قىرعىزستاندا تەكەباەۆتىڭ سەرىگى قامالدى
دۇيشونكۋل چوتونوۆ، قىرعىزستاننىڭ بۇرىنعى دەپۋتاتى. قىرعىزستان پارلامەنتىنىڭ بۇرىنعى دەپۋتاتى، “اتا مەكەن” پارتياسىنىڭ مۇشەسى دۇيشونكۋل چوتونوۆ 48 ساعاتقا قاماۋعا الىندى دەپ حابارلادى قىرعىزستاننىڭ مەملەكەتتىك ۇلتتىق قاۋىپسىزدىك كوميتەتى (مۇقك). كوميتەت اقپاراتىنا قاراعاندا، چوتونوۆقا “كوررۋپتسيا” جانە “الاياقتىق” باپتارى بويىنشا قىلمىستىق ءىس قوزعالعان. چوتونوۆ 26 اقپاندا 48 ساعاتقا قاماۋعا الىنعان وپپوزيتسيالىق ساياساتكەر ومۋربەك تەكەباەۆتىڭ ءىسى بويىنشا تەرگەلگەن. قازىر ول مۇقك-نىڭ تەرگەۋ اباقتىسىندا. 25 اقپاندا قىرعىزستان باس پروكۋراتۋراسى “اتا مەكەن” فراكتسياسىنىڭ جەتەكشىسى ومۋربەك تەكەباەۆ پەن تاعى بىرنەشە ادامنىڭ ۇستىنەن “كوررۋپتسيا” جانە “الاياقتىق” باپتارى بويىنشا قىلمىستىق ءىس قوزعاپ، ول ءىس بويىنشا تەرگەۋدا مۇقك-ءنىڭ تەرگەۋ باسقارماسىنا تاپسىرعان. دۇيشونكۋل چوتونوۆ 2010 جىلعى ءساۋىر وقيعاسىنان كەيىن توتەنشە جاعدايلار ءمينيسترى، قىرعىزستاننىڭ وڭتۇستىك كورەياداعى ەلشىسى قىزمەتتەرىن اتقارعان. ازات ەۋروپا / ازاتتىق