ۋكراينا پرەزيدەنتى ۆلاديمير زەلەنسكي “ۇلكەن جەتىلىك” ەلدەرى سامميتىنە قاتىسۋ ءۇشىن حيروسيما قالاسىنا بارادى. بۇل تۋرالى Kyodo اگەنتتىگى، سونىمەن بىرگە The New York Times, The Washington Post جانە CNN جاپونيا ۇكىمەتىندەگى دەرەككوزدەرگە سىلتەمە جاساي وتىرىپ حابارلادى.

Reuters اگەنتتىگى بولسا مۇنداي مالىمەتتى ەۋرووداقتاعى دەرەككوزگە سۇيەنە وتىرىپ تاراتتى.

كيەۆ ازىرگە مالىمەتتى رەسمي تۇردە راستاعان جوق.

زەلەنسكي كەڭسەسى پرەزيدەنتتىڭ ساپارلاۋى مۇمكىن ەكەنىن جوققا شىعارمادى، بىراق ء“بارى ۇرىس الاڭىنداعى جاعدايعا بايلانىستى” بولاتىنىن ەسكەرتتى.

Bloomberg مالىمەتىنشە، زەلەنسكي اراب ەلدەرى ليگاسىنىڭ ساۋد ارابياسىندا وتەتىن سامميتىنە قاتىسقان سوڭ، اقش اۋە كۇشتەرىنىڭ اسكەري ۇشاعىمەن جاپونياعا جەتەدى. جاقىندا ۋكراينا پرەزيدەنتى يتاليا، گەرمانيا، فرانتسيا جانە ۇلىبريتانيا ەلدەرىن ارالاپ، كيەۆكە قارۋ-جاراقتىڭ جاڭا پارتياسىن جەتكىزۋگە كەلىسكەن.

زەلەنسكيدى حيروسيماداعى سامميتكە جاپونيا پرەمەر-ءمينيسترى فۋميو كيسيدا بيىل ناۋرىزدا كيەۆكە بارعان ۋاقىتتا شاقىرعان. جاقىندا عانا كيسيدا ۋكراينا پرەزيدەنتى سامميتكە ونلاين قاتىسادى دەگەن. جاپونيا سىرتقى ىستەر مينيسترلىگىنىڭ حابارلاۋىنشا، زەلەنسكي ءسامميتتىڭ جەكسەنبىدەگى وتىرىسىنا ۆيدەوبايلانىس كومەگىمەن قوسىلادى.

ۋكرايناداعى سوعىس جانە كيەۆكە رەسەي باسشىلىعىنا توتەپ بەرۋگە كومەكتەسۋ – دامىعان جەتى مەملەكەت باسشىسىنىڭ كەزدەسۋىندە تالقىلاناتىن ماسەلەلەردىڭ ءبىرى. ءۇش كۇندىك سامميت 19 مامىردا حيروسيما قالاسىندا باستالدى.

ازات ەۋروپا / ازاتتىق راديوسى