Ortalıq Aziyada jaña öñirlik odaq qwru mäselesin qarau kerek. Qazaqstan bwl odaqta jetekşi orınğa ie bolıp, Ortalıq Aziya elderine resmi gumanitarlıq kömek körseter edi. Öytkeni öñirdegi teris ıqpaldardıñ aymaqtağı elderge, sonıñ işindegi Qazaqstanğa da kesirin tigizui mümkin. Mwnday bastamanı bügin QR Parlamentiniñ Mäjilisindegi ükimettik sağatta tömengi palatanıñ halıqaralıq ister, qorğanıs jäne qauipsizdik komitetiniñ törağası Mäulen Äşimbaev köterdi.
Onıñ aytuınşa, öñirde transşekaralıq özenderdiñ resurstarın paydalanu men özge de mäseleler boyınşa jinalıp qalğan problemalar bar. Al öñir elderiniñ özara birlikke keluinen basqa jolı joq.
«Sol sebepti qazir Ortalıq Aziya elderiniñ qauipsizdigin qamtamasız etu üşin ne isteu kerektigin oylau mañızdı. Öñirdegi köptegen problemalar özara tüsinistik arqılı şeşilui kerek. Mäselen, transşekaralıq özenderdiñ resursın paydalanu, ekologiyalıq mäselelerdiñ şeşilui, öñirdiñ tranzittik-baylanıs äleuetin arttıru, terrorizm jäne ekstremizmge qarsı küres mäseleleri. Sol sebepti öñirdegi ıqpaldastıqtı arttırıp, jaña deñgeyge köteru kerek», — dedi deputat.
Deputattıñ pikirinşe, aymaqta jaña öñirlik odaq qwruğa da qajettilik bar.
«Bizdiñ pikirimizşe, Ortalıq Aziya elderiniñ arasındağı baylanıstı retke keltiru kerek. BWW Qauipsizdik keñesi ayasında osı mäseleniñ köterilui kerek. Öz kezeginde QR SİM men özge de tiisti memlekettik organdar ortaaziyalıq elderdiñ özara qatınasınıñ qalay damuı kerektigi turalı saraptap, wsınıs jasauı kerek», — dedi mäjilismen.
Sonımen qatar, Qazaqstannıñ şetelge gumanitarlıq kömek körsetuiniñ mañızdılığına toqtaldı.
«Elimizde problemalar bar kezde özge memleketterge sırtqı kömek jasaudıñ qajettigi joq degen pikirdiñ bar ekenin bilemin. Osı rette damuğa resmi kömek jasau — ol qayırımdılıq emes, yağni basqa elderge birrettik kömekke jatpaydı. Bwl öz kezeginde naqtı sırtqı sayasi maqsattarğa jetu üşin ikemdi tetik bolıp tabıladı. Ekonomikalıq ıntımaqtastıq jäne damu wyımınıñ köptegen elderi osınday sayasattı jürgizip keledi. Sondıqtan da damuğa resmi kömek jasau qadamdarın tereñ wğınıp jasap, sırtqı sayasattıñ basımdıqtarına naqtı oraylastıru kerek», — dedi Äşimbaev.
Osı orayda ol gumanitarlıq kömek jasaudı qısqartu dwrıs emes ekenin, eger de körşiles elder problemalar şırmauınan şığa almay jatsa, eşbir memleket wzaq merzimdi damudan ümittene almaytındığın jetkizdi.
«Ortalıq Aziya twraqsızdıqtıñ, zañsız köşi-qonnıñ, lañkestiktiñ aumağına aynalsa, onda bwnıñ saldarı elimizdegi jağdayğa ıqpal etpey qoymatını anıq», — dedi deputat.
«EGEMEN QAZAQSTAN»
Pikir qaldıru