Key kezderi ol jay «kişi ğılımi qızmetker» bola qaladı. Sonımen birge, kerek kezinde ädebi sınşı da, öner sınşısı da, jurnalist te, bwqaralıq kommunikaciya boyınşa maman da bola alatın besaspap jigit.

Kreml'di jaqtaytın «Izvestiya» gazetine qanday «sarapşı» qajet bolsa, Eduard Çesnokov sol mamannıñ keypine ene qalatın siyaqtı. Ädebiet institutınıñ tülegi Çesnokovtıñ atı-jönin internetten terip, onıñ soñğı bir jıl işinde jazğandarın süzgiden ötkizip şıqsañız, bwl jigittiñ özgermeytin bir ğana qasietin bayqaysız: ol ökimetke jan-tänimen senedi.

«Aqparattıq kommunikaciya jönindegi sarapşı» röline kirgen ol memlekettik qızmetkerler äleumettik jelidegi öz akkauntında jarnama bermeui kerek degen wsınıstı qoldap:

– Şeneunik – erekşe jauapkerşilik jügi bar adam, ol saylauşı men memlekettiñ özine artqan senimin aqtap, eşkimdi aldamauı kerek, – degen pikir bildirgen.

Endi birde «ädebiet sınşısına» aynalğan ol qaladağı elektriçkalarğa Puşkin şığarmalarınıñ jelisimen graffiti salu turalı wsınısqa baylanıstı pikir aytadı.

– Mamandardıñ salatın suretteri aldın-ala maqwldaudan ötui kerek, – deydi Çesnokov.

Tağı birde «öner sınşısı» retinde pikir aytqan jigitimiz galereyalar men körmelerdegi ekstremizmniñ nasihatına erekşe köñil bölu kerek degen wsınıs bildiredi. «Eñ bastısı – öner Reseydiñ adamgerşilik qağidaların bwzbauı kerek. «Önerdiñ täuelsizdigi» degen wranmen ekstremizmdi nasihattap jürgender – ekijüzdi adamdar, nege ekeni belgisiz, mwnday belsendiler Nemcovtıñ quırşaq müsinin örtemeydi, Amerika jalauın ettartqıştan ötkizbeydi» deydi ol. Mwnda Çesnokov «radikal suretşiler, öner adamdarı tek bilikti sınauğa äzir, esesine oppoziciyağa mülde tiispeydi» degendi meñzep twrsa kerek.

Reseylik ekonomist Sergey Guriev. Parij, 23 qırküyek 2013 jıl.

Osı aptada memlekettik akademiyalıq gumanitarlıq universitettiñ kişi ğılım qızmetkeri retinde söz alğan Eduard Çesnokov reseylik ekonomist Sergey Gurievti YUSAID-tiñ qarajatına dissertaciya jazğanı üşin sınğa aldı.

– Guriev äsirese «bizdiñ ekonomikamız qwrdımğa ketedi» degen mazmwndağı maqalaların jazğanda qanşalıq täuelsiz oy qozğaydı? Professordıñ tereñ ğılımi «twjırımdarın» AQŞ memlekettik departamentiniñ äldebir qızmetkeri auzına salıp berip twrğan joq pa? – degen saual tastaydı Çesnokov.

Resey baspasözi Kreml'diñ sayasatın qolpaştau üşin oydan şığarılğan «sarapşılardıñ» kömegine jüginip twradı.

Bıltır Azattıq radiosı TASS agenttiginiñ bir ötirigin äşkerelegen edi. Resey prezidenti Vladimir Putindi maqtap, Reseydiñ Ukrainadağı äreketterin jaqtap pikir bildirgen germaniyalıq «professor» Lorenc Haagtıñ şın mänisinde akademiyalıq ğılımi därejesi joq bolıp şıqtı. Al ol qızmet isteydi degen «Ğalamdıq kommunikaciya agenttigi» düniede mülde bolmağan.

Nik Şetkonıñ materialı ağılşın tilinen audarıldı.

Azattıq radiosı