءوتتى.
– ەلدىڭ حالىقارالىق ارەناداعى بەدەلىن ارتتىرۋ ءۇشىن ەلشىلەرىمىز 25 جىلدا قول جەتكىزگەن جەتىستىكتەرىمىزدى، سونىڭ ىشىندە قازاقستاننىڭ رەسپۋبليكادان تىس جەرلەردەگى بەيبىتشىلىك پەن تىنىشتىقتى ساقتاۋ ىسىنە قوسقان ۇلەسىن شەتەلدىك قوعامداستىققا كورسەتۋگە ءتيىس، – دەدى نۇرسۇلتان نازارباەۆ.
سونىمەن بىرگە، مەملەكەت باسشىسى ەلىمىزگە شەتەلدىك رەسمي دەلەگاتسيالاردىڭ كەلۋىنىڭ ماڭىزدىلىعىن ايتتى.
قازاقستان پرەزيدەنتى الداعى بۇۇ قاۋىپسىزدىك كەڭەسىنە مۇشەلىك اياسىندا وتكىزىلەتىن ءىس-شارالاردىڭ باسىمدىعى بار باعىتتارىنا توقتالىپ، بۇل مارتەبەلى مىندەت الەمدىك قوعامداستىقتىڭ ايرىقشا سەنىمىنىڭ كورىنىسى بولىپ سانالاتىنىن جەتكىزدى.
سىرتقى ىستەر ءمينيسترى قاۋىپسىزدىك كەڭەسىندەگى قىزمەتكە دايىندىق بەلسەندى تۇردە جۇرگىزىلىپ، تۇراقتى كوميتەتتەرگە باسشىلىق جاساۋ مىندەتتەرىنىڭ ءبولىنىپ بەرىلىپ جاتقانىن مالىمدەدى.
بۇدان بولەك، ە.ىدىرىسوۆ رەسپۋبليكا تاۋەلسىزدىگىنىڭ 25 جىلدىعى اياسىندا اسا مارتەبەلى مەيماندار قاتىساتىن حالىقارالىق كونفەرەنتسيا وتكىزۋ جوسپارلانىپ وتىرعانىن مالىمدەدى.
سىرتقى ساياسات ۆەدومستۆوسىنىڭ باسشىسى قازاقستان پرەزيدەنتىن الداعى حالىقارالىق ءىس-شارالار، سونىڭ ىشىندە باسىم بولىگى «ەكسپو-2017» حالىقارالىق كورمەسىن وتكىزۋگە بايلانىستى بولاتىن شارالار تۋرالى حاباردار ەتتى.
نۇرسۇلتان نازارباەۆ كەزدەسۋ قورىتىندىسى بويىنشا بىرقاتار ناقتى تاپسىرما بەردى.
پىكىر قالدىرۋ