Jambıl oblısınıñ Moyınqwm audanınan Kerey hannıñ qıstauı bolğan jer tabıldı. Bwl jañalıqtı ğalımdar tarihi-arheologiyalıq ekspediciya jwmısı kezinde aştı. Qazir olar tolıqqandı aqpar jinau üşin sol jerdi zertteuge kiristi. Arheologtar twñğış ret «Wlı köştiñ jolı» attı jaña karta jasap şığardı. Osılayşa, ğalımdar Qazaq handığınıñ 550 jıldığına eki birdey tıñ jañalıq äzirlep jatır. Ğalımdar uaqıttıñ tığız boluına baylanıstı zertteu jwmıstarın Jambıl jerinen bastadı. Olar Wlı köştiñ Äulieata öñiri arqılı jürip ötken jolınıñ kartasın jasap şıqtı. Onda köştiñ bağıtı, Qazaq handığına qatıstı jer-su atauları, tarihi orındar men arheologiyalıq eskertkişter tüsirilgen. Mahmetqali Sarıbekov, M.H.Dulati atındağı Taraz memlekettik universitetiniñ rektorı: – Talas, Sarısu, Şu jäne Moyınqwm. Osı tört audan boyınşa. Bwl endi negizinen Saudakent pen Qozıbası arasındağı osı kezeñ bolıp tabıladı. Bwl ğılımi twrğıdan qarağanda tarihi jañalıq dep aytuğa boladı. Osı uaqıtqa deyin bwl karta jasalğan joq. Sapar barısında sol kezeñniñ kuäsi bolğan 4 qalaşıq pen 5 tarihi eskertkiş kartağa tüsirilip, ğılımi sipattama jasaldı. Al negizgi jañalıq Moyınqwm audanındağı Han tauında aşıldı. Ğalımdar bwrın-soñdı naqtı ğılımi derektermen negizdelmegen Kerey hannıñ qıstauı bolğan jerdi taptı. Bwl orta ğasırdağı jäne handıq däuirdegi qazaq tarihı üşin tıñ jañalıq bolıp otır. Madiyar Eleuov, ekspediciya müşesi: – Qazaq handığı kezine jatatın, tastan qalanğan 8-9 bölmeden twradı. Qalıñdığı – 2 metr. Tastan qalanğan qabırğası bar. Bwl – qolda bar derek. Sondıqtan osı ekspediciya öziniñ aldına qoyğan maqsatına tolıqtay jetti dep oylaymın. Ekspediciya oralğannan keyin Taraz memlekettik universitetinde «Qazaq handığı mıñjıldıqtar toğısında: tarihi sabaqtastıq jäne qazirgi kezeñ» attı halıqaralıq ğılımi-praktikalıq konferenciya ötti. Jiınğa elimizdiñ jäne Germaniya, Ündistan, Qıtay sındı birneşe memlekettiñ tarihşı ğalımdarı qatıstı. Olar da bwl derekterge asa qızığuşılıq tanıtıp otır. Lin Meycun', Pekin universiteti arheologiya jäne mwrajaytanu institutınıñ professorı: – Konferenciyada estimegen tıñ jañalıqtarmen tanıstım. Öte mañızdı jiın eken. Qazir Qıtay Qazaqstan, odan keyin Orta Aziya elderine öte ülken köñil bölip otır. Äsirese Jibek jolına. Eger qazaq tarihşılarınan birlesip zertteu jwmıstarın jürgizu turalı wsınıs tüsse, quana keliser edim. Qazir ğalımdar Kerey men Jänibek Han tauında jerlenui mümkin degen boljam aytuda. Onı anıqtau üşin arheologtar qayta zertteu jürgizip, ekspediciya saparın jalğastırmaq.

24.kz