Енді үстімізге ағылшынша жазылған жеңіл сөз бен жат елдің жұлдыздары, өзге ұлт пен елдің таңбасы салынған футболкаларды емес, ҚАЗАҚСТАНДА ЖАСАЛҒАН, қазақтың хандары мен батырлары, арыстары мен алыптары, ұлттық салт-дәстүрімізден көріністер және қазақ өмірімен бағзыдан байланысып келе жатқан қыран бүркіт, көк бөрі және жылқы бейнелері өрнектелген жеңіл жейделерді киюімізге мүмкіндік бар.

Аңсаған Мұстафаның Қазақ хандығының 550 жылдығына арнап өткізген көрмесінде осындай 55 ұқсамаған ұлттық үлгідегі жеңіл жейде таныстырылып, олардың суреттері қойылды.
Тарлан тарихтың тау тұлғаларын таңдауда шеберлік танытып, елдіктің тұғырын қазақ өмірімен де байланыстырған суретшінің тілегі ендігі жерде осы жеңіл жейделерді бір адам болса да киіп, киім арқылы өзінің ұлттық рухын көрсетсе екен дейді.
«Бұл көрме Қазақ хандығының 550 жылдығына арналғандықтан суреттерімде тарихта өткен тұғыры биік тұлғаларды, салт-дәстүрді, ұлттық ойындарымызды бейнеледім. Өйткені біздің елдігіміз хандар билігі мен батырлар білегінің күшімен ғана қалыптасқан жоқ, тарихты қалыптастыруда бүкіл қазақ қоғамының рөлі өзгеше. Бес ғасырдың ішінде ата да, бала да, батыр да бар. Ұлттық дәстүріміз бен салтымыз бар. Сондықтан 55 түрлі суретті бір-біріне ұқсамайтын 55 үлгіде салдым. Бұл ойды қуа берсең 500 сурет те салуға болады. Бірақ, мен уәдемді 55 суретке бергеннен кейін осы дүниелер өмірге келді. Суреттерді түрлі-түсті және жеңілдеу етіп жастар жағына бағыттадым»,-дейді А.Мұстафа.

Л.Н.Гумилев атындағы Еуразия ұлттық университетінің әлеуметтік-мәдени даму жөніндегі проректоры Дихан Қамзабекұлы суретші Аңсағанның өнерін жоғары бағалап, жиналған студент жастарды осындай қарапайым түрмен де елге рух сыйлап, ұлтқа үлес қосуға болатынын айтты.
«Отаншылдық пен ұлттық рухты күнделікті тұтынатын тауарларыңыз арқылы жеткізу, қарапайым форматта насихаттау қазіргі қоғам үшін өте маңызды. Аңсағанның суреттерінің бәрінде елге қызмет ету идеясы жатады. Кез-келген рухани дүниені ұлттың мүддесіне сай қылу – Аңсағанның рухани ұстанымы деп білемін. Міне бүгін Аңсаған әрбір адам өз мамандығына сай ұлттық мүддені, елдік рухты көтере алатынын көрсетіп отыр»,-деді ол.

Қазірше елдіктің рухы кестеленген бұл жеңіл жейделер зауытта өндіріліп, сатылымға шықпапты. Авторлық құқығын қорғап, базарға саламын деген кәсіпкерлер шығып жатса қарсы болмайтынын айтқан Аңсаған былай деді:
«Бұл футболкаларды сатпаймын, шығарған да жоқпын. Ондай мүмкіндігім де жоқ. Менікі тек қолымнан келген өнерді осы атаулы мерекеге арнау. Бұл 55 түрлі дизайн «Абай» және «Ұлт» порталдарына қойылатын болады. Кез-келген кісі солардың ішінен өзіне ұнағанын жүктеп алып фотосалондардан шығартып алуларына болады. Кәсіпкерлер көптеп шығаруға ниет танытса қарсы емеспін. Қайта, авторлық құқығым қорғалған күйде базарға шығып жатса қуанамын».

Көрменің тұсаукесеріне Л.Н.Гумилев атындағы Еуразия ұлттық университетінің ректоры Ерлан Сыдықов, «Өрлеу» БАҰО» АҚ Директорлар кеңесінің төрағасы Мұрат Әбенов және саясаттанушы Айдос Сарым мен Қазақстан КВН Одағының президенті Есен Елеукен қатысып, лента қиды. Суретші Аңсағанның қолынан шыққан туынды басылған 55 түрлі жеңіл жейдені киген жастар флешмоб өткізді.

Майгүл СҰЛТАН,

Суретті түсірген Ғабит МАДАЛИЕВ

baq.kz