شوۋ-بيزنيس الەۋمەت

جول كارتاسى: الماتى وبلىسىندا 60 مىڭنان استام جۇمىس ورنى اشىلدى

kerey.kz

 |  Feb 17, 2021

الماتى وبلىسىندا بىلتىر 1051 جوباعا 105 ميلليارد تەڭگە بولىنگەن. جوبا پرەزيدەنت قاسىم-جومارت توقاەۆتىڭ تاپسىرماسى «جۇمىسپەن قامتۋ 2020 جول كارتاسى» اياسىندا اتقارىلعان. باعدارلاما اياسىندا 60 مىڭنان استام جۇمىس ورنى قۇرىلدى. كارانتين كەزەڭىندە جۇمىسىنان بوساپ قالعان ازاماتتاردىڭ دەنى جۇمىسپەن قامتۋ ورتالىقتارى ارقىلى جۇمىسقا ورنالاستىرىلعان.
«باعدارلامانىڭ نەگىزگى مىندەتتەرى: ءوزىن-ءوزى جۇمىسپەن قامتىعانداردى، جۇمىسسىزداردى جانە حالىقتىڭ نىسانالى توپتارىنا كىرەتىن ازاماتتاردى جۇمىسپەن قامتۋعا جاردەمدەسۋ شارالارىن ورىنداۋ، كادرلىق الەۋەتتى دامىتۋ. بيىل ءبىز بۇل سالاعا كوپ كوڭىل بولەمىز»،- دەپ اتاپ ءوتتى اماندىق باتالوۆ.
«جۇمىسپەن قامتۋدىڭ جول كارتاسى» اياسىندا 18 ميلليارد تەڭگەگە 216 اۋىلدىڭ جولى جوندەلدى. ەڭبەككەرلەر جۇمىسپەن قامتۋ ورتالىقتارى ارقىلى جۇمىسقا الىنىپ، ەڭ ازى 85 مىڭ تەڭگە جالاقى الىپ وتىرعان. وسى باعدارلاما ارقىلى جۇمىسقا ورنالاسقان فارحات مانساپبەكوۆتىڭ ايتۋىنشا، بۇل اۋىلداعى جاستاردىڭ ۋاقىتىن ءتيىمدى جۇمساۋىنا مۇمكىندىك بەرەدى.
«مەنى جۇمىسقا شاقىرعان كەزدە قاتتى قۋاندىم. ويتكەنى، قازىر اقشا وتە قاجەت. جالاقى دا جاقسى، جاعداي دا جاقسى، ەڭ باستىسى، ءبىز ءوز اۋىلىمىزعا پايدامىزدى تيگىزەمىز»، – دەدى ول.
جوبا كۇردەلى جوندەۋ، الەۋمەتتىك نىسانداردى قايتا جاڭارتۋ، ەلدى-مەكەندەردى اباتتاندىرۋ، اۋىلدىق جەرلەردە دارىگەرلىك امبۋلاتوريالار، فەلدشەرلىك-اكۋشەرلىك پۋنكتتەر سالۋ سىندى بىرنەشە باعىتتا جۇزەگە اسىرىلىپ جاتىر. ءار اۋدان، قالادا «جۇمىسپەن قامتۋدىڭ جول كارتاسى» اياسىندا كەم دەگەندە 10 جوبا ىسكە اسىرىلادى. جەتىسۋ وڭىرىندە وسى جوبا ارقىلى 60 مىڭداي ادام جۇمىسقا ورنالاسقان. بيىل تاعى جەتى مەكتەپتىڭ قۇرىلىسى باستالادى. ونىڭ التاۋى ءۇش اۋىسىمدى مەكتەپتەردىڭ ورنىنا سالىنباق.
اۆتورى: ايمان اسىل