Mırzağali Aytjanov, bokstan wlttıq qwramanıñ bas bapkeri: SERKEGE ĞANA SENIM ARTAMIZ
kerey.kz
Ötken aptada Almatıda sporttıñ birneşe türi boyınşa konfederaciya kubogı sarapqa salındı. Bokstan konfederaciyanıñ kubogı men 25 million teñge sıyaqısı Mañğıstau oblısınıñ baluandarına bwyırdı. Odan bwrın Pavlodarda eresekter arasındağı el birinşiligi märesine jetti. Qaraşa ayında Reseydiñ Sankt-Peterbor qalasında jastar arasında älem çempionatı dürildep ötti. Wlttıq qwramanıñ bas bapkeri Mırzağali Aytjanov osınday dübirli dodalardan keyin qwrama sapında özgerister bolğanın mälimdedi. Key boksşılar salmağın auırlatıp, özge salmaqqa auıssa, qwrama namısın on jıldan asa uaqıttan beri qorğap kele jatqan tisqaqqan sañlaqtar jastarğa ornın bosattı. “Pavlodarda ötken el çempionatında birneşe boksşımız özderiniñ üyrenşikti salmağınan özgesine auıstı. Endi är salmaqta kim serkelikke jaraydı, senim soğan artıladı” deydi Mırzağali Aytjanov.
– Äñgimeni jaqında ğana ayaqtalğan el çempionatınan bastadıq qoy, bas bapker retinde qalay bağalaysız?
– El çempionatın wyımdastıru jayında eşqanday mäsele joq, Pavlodarda köktemde jastar arasındağı Aziya çempionatı ötkizildi. Sondıqtan bwl öñirde de bokstıñ qarqındı damıp, jastardıñ osı sport türine degen qızığuşılığı kün sanap artıp keledi. Endi el birinşiligi jaylı aytsaq, jastar köp qatıstı. Biz Rio Olimpiadasında medal' alğan boksşılardı el çempionatına qatıstırğan joqpız, olarğa demalıs berdik. Odan sırt Olimpiada duına qosılğan, aldı üş ret jazğı Olimpiadanıñ sınına tüsken täjiribeli boksşılar jastarğa ornın bosatıp, wlttıq qwramadan ketti. Mümkin sodan da şığar, är öñirdiñ bapkerleri el birinşiligine 18-20 jas aralığındağı jas talanttardı köptep qostı. Keybireuleri täjiribeniñ azdığınan, eresekter dodasına alğaş qosılğandıqtan tartınşaqtap jüldege iline almadı. Olardıñ da arasında keleşekte tegeurindi boksşı şığatındarı bar. Albırttığına qaramastan täjiribeli boksşılarğa layıqtı qarsılıq körsete bildi.
– Rio Olimpiadasınıñ qatısuşıları Abılayhan Jüsipov 64 keliden 69 kelige, älem çempionı Jänibek Älimhanwlı 75 keliden 81 kelige auıstı. Bwrın 52 kelide sınğa tüsip jürgen Iliyas Süleymenov 56 kelide bağın sınap kördi. El birinşiliginde Jänibek pen Abılayhan senim üdesinen şığa bildi. Endi olar osı jaña salmaq därjesinde sınğa tüsedi ğoy.
– Jazğı Olimpiada oyındarınan keyin jeke bapkerlerimen aqıldasıp, bwl boksşılar jaña salmaq därejesine auıstı. Endi osı salmaqtıñ mıqtısı bolu üşin barın saluı kerek. Ärine 56 kelide älem çempionatınıñ qola jüldegeri Qayrat Eraliev bar, 69 keli jazğı Olimpiada oyındarında “qazaqtıñ salmağı” atanıp ketkeni ämbege ayan. Älem çempionı, Rio Olimpiadasınıñ jeñimpazı Daniyar Eleusinov bar mwnda. Odan bölek 69 kelide jastar arasında älem çempionı atanğan Sadriddin Ahmedovti de albırttığına qaramay qwrama sapına qabıldadıq. 81 keli de – qazaq üşin oljanı köp bergen salmaq. Kezinde Atlanta Olimpiadasında Vasiliy Jirov 81 kelide altın medal'men birge Vel Barker kubogın ielendi. 81 kelide birneşe jıldan beri Ädilbek Niyazımbetov sınğa tüsip jür. Älem çempionattarında, jazğı Olimpiada oyındarında olja saldı. Keleşekte qalay bolatının tek ring şeşedi. Är salmaqtıñ sañlağın anıqtau atağına, jiğan abıroyına qarap saralanbaydı, biz üşin kim tegeurindi tizgindi soğan wstatamız.– Auır salmaqtağı tüytkildi mäsele şeşilip kele me?
– Jastar bar, biraq olar äli de şikiökpe. Auır salmaqtağı boksşılardıñ sanı artıp kele jatqanı quantadı. Pavlodardağı el çempionatında jüldeger atanğan Nwrlan Saparbay degen bozbalanı da qwramağa qabıldadıq.
– Bükilälemdik boks seriyasınıñ aldağı mausımınıñ jerebesi tartıldı. “Astana arlandarı” klubınıñ boksşıları toptıq kezeñde Resey, Özbekstan, Qıtay elderiniñ boksşılarımen jwdırıqtasadı. Soñğı jıldarı wlttıq qwramanıñ beldi boksşıları da “arlandıqqa” jarap, klubtıñ namısı üşin jekpe-jekke tüsti. Bwl jolı qalay boladı?
– Bükilälemdik boks seriyasınıñ biılğı mausımında klubtıñ bapkerleri men bas menedjeri Serik Säpiev jas boksşılarğa senim artudı jön sanap otır. Jastarğa mümkindik berip, özderin däleldeuine oray tuğızbaq. Ärine, wlttıq qwramanıñ da boksşıları klubtıñ atınan sınğa tüsip, el namısı jolında eşteñeden ayanbaydı. Biz üşin kelesi jıldıñ bastı dodası – Aziya birinşiligi men älem çempionatı. Osı eki dodada boksşılar barın saluı kerek.
– Öziñiz baptap ösirgen Birjan Jaqıpov, Berik Äbdirahmanov, Oljas Sättibaev sındı boksşılar qwramadan ketti. Biraq küni keşe konfederaciya kubogında Berik Äbdirahmanov Mañğıstau oblısınıñ komandasında jwdırıqtasıp, jeñiske jetti.
– Bwlar özderi oylanıp-tolğanıp qwramadağı orındı jastarğa bosatu jaylı baylamğa keldi. Birjan men Berik bıltır AIBA-nıñ ARV jobasında baqtarın sınadı. Osınau jobamen jasasqan kelisimşarttarı bar. Eger de joba biıl da jalğasın tapsa, bwl boksşılar sol jerde şeberlikterin körsetedi.
– Jänibek Älimhanwlı käsipqoy boksqa qatısıp, özin sınap ta kördi. Rio Olimpiadası kezinde de bizdiñ boksşılarğa käsipqoy bokstıñ prmouterleri köz tigip, qızığuşılıq tanıtıp edi.
– Käsipqoy bokstıñ terisin ilep, sol salada jürgen äriptester ayıptay qoymas, biraq käsipqoy boksta Jänibekke qarsılas atanğan boksşınıñ äleueti bizdiñ oğlanmen salıstıruğa mülde kelmeydi. Ekeuinde aspan men jerdey ayırmaşılıq bar. Kezinde özimiz de jwdırıqtasıp, äuesqoy boksta 245 jekpe-jek ötkizdik, AQŞ-qa barıp, käsipqoy bokstıñ mayın işken maytalmandarmen de ringtke küş sınasıp kördik. Jänibek – älem çempionı, Aziya oyındarınıñ jeñimpazı.
AQŞ käsipqoy boksqa qazaqtıñ, orıstıñ, ukrainnıñ boksşıların tartuğa äues. Nege? Öytkeni olar dayın. Mısalı, Jänibekke nege köz tigip jür? Jaña ayttım, älem çempionı atağın ielenu ekiniñ biriniñ qolınan kele bermeydi. Jänibekte mwnday marapat bar. Älimhanwlınıñ äli talayğa jetetinin bilgendikten käsipqoy boksqa qosqısı keletinder köp.
AIBA Rio Olimpiadasında bokstıñ märtebesin köteru üşin käsipqoylardıñ da qatısuına mümkindik berdi. Käsipqoy boksşılardıñ qaysısı Olimpiada çempionı atandı? Eşkim de. Olar käsipqoy ringtke jılına tört-bes jekpe-jek ötkizedi. Al äuesqoylar özderiniñ salmağın ünemi baqılauda wstaydı, üş künde üş jekpe-jek ötkizedi.
– Rio Olimpiadasına äzirlik jürgizgende özge elderdiñ boksşılarımen birlesken oqu-jattığu jiının ötkizdiñizder. Kelesi jılı Aziya qwrlığındağı alaman men älem birinşiligine dayındıqtı qañtar ayınan bastaysızdar. Basqa eldermen tize qosıp dayındıqtan ötu josparda bar şığar.
– Bizge kelip täjiribe almasqısı, üyrengisi keletin elderde qisap joq. Biraq biz olardıñ barlığına maqwl dey almaymız. Qwramanıñ äleuetine qaraymız, boksşıların salmaqtaymız. AQŞ-tıñ wlttıq qwraması bizdiñ elge keluge ınta bildirip otır. Keyinirek Germaniyağa oqu-jattığu jiınına baruımız mümkin. Nemister qolqa salıp şaqırtu jiberdi. Qay elmen birlesip äzirlik ötkizsek te, bizdiñ maqsat – älem çempionatınan qomaqtı oljamen oralu.
Swhbattasqan Q.Rahmet
zhasalash.kz
Pikir qaldıru