اقىن ىرىسبەك دابەي كىتاپتارىنىڭ تۇساۋكەسەرى ءوتتى
kerey.kz
وزىندىك قولتاڭباسى بار دارىندى اقىنداردىڭ الدىڭعى قاتارىنداعى ىرىسبەك دابەيدىڭ كەشە قر ۇلتتىق اكادەميالىق كىتاپحاناسىندا «شىق تۇنعان جولدار» اتتى پوەتيكالىق كىتابى مەن «اكەلەرىمىز ايتاتىن اڭگىمە» اتتى ەسسەلەر جيناعىنىڭ تۇساۋكەسەرى ءوتتى.
اقىن ىرىسبەك دابەيۇلىنىڭ جاڭادان جارىق كورگەن ەكى كىتابىنىڭ تۇساۋىن كەسكەن بەكەن قايرات، تالعات كەڭەسبايۇلى، ماقسۇت ءۇزىمۇلى قاتارلى بەلگىلى قالامگەرلەر اقىننىڭ ەڭبەكتەرىنە جوعارى باعا بەرىپ، شىعارماشىلىعىنا شالقار شابىت تىلەدى. كۇمبىرلى كۇي اسەم انمەن ورىلگەن تۇساۋكەسەر راسىمىندە ىرىسبەك دابەيدىڭ ونەردەگى دوستارى قالقامان سارين، باۋىرجان قاراقىزۇلى، ۇلاربەك نۇرعالىم، ەربول بەيىلحان جانە مارجان ەرشۋ، جانار ايلاشوۆا قاتارلى اقىندار اقجارما تىلەكتەرىن ءبىلدىرىپ، جىردان شاشۋ شاشتى. قارىمدى قالامگەردىڭ قاراپايىمدىلىعىنا توقتالعان رۋحاني اعالارى اۋىت مۇقيبەك، ومار تەمىربەكوۆ جانە ادەبيەت سىنشىسى انار قابدوللينا اۆتور شىعارماسىن تارتىمدى تالدادى.
«مەن ىرىسبەك ءىنىمنىڭ بۇل كىتاپتارىن وقىپ شىقتىم. ءاربىر ءسوزى ءمىردىڭ وعىنداي. «وندىققا» ءدال ءتيىپ وتىرادى. مەنىڭشە، ىرىسبەك دابەيدىڭ ءوزىن دە، ءسوزىن دە قازاقى قالىپتا ساقتاپ قالعان ارعى بەتتەگى التايدىڭ قويناۋىنداعى شاعىن عانا شاعانقول دەپ ەسەپتەيمىن. سول شاعىن عانا اۋىلىندا كىسىلىكتىڭ، قازاق بولۋدىڭ، ادام بولۋدىڭ مەكتەبىنەن وتكەن اۆتوردىڭ بۇكىل اڭگىمەلەرى ابايدىڭ قارا سوزدەرى سياقتى باستالادى. تەرەڭ وي ورەدى»،-دەيدى ابايتانۋشى ومار جالەلۇلى.
بۇدان سىرت جازۋشى جۇماباي شاشتايۇلى كىتاپ جايلى ويىن وقىرمانعا: «ىرىسبەك دابەيدىڭ جازۋ مانەرىنىڭ ناقىشىندا ۇلتتىق بوياۋ مول. بايانداۋ ادىسىندە اۆتور استىندە ۇستەمدىك ەتپەستەن كىشىك قالپىن ساقتايدى. اڭگىمەلەۋشى ەلەنبەي قالتارىستا تۇرسا دا اينالا قۇبىلىستى قاپىسىز باعىپ، اينىتپاي جەتكىزۋشى مىندەتىن ءمىنسىز اتقاردى. اۆتوردىڭ الەۋمەتتىك زەردەسى ۇلتتىق ناقىش ارقىلى وزگەشە رەڭ الىپ، ءوربيدى. كوشپەلى ءومىر سالتىنىڭ وزگەشەلىكتەرىن كوكىرەكتە جاڭعىرتىپ، سەزىنە تۇسۋگە يتەرمەلەيتىن قۋاتقا يە. جالپى جازۋدىڭ مىڭ-سان فورماسىنىڭ اراسىنان قازاققا جاقىن تۇرىنە بەيىم ىرىسبەك دابەي سەزىنۋ مەن جەتكىزۋدىڭ دالالىق تابيعاتىنىڭ بوياۋىن ءدال تاپقانداي كورىنەدى. ول بۇل جاعىنان شيىرلاعان ىزدەردەن اۋلاق – قانسونار مەزگىلدىڭ تاپ-تازا ءساتىن ەلەستەتەدى»،-دەپ جەتكىزگەن ەكەن.
ايتا كەتەيىك، ىرىسبەك دابەي 1979 جىلى 2 قازاندا قىتايدىڭ التاي ايماعىنا قاراستى شاعانقول اۋىلىندا دۇنيەگە كەلگەن. جاستايىنان قولىنا قالام ۇستاعان ول 2001 جىلى اتاجۇرتىنا ءبىرجولاتا قونىس اۋدارادى. رەسپۋبليكالىق جانە حالىقارالىق ءمۇشايرالاردىڭ جۇلدەگەرى ىرىسبەكتىڭ بۇدان بۇرىن «ماڭگى ءماجنۇن» جىر جيناعى ءوز وقىرمانىمەن قاۋىشقان بولاتىن. «قازاق ادەبيەتى» گازەتىندە جاۋاپتى حاتشى بولعان اقىن بۇل كۇندە ەلورداسى استاناعا قونىس اۋدارىپ، «استانا اقشامى» گازەتىندە اعا ءتىلشى بولىپ قىزمەت اتقارۋدا.
تۇساۋكەسەر كەشىنەن ارنايى فوتورەپورتاج
فوتو: عابيت ماداليەۆ
adebiportal.kz
پىكىر قالدىرۋ