اقتوبەدە “دونباستا سوعىسقان” تۇرعىن سوتتالدى
اقتوبە سوتى ءوزىن-ءوزى دونەتسك حالىق رەسپۋبليكاسى (دحر) دەپ جاريالاپ العان قۇرىلىمنىڭ قاتارىندا “ۋكراينا اسكەرىنە قارسى سوعىستى” دەپ ايىپتالعان ماكسيم ەرمولوۆقا ۇكىم شىعاردى. جەرگىلىكتى تۇرعىن ماكسيم ەرمولوۆ 7 قازان كۇنى 3 جىلعا باس بوستاندىعىنان ايىرىلدى. سوتتالۋشى جازاسىن جالپى رەجيمدەگى اباقتىدا وتەيدى.
كۇدىكتى وزىنە تاعىلعان ايىپتى مويىنداپ وتىرعان جوق. ايتۋىنشا، قولىنا قارۋ الىپ سوعىسپاعان. ول سوڭعى سوزىندە ۋكرايناعا گۋمانيتارلىق كومەك كورسەتۋ ءۇشىن عانا بارعانىن ايتتى.
ال تەرگەۋ ماتەريالدارىنا قاراعاندا، ماكسيم ەرمولوۆ 2014 جىلعى قىركۇيەك پەن 2015 جىلعى اقپان ايى ارالىعىندا ۋكراينانىڭ دونەتسك وبلىسىنا بارىپ، اسكەري قاقتىعىستارعا قاتىسقان، قولىنا قارۋ الىپ، دحر جەتەكشىلەرىنىڭ ءتۇرلى تاپسىرمالارىن ورىنداعان، دونباسستاعى “وپتيما” قوناق ۇيىنە بەكىنگەن اسكەري ءبولىمدى كۇزەتكەن.
ۇلتتىق قاۋىپسىزدىك كوميتەتى ماكسيم ەرمولوۆتى 2015 جىلى اقپان ايىندا جەكە شارۋالارىمەن قازاقستانعا ورالعاندا ۇستاپ، وعان قىلمىستىق كودەكستىڭ 172-بابى بويىنشا ايىپ تاققان.
ازات ەۋروپا / ازاتتىق راديوسى
پىكىر قالدىرۋ