قۇرقىلتايدىڭ قۇياسى
kerey.kz
ءتۇن ءتۇس كورىپ جاتىرمىن، وياتپاڭدارشى!!!
«بۇركىتتىڭ قۇياسى تۇسەتىنىن ەستىگەن ەدىك، قۇرقىلتاي دا بولسىن با»،-دەپ وتىرعاندار قىران-توپان دۋ كۇلدى. بىراق ءزىلدى ەمەس.
جاس ايىرماشىلىعىن ەسكەرسەك ايقارا قارىس التىلىق بار، تالقىلىق جوق. وتپەلى دۇنيەنىڭ جولايىرىعىنا جەتكەن دە بىرەۋى تاۋعا تارتتى، ەكىنشىسى سول قالپىندا تۇسىنەن جاڭىلماعان كەيپىندە داۋعا تارتتى…جو، جو، جوق. زاۋدەعالام الدا-جالدا ويپىل-تويپىل بولسا، كىمنىڭ قاي جاققا تاناۋى جەلبىرەيتىنىن ۋاقىت انىقتار. ونى ءومىر كارتيناسى ءوزى سىزىپ مەڭزەۋگە الەك. تۇلەن تۇرتكەن دە اعادان قايىر بولعان با؟ بولسا كورەلىك.
جوپەلدەمە دە جاسالعان توسىن شەشىم تىزەدەن قاعىپ، اق باس تاۋدان شاڭ شىعارسا، جۇرەك قايدا بارىپ كۇنەلتسىن. ءبارىبىر كەۋدەدەن قاشىپ كەتە الماي تۋلايدى. تۋلاپ-تۋلاپ تۇرالاپ قالادى. ىلە سالا قۇزعىندار شۋلايدى. بىراق سىرتتاعى ىزعىرىقتىڭ جۇقا قابىرعادان تۇيرەگەندە جان مۇرننىڭ ۇشىنا جەتەر، سوندا دا شىداۋعا تۋرا كەلەدى. كەلمەي لاجىڭ جوق…
قوزى كوش جەردەن كورگەن نارسەنى مويىنىمەن نۇسقاۋ، بىلگەن نارسەنى بەس كۇن ارقالاۋعا تۋرا كەلەتىن قيا بەتتىڭ كىشى شۇقاناقتارى. كارىزدىڭ قىلتاناقتارى قاۋلايدى بەيوپا دۇنيە. قيامەت دەمەي تۇرا-تۇرالىق، سابىر بار عوي!
سۇيەگى جۇقارىپ جۇبىنا جەتكەندە باسىڭا قۇسى ساڭعىرىپ، مويىنىڭا تىشقان ءمىنىپ الاتىن بولسا باقىتتىڭ قۇلاعى. جەتى تارازى- وي، اقىل، سانا، كوز، تۇيسىك، سەزىم، جۇرەك بولىپ ەكشەگەن قاتەلىك پەن قارالىقتىڭ ءبارى ميزام تارازىسىندا ءوزىنىڭ قۇنى مەن وبالىن، ساۋابىن الادى. ول كەزدە تىم كەش…
قوس جانارى ءوزىن جەتەلەپ ارەڭ جۇرگەندە كورگەنى مىناۋ، ءسونىپ كەتسە شە، ءبارىنىڭ اۋىزىنا قۇم قۇيىلار. قارا باسىنا نە كورىندى. ونى سارساڭعا ءتۇسىپ دالەلدەۋدىڭ پايداسى سوقىر تيىن. تۇندە قالعىماعان، كۇندىز اڭدىماعان كولەڭكە قالدى ما؟ سوڭىندا قۋ سۇلدەرىن سۇيرەتكەن ءبىر شوعىر لاپ قويىپ كەلەدى. ولاردىڭ جۇرەگى جوق، قۇلتەمىرگە اينالعان مىسكىندەر. بىراق، وتىرىك پەن قارالىقتى جاساعىسى كەلسە ايشىلىق جەردەن ايلا تابادى. شىندىققا كەلگەندە قايلاسىز قالادى. ەندى نە دەيسىڭ؟
مەن ونىمەن ات كەكىلىن كەسىسىپ، بەلدىكتى شەشىسىپ كەتتىم، ماحابباتتىڭ تۇبىنە جەتتىم. سويىلدىڭ دۇمىنەن ءوتتىم، اجىراپ قالعان ار، قوجىراپ قالعان سور. سوندا ول نە تاپتى… بار بولعانى شاڭىراق شايقالدى، قۇرقىلتاي ۇشىپ كەتتى.
تاڭ ەسىنەپ جاتىرمىن قويا تۇرىڭدارشى!!!
كوگەداي شامەرحان.
سۋرەتتى جاساعان: باقتيار ءايتالى kerey.kz
پىكىر قالدىرۋ