Türkiyada äskeriler el basşıların wstap, bilikti qoldarına alğanın aytıp mälimdeme jasadı. Türik telearnası taratqan mälimdemede äskeriler “bilikti basıp alğandarın, eldi “beybitşilik keñesi” basqaratın habarladı.

The Guardian basılımı “türik äskerileriniñ mälimdemesin” tarattı. Onda: “Türik qarulı küşteri bwzılğan konstituciyalıq tärtipti qalpına keltiru üşin, adam qwqığı men bostandığın, zañ biligi men jalpı qauipsizdikti saqtau üşin el biligin tolıqtay qolına aldı. Barlıq halıqaralıq kelisimder küşinde qala beredi. Barşa memlekettermen oñ qarım-qatınas saqtalıp qalarına ümittimiz” dep jazılğan.

Anadolu memlekettik agenttigi bas ştab basşısı Hulusi Akardıñ kepilge alınğanın habarladı. Armiya ökilderi memlekettik telearnadan söyleydi degen mälimet te taradı.

Bosfor bwğazındağı köpirdi jauıp twrğan äsker. Stambul, 15 şilde 2016 jıl.

Al Türkiya prem'er-ministri Binali Yıldırım tärtip ornatılatının, oqiğağa kinäliler “zor jazağa duşar bolatının” ayttı. Onıñ sözinşe, “äskerilerdiñ äreketi – demokratiya men halıq erkine qarsı is”.

El prezidenti Redjep Erdoğan wyalı telefon arqılı mälimdeme jasap, onı jurnalister tikeley tarattı.

 

Hurriyet gazeti dereginşe, eki oppoziciyalıq partiya töñkeristi qoldamaytındarın mälimdegen.

Stambulda qauipsizdik küşteri Bosfor bwğazındağı qalanıñ aziyalıq jäne europalıq böligin jalğap twrğan eki köpirdi jauıp tastağan. Atatürik äuejayı mañında tankter twrğanın telearnalar körsetip jatır. Ol mañda atıs dauısı estilgen. Keybir äue reysteri ondağı äuejayğa qonbay qaytıp jatır.

Stambul köşesindegi äsker. 15 şilde 2016 jıl.

Ankarağa da äsker men tehnika kire bastağan. Reuters dereginşe, Ankara aspanında äskeri wşaqtar men tikwşaqtar wşıp jür. El astanasında “atıs bolıp jatqanın” jergilikti BAQ habarladı. Key derekke qarağanda, qala mañında tank jinalıp twr. Parlament mañında tankten oq atılğan. Äskeri tikwşaq Ankaradağı wlttıq barlau qızmeti ğimaratın mañın atqılağanı da habarlandı.

Bügin Ankaradağı rezidenciyasına oralğan Türkiya prezidenti Rejep Erdoğan «äskeriler büligi basıp tastalğanın» mälimdep, onı wyımdastırğandar «qatañ jazalanadı» dep, bwğan deyin aytqan sözin qaytalağan.

Türkiya prem'er-ministri Binali Yıldırim «bülikti wyımdastırğan» general qaza bolğanı jäne 800-ge juıq adam twtqındalğanı turalı mälimdegen. Türkiya memlekettik aqparat agenttiginiñ habarlauınşa, eldiñ işki ister ministri Efqan Ala bes general men 29 polkovnikti armiya qatarınan bosatuğa bwyrıq bergen.

Türkiyada özderin zayırlı jäne demokratiyalıq memlekettiñ kepilimiz dep sanaytın äskeriler bwğan deyin äldeneşe ret (1960, 1971, 1980 jäne 1997 jıldarı) memlekettik töñkeris jasap, bilikti auıstırğan.

Türkiyada soñğı ret bilikke qarsı iri şara 2013 jılı Stambuldağı Taksim alañında bolğan. Ol kezde şeruşiler policiyamen birneşe ay boyı tiresip, Erdoğannıñ qızmetinen ketuin de talap etken.

AQŞ “Türkiyadağı barlıq sayasi partiyalar eldiñ saylanğan ükimetin qoldap, wstamdılıq tanıtıp, zorlıq-zombılıq pen qantögisten tartınuı kerek” dep mälimdedi.

Resey tarabı “kez kelgen qantögisti qaqtığıstan bas tartıp, bar mäseleni konstituciyalıq twrğıda şeşu kerek” degen pikirde.

Qazaqstannıñ Türkiyadağı elşiligi küşeytilgen tärtipte jwmıs istep jatqanın habarladı. “Stambul men Ankaradağı konsuldıqtar istep twr. Öz derekközderimiz arqılı soñğı jağdaylardı anıqtap jatırmız. Qazaqstan sırtqı ister ministrligi keyinirek resmi mälimdeme jasaydı. Qazaqstan biligi men prezidenti Türkiyadağı jağdaydan habardar” dep mälimdedi diplomatiyalıq mekeme qızmetkeri.

Qazaqstan sırtqı ister ministrligi Türkiya aumağında jürgen Qazaqstan azamattarın sabırlıq pen saqtıq saqtauğa şaqırdı.

“Jağday anıqtalğanğa deyin adam köp şoğırlanatın orındardan aulaq jürip, asa qajettilik tuındamağan jağdaylarda köşege şıqpağan jäne mümkindiginşe tez arada tuıstarı men jaqındarına habarlasqan abzal” delingen SİM baspasöz qızmetiniñ Türkiyadağı jağdayğa qatıstı taratqan tüsiniktemesinde.

Sonımen birge Qazaqstan SİM qosımşa swraqtar tuındağan jağdayda Türkiyadağı diplomatiyalıq jäne konsuldıq mekemelerinde aşılğan «jedel telefon jelisine» baylanısuğa bolatının habarlağan.

Ankaradağı Qazaqstan elşiligi: +90-533-600-6092

Stambuldağı Qazaqstan bas konsuldığı: +90-542-471-2211

Antaliyadağı Qazaqstan konsuldığı: +90-535-418-3532.

Azat Europa / Azattıq radiosı