تۇركيادان كەلگەن تاەكۆوندوشى قازاقستان اتىنان ريوعا بارادى
ءفيليپپيننىڭ مانيلا قالاسىندا تاەكۆوندودان ريو وليمپياداسىنا ازيا قۇرلىعى بويىنشا ىرىكتەۋ جارىسى اياقتالدى.
جارىستىڭ ەكىنشى كۇنى قازاقستان قۇراماسىنان جانسەل دەنيز ريو وليمپياداسىنا جولداماعا يە بولدى. ول شيرەك فينالدا پاكىستاندىق ناجيا راسوولدى، جارتىلاي فينالدا ۆەتنامدىق تحي نگۋەيندى، ال فينالدا وزبەكستاندىق نيگورا تۋرسۋنكۋلوۆانى جەڭىپ، جارىس جەڭىمپازى اتاندى. تۇركيادا تۋىپ-وسكەن جانسەل دەنيز 2014 جىلى قازاقستان ازاماتتىعىن الىپ، قۇراما قاتارىنا قابىلدانعان.
58 كيلوگرامدا سىنعا تۇسكەن 2010 جىلعى ازيا ويىندارىنىڭ كۇمىس جۇلدەگەرى نۇرسۇلتان ماماەۆ شيرەك فينالدا جەڭىلىپ، وليمپيادا جولداماسىنان قۇر قالدى.
وسىلايشا، قازاقستان ريو وليمپياداسىنا ءۇش تاەكۆوندوشى اپارادى. جارىستىڭ العاشقى كۇنى رۋسلان جاپاروۆ پەن اينۇر ەسبەرگەنوۆا وليمپيادا ليتسەنزياسىن يەلەنگەن.
قازىرگى ۋاقىتتا قازاقستان ۇلتتىق قۇراماسىندا 65 وليمپيادا جولداماسى بار. ريوداعى جازعى وليمپيادا ويىندارى بيىل 5-22 تامىزدا وتەدى.
رۋسلان مەدەلبەك
ازاتتىق راديوسى
پىكىر قالدىرۋ