Europa odağınıñ sırtqı sayasat qızmetiniñ basşısı Jozel Borrel' senbi küni Qazaqstandağı jağdayğa qatıstı pikir bildirip, Europa odağı elge mäseleni beybit jolmen şeşuge kömektesuge dayın ekenin mälimdedi.

“Biz bwl mäseleni beybit jolmen şeşuge kömek qolın sozuğa äzirmiz” dedi EO ökili.

Borrel' adamdardıñ qaza tapqanına ökiniş bildirip, zorlıq-zombılıq aktilerin sınğa aldı. Ol WQŞW men Resey Qazaqstannıñ täuelsizdigin qwrmetteuge şaqırdı.

“Sırttan äskeri qoldau Qazaqstannıñ täuelsizdigi men derbestigin, adam qwqığın saqtau arqılı jüzege asuı tiis. Qazaqstan biligi osı qiın uaqıtta adam qwqığı men azamattardıñ erkindigin, beybit jinalu men oyın erkin aytu qwqığın jäne aqparat alu qwqığın saqtauğa şaqıramız” dedi Borrel'.

• 2 qañtarda Jañaözende halıq swyıtılğan gaz bağasınıñ 60 teñgeden 120 teñgege köterilgenine qarsı şıqqan. Keyin Jañaözendegi narazılıqtı eldiñ basqa aymaqtarı da qoldadı. Ükimet Mañğıstau oblısında gaz bağası elu teñge boladı dep şeşim şığarsa da, narazılıq basılmadı.
• Narazılar eldegi qımbatşılıqtı aytıp, biliktiñ otstavkasın jäne 1993 jılğı Konstituciyanı qaytarudı talap qılğan.
• 5 qañtar tünde Almatıda mıñdağan adam Respublika alañına jinaldı. Policiya olarğa qarsı közden jas ağızatın gaz, rezeñke oq, şulı granata qoldandı. Eldiñ basqa aymaqtarında tünde narazılıq jalğastı. Elde beybit miting qalay tärtipsizdikke wlasıp ketkeni, qaru-jaraqtardı kimder ielengeni, küştik qwrılımdarmen kimder atısqanı jaylı naqtı belgisiz.
• 5 qañtar tüske taman prezident Toqaev ükimet otstavkasın qabıldadı. Eldiñ basqa aymaqtarında Aqtau, Şımkent, Aqtöbe, Öskemen, Semey, Oralda da narazılıq jalğasıp jattı.
• 5 qañtar tüs aua Almatıda tärtipsizdik küşeyip, belgisiz adamdar tobı qala äkimdiginiñ ğimaratı men äuejayğa basıp kirdi. Qala äkimdiginiñ örtke oranğanı körinetin videolar taradı. Almatıda ondağan sauda orındarı, dükender, bankter tonalğanı habarlandı. Toqaev 6 qañtarda Qauipsizdik keñesi jiınında Almatıdağı şabuılğa “terroristik toptardı” ayıptadı. Biraq ol aytqan “terroristik toptardıñ” 2 qañtardan bergi narazılıqqa şıqqandarğa qatısı bar ekenine naqtı dälel joq. ​
• Qazaqstan prezidenti “terroristik banditter” dep atağan adamdardıñ kim ekeni belgisiz. Toqaev olardı bwlay atauğa qanday negiz bolğanın, olardıñ qaydan kelgenin, nege mwnı “agressiya” dep esepteytinin anıq aytpadı. Keyingi künderi Qazaqstanda qanday da bir terrorlıq äreketter, äskeri operaciya bolıp jatqanı jaylı aqparat aytılmağan edi.
• 5 qañtarda elde jağday uşıqqan twsta Toqaev WQŞW-dan kömek swradı. Wyımğa müşe Resey, Armeniya, Belarus' Qazaqstanğa kömekke äsker jiberetinderin mälimdedi. 6 qañtar keşkisin reseylik äskeriler elge jetti.
• Bilik elde tolığımen tötenşe jağday jariyalağan. Internet öte naşar, jii öşiriledi.
• 7 qañtarda Toqaev “sodırlarğa oq atuğa bwyrıq bergenin” mälimdedi. Al 8 qañtarda Nazarbaevtıñ köpten bergi üzeñgilesi, WQK bwrınğı basşısı Kärim Mäsimov “otanğa opasızdıq jasadı” degen ayıppen wstaldı.