ساز سىڭعىرلى عازالدار
kerey.kz
جۇمات انەسۇلى
ساز سىڭعىرلى عازالدار
ماڭدايىمنان سيپار ما
ءتۇن ورتاسى، جاعادا
جالعىز ءجۇرمىن دالادا،
وت تۇتاتسام، شوقپەنەن،
جۇرەگىم جىلۋ تابا ما
اينالا قاپ قارا تۇڭعيىق،
بۇلبۇل قۇس ءان سالا ما،
سىبىزعىما جان سالسام،
ىشىمدەگى شەر شىعا ما
ايدا باتىپ بارادى،
وت تا ءسونىپ بارادى،
اسپاننان ءتۇسىپ پەرىشتە،
ماڭدايىمنان سيپار ما!
ءبىر كۇي
اق گۇلىم سولىپ قالدى ما
تاپتالىپ قالدىڭ با،
اياق استىندا اق گۇلىم،
گۇلدەردىڭ ىشىندەگى
سۇلەيى ەدىڭ ماڭ گۇلىم.
بوي جازبايسىڭ با،.
كوتەرمەيسىڭ بە ەندى، باسىڭدى،
جادىراتپايسىڭ با، جانىمدى،
قايران دا مەنىڭ جاز گۇلىم!
كوركى دە ەدىڭ،
ءسانى دە ەدىڭ كوك باقتىڭ.
سۇلۋى ەدىڭ،
اپپاعى ەدىڭ گۇلدەردىڭ.
وتىرعىزامىن سول باققا،
سەندەي نازىك ءبىر گۇلدى،
ءبارىبىر بولماس،
اسەرىندەي وتكەن كۇندەردىڭ
قوس ىشەكتىڭ ءبىر سازى
دۇنيەگە قالاي سيارمىن
سارى دالا،
سارى قۇم،
ىستىعىنا ساحارانىڭ
شىدار كىم،
اناۋ جاتقان قۇدىقتىڭ،
ىزعارىنا ءتۇسىپ كەتسەم،
شىدار ما ەم؟،
مىناۋ جاتقان اپانعا،
قۇلاپ كەتسەم،
الاۋىنا قىزىپ كەتسەم،
شىدار ما ەم!؟
“پالەن دەگەن، پالەن جەردە قىزىق بار”
ءبارىن كورسەم،
قىزىعىنا تويار ما ەم!؟
قيالىم عوي، قيالىم،
پەرىشتەم جاتىر ۋاتىپ،
قيالمەن جۇرگەن رياسىز
قۇل پەندەسىن.
بۇل دۇنيەگە قالاي سيامىن!
اپپاق گۇلدەي جان قايدا
سۇلۋلار كوپ،
ارۋلار كوپ،
اپپاق گۇلدەي،
جان قايدا!؟
ءمولدىر شىقتاي،
قاپ قارا تۇنىق،
بۇلاقتاي تازا
كوز قايدا!؟
ءبىر اۋىز ليريكالىق سۋرەت
ءبىرىن ءبىرى تۇر قارىپ
اي ساۋلەسى توگىلىپ تۇر،،
اينالا اپپاق،
ءتۇن جارىق.
ەكى جاس تۇر تال تۇبىندە،
سۇيىسەدى كىل ءۇنسىز.
عاشىقتاردىڭ ءدۇرسىلى مە،
ەستىلەدى جاڭعىرىق.
سەزىم ىستىق،
جۇرەك ىستىق،
جالىنىنا كىم شىدار.
ءتۇن اسىرماي،
تاڭ اسىرماي،
ءبىرىن ءبىرى تۇر قارىپ!
قوبىز كۇيمەن ەمدەسەم
عاشىقپىن مەن اعاشتارعا
جارىلمايتىن،سىنبايتىن
كۇنگە ىستىق، ايازدارعا
شىدايتىن.
عاشىقپىن مەن اق قايىڭعا،
ەمەنگە،
ءبىر عۇمىردىڭ سىناعىنا
قىڭبايتىن.
ارمانىم ەد،
ويىپ جاساۋ ءبىر قوبىز،
سار دالانى ءبىر جاڭعىرتىپ،
سارنايتىن…
سول قوبىزدى
قىل شەرتپەمەن،
ءوزىم تارتسام دەپ ەدىم،
ءىش جارامدى
ماي جاققانداي،
كۇيمەن جازسام دەپ ەدىم…
كۇيىك كۇي
قولىڭدى سوزشى، قولىڭدى بەرشى، قاراعىم
كوپ پەندەدەي كۇناھارمىن،
كۇنالى،
ناپسىگە ەرگەن،
شايتانعا ەرگەن ءدۇرالى.
دوزاققا سالسا،
قازىردە تەز جاناتىن،
كۇناھارمىن،
پەندەسىمىن ءپىرالى.
كۇيدى ءىشىم،
ءىشىپ كەتتىم كۇيىكتەن،
ءتۇسىپ كەتتىم تەسىككە،
اناۋ جارىق، مۇمكىن
شىعار ەسىك پە؟.
پەرىشتەم قايدا،
كەيدە امان ساقتاپ قالاتىن؟،
قولىڭدى سوزشى،
قولىڭدى بەرشى، قاراعىم،
دوزاقتان شىعار،
اناۋ تۇرعان كوپىر مە؟
ءبىر وي، ءبىر ءتۇيىن
الدىمدا تۇر تارازى
الدىمدا تۇر تارازى،
ءبىر جاعىندا قۇمىرىسقا،
ءبىر جاعىندا جۇمىرتقا.
قۇمىرىسقالار ءمىنىپ جاتىر تاباققا،
مىنگەسىپ جاتىر ورمەلەپ،
ءمىنىپ جاتىر ءالى دە سول تاباققا.
باسا المادى قۇمىرىسقالار
سوندا دا جۇمىرتقانىڭ سالماعىن،
اقىلدى دا سالماق بولار قاشاندا،
بىلىمسىزدەر قالادى ەكەن، بەر جاقتا!
بەرەكەلى دالامدى كورۋ ءبىر ارمان
دالام مەنىڭ،
سارى دالام،
سارىارقام!
ەلگە تولى ەد،
مالعا تولى ەد
جون ارقاڭ!
قۋانىشى دا، بەينەتى دە كوپ كەز ەدى،
بەرەكەسى مول جۇرتىمدى كورۋ
ءبىر ارمان!
بايلىققا تولار،
مالعا دا تولار سارىارقام،
ەل امان بولسىن، ەل امان بولسىن،
ەل امان!
ءبىر كەم دۇنيە
بۇ دۇنيە مەن و دۇنيە تارازى
تىلەپ ءجۇرىپ بىرەۋدىڭ كۇندە ولگەنىن.
بىلمەي قاپتى ءوزىنىڭ قالاي ولگەنىن.
كوپ كۇنانى ارقالاعان بۇل پاقىر،
بىلمەي قاپتى ءوزىن قالاي كومگەنىن.
جاتىر دەنە،
جاتىر انە، اق كەنەپكە ورالعان
قاسىندا جوق قارا شايتان جان العان.
بۇ دۇنيە مەن انا دۇنيە تارازى،
وتەر مە ەكەن، التىن بەرسە، امالدان!
الاشتىڭ ارماندارى كوك تۋىمداي جەلبىرەپ
ىزدەرىم قالدى،
سوناۋ توسىننىڭ قۇمدارىندا،
ىزلەرىم بار- تورعايدىڭ دالاسىندا،
جوتاسى مەن سايلارىندا.
ىزدەرىم قالدى دۋلى- شۋلى
ارقالىق قالاسىندا.
ىزدەرىم بار-
سوناۋ كوكتەگى قۇس جولىنداي.
الدىمدا ۇلگى
سىرباي، عافۋ، كەڭشىلىك،
بۇلاقتاردان تازا ءمولدىر باس العام.
سوزدەرىم بار،
تورعايدىڭ قىشتارىندا قاشالعان،
سىرلارىم بار،
ۇلىلاردىڭ قۇدىرەتىنە باس يگەن،
ايتىپ كەلەم، جازىپ كەلەم، جەتكەنشە،
الاشىمنىڭ تۇلعالارىن ۇلىقتاپ،
ارماندارى،
ارماندارى قازاقتىڭ
الدا كەلەدى، كوك تۋىمداي جەلبىرەپ!
پىكىر قالدىرۋ