Aqın Irısbek Däbey kitaptarınıñ twsaukeseri ötti
kerey.kz
Özindik qoltañbası bar darındı aqındardıñ aldıñğı qatarındağı Irısbek Däbeydiñ keşe QR Wlttıq akademiyalıq kitaphanasında «Şıq twnğan joldar» attı poetikalıq kitabı men «Äkelerimiz aytatın äñgime» attı esseler jinağınıñ twsaukeseri ötti.
Aqın Irısbek Däbeywlınıñ jañadan jarıq körgen eki kitabınıñ twsauın kesken Beken Qayrat, Talğat Keñesbaywlı, Maqswt Üzimwlı qatarlı belgili qalamgerler aqınnıñ eñbekterine joğarı bağa berip, şığarmaşılığına şalqar şabıt tiledi. Kümbirli küy äsem änmen örilgen twsaukeser räsiminde Irısbek Däbeydiñ önerdegi dostarı Qalqaman Sarin, Bauırjan Qaraqızwlı, Wlarbek Nwrğalım, Erbol Beyilhan jäne Marjan Erşu, Janar Aylaşova qatarlı aqındar aqjarma tilekterin bildirip, jırdan şaşu şaştı. Qarımdı qalamgerdiñ qarapayımdılığına toqtalğan ruhani ağaları Auıt Mwqibek, Omar Temirbekov jäne ädebiet sınşısı Anar Qabdollina avtor şığarmasın tartımdı taldadı.
«Men Irısbek inimniñ bwl kitaptarın oqıp şıqtım. Ärbir sözi mirdiñ oğınday. «Ondıqqa» däl tiip otıradı. Meniñşe, Irısbek Däbeydiñ özin de, sözin de qazaqı qalıpta saqtap qalğan arğı bettegi Altaydıñ qoynauındağı şağın ğana Şağanqol dep esepteymin. Sol şağın ğana auılında kisiliktiñ, qazaq boludıñ, adam boludıñ mektebinen ötken avtordıñ bükil äñgimeleri Abaydıñ qara sözderi siyaqtı bastaladı. Tereñ oy öredi»,-deydi abaytanuşı Omar Jälelwlı.
Bwdan sırt jazuşı Jwmabay Şaştaywlı kitap jaylı oyın oqırmanğa: «Irısbek Däbeydiñ jazu mäneriniñ naqışında wlttıq boyau mol. Bayandau ädisinde avtor ästinde üstemdik etpesten kişik qalpın saqtaydı. Äñgimeleuşi elenbey qaltarısta twrsa da aynala qwbılıstı qapısız bağıp, aynıtpay jetkizuşi mindetin minsiz atqardı. Avtordıñ äleumettik zerdesi wlttıq naqış arqılı özgeşe reñ alıp, örbidi. Köşpeli ömir saltınıñ özgeşelikterin kökirekte jañğırtıp, sezine tüsuge itermeleytin quatqa ie. Jalpı jazudıñ mıñ-san formasınıñ arasınan qazaqqa jaqın türine beyim Irısbek Däbey sezinu men jetkizudiñ dalalıq tabiğatınıñ boyauın däl tapqanday körinedi. Ol bwl jağınan şiırlağan izderden aulaq – qansonar mezgildiñ tap-taza sätin elestetedi»,-dep jetkizgen eken.
Ayta keteyik, Irısbek Däbey 1979 jılı 2 qazanda Qıtaydıñ Altay aymağına qarastı Şağanqol auılında düniege kelgen. Jastayınan qolına qalam wstağan ol 2001 jılı atajwrtına birjolata qonıs audaradı. Respublikalıq jäne halıqaralıq müşäyralardıñ jüldegeri Irısbektiñ bwdan bwrın «Mäñgi Mäjnün» jır jinağı öz oqırmanımen qauışqan bolatın. «Qazaq ädebieti» gazetinde jauaptı hatşı bolğan aqın bwl künde elordası Astanağa qonıs audarıp, «Astana aqşamı» gazetinde ağa tilşi bolıp qızmet atqaruda.
Twsaukeser keşinen arnayı fotoreportaj
Foto: Ğabit Madaliev
adebiportal.kz
Pikir qaldıru