ساكەن مايعازيەۆ NINETY ONE توبىن قولداۋدىڭ توعىز سەبەبىن اتادى
ءانشى ساكەن مايعازيەۆ اتىشۋلى بويزبەند NINETY ONE توبىن قولداۋدىڭ توعىز سەبەبىن اتادى، – دەپ حابارلايدى Tengrinews.kz تىلشىسى.
ءانشىنىڭ توپ جايلى پىكىرى Instagram جەلىسىندەگى 91_world پاراقشاسىندا جاريالاندى. مايعازيەۆتىڭ ايتۋىنشا، ارتىسكە قاستاندىق جاساۋدىڭ قاجەتى جوق. “(…) سۇرانىسى بولماعان اكتەرلەر كۇيزەلىسكە ءتۇسىپ كەتەدى. مەنىڭ ايتقىم كەلگەنى، جىگىتتەر سونشا بويانىپ-تارانىپ بارعان كەزدە ونى ەشكىم قابىلداماي قويسا وبال. مەن ول باۋىرلارىمدى جاقسى كورەمىن”، – دەدى ءانشى.
سونداي-اق، ساكەن مايعازيەۆ NINETY ONE توبىنىڭ جاقسى قاسيەتتەرى كوپ ەكەنىن ايتا كەلىپ، ولار تۋرالى توعىز پىكىردەن تۇراتىن پوست جازعانىن ايتىپ ءوتتى. ء“بىرىنشى، انا تىلىندە عانا سويلەپ، سۇحبات بەرىپ، ءان شىرقاپ، قازاق ءتىلىن دارىپتەپ جۇرگەن تالانتتى جىگىتتەر. ەكىنشى، ءوز باعىتىنىڭ شەبەر ورىنداۋشىلارى. ءۇشىنشى، وتە جاقسى ۆوكاليستەر، دياپازوندارى كەڭ، ميليزماتيكانى مىقتى مەڭگەرگەن، تەمبرلەرى تاماشا، تاعىسىن تاعى. ءتورتىنشى، كەرەمەت رەپ ورىنداۋشىلارى. رەپ – ريتميكالىق امەريكالىق پوەزيا. ال بىزدە بۇل ايتىس، جىر، سۋىرىپ-سالما ونەرى”، – دەپ سانامالادى ءارتىس.
ال بەسىنشى سەبەبى دەپ مايعازيەۆ جىگىتتەردىڭ سابىرلى ءارى بايسالدى قاسيەتتەرىن اتادى. “ولارعا باعىتتاپ، بالاعاتتاپ، بەيپىل سوزدەر ايتىلسا دا، بوقتاي بىلمەيتىن بايسالدى بالالار. مەن ونەر ادامى بولعاننان كەيىن ولاردى زەرتتەدىم، قارادىم. ولار پسيحولوگيا تۇرعىسىندا قانداي دا سىنعا دايىن بولدى. التىنشى، ولار – ەڭبەكقور. كاسىبي ساحناعا شىعۋ جولىندا ەكى جىل دايىندالدى. جەتىنشى، ساحنالىق بي قيمىلدارى كاسىبي، سينحروندى قيمىلدايدى، ساحناداعى ەركىندىگى وتە كەرەمەت. ساحناداعى جۇمىسىن ينتەرنەتتەن تاماشالادىم. ءوزىم ۇستاز بولعاننان كەيىن اتتانداي بەرمەي، قاراپ كورەيىن، زەرتتەيىن دەدىم. سەگىزىنشىسى، قازاقستان ەستراداسىندا ۇلكەن پىكىرتالاس، سىن-ەسكەرتۋلەر، داۋ تۋعىزعان، بىلايشا ايتقاندا “اتىڭ شىقپاسا، جەر ورتە” دەگەن مىسالىنا “امال” جاساپ جۇرگەن العاشقى توپ”، – دەدى ساكەن مايعازيەۆ.
ال سوڭعى، توعىزىنشى قاسيەتى دەپ ءانشى توپتىڭ قايىرىمدىلىقپەن ۇنەمى اينالىساتىن ايتىپ، ءوز ويىن وسىلايشا قورىتىندىلادى.
بۇدان كەيىن ءانشى توپ جايلى ءۇش رەت قانا سۇحبات بەرگەنىن مالىمدەدى. الايدا، ايتۋىنشا، جۋرناليستەر ونىڭ NINETY ONE توبى تۋرالى كيىمىنە قاتىستى ءسوزىن عانا جاريالايدى ەكەن. ال توپتىڭ قازاق ءتىلىن ناسيحاتتاپ جۇرگەنى، سونىمەن قاتار، دارىندى جىگىتتەر ەكەندىگى جايلى ءسوزى قيىلىپ قالا بەرەتىن كورىنەدى.
ايتا كەتەيىك، وسىعان دەيىن NINETY ONE توبىنىڭ كونتسەرتىنە شىمكەنتتە، قىزىلوردادا، قاراعاندىدا، جەزقازعاندا كەيبىر تىڭدارماندار نارازى بولعان. وسىلايشا، بۇل قالالاردا توپتىڭ كونتسەرتى وتپەي قالىپ، سوڭى داۋعا ۇلاسقان ەدى.
tengrinews.kz
پىكىر قالدىرۋ