ەزۋتارتار كوز قاراس سۋرەتتەر سويلەيدى
سەنىڭ كىناڭ – سەنىڭ ەلىڭنىڭ 50 ەلدىڭ ىشىندە جوق بولعانىندا…
ارىپتەسىم نۇرتايعا حات!
بۇگىن الاڭعا بارعان ءبىرلى-جارىم بەلسەندىلەرمەن بىرگە سەنى دە ىشكى ىستەر بولىمىنە اياق قولىڭدى جەرگە تيگىزبەي الىپ كەتىپتى دەگەندى ەستىپ قاپا بولدىم. ومون پوليتسايلار فوتواپپاراتىڭدى سالاقتاتىپ، ۆيدەوكامەراڭدى دىرىلداتىپ اۆتوبۋسقا سۇيرەپ سالعاندا نە ويلاعانىڭدى شامالاپ وتىرمىن. قازاقتىڭ ءداستۇرلى مادەنيەتىمەن وسكەن جىگىتسىڭ، ەڭ اۋەلى “باس كەسپەك بولسا دا، ءتىل كەسپەك جوق ەدى، مىنا بيلىكتىڭ بۇ نە قىلعانى” دەگەن وي كەلگەن شىعار. اتا-بابام ءبۇي دەگەن دەپ ايتپاي-اق قوي، بۇ كۇنگى قازاق سياقتىلاردان ءداستۇردى دامەتپە دەپ تالاي ايتتىم. وسى جولى كوزىڭ جەتكەن بولار. ايتپەسە، بايتۇرسىنوۆ اتاڭ ايتپاقشى “حالىقتىڭ كوزى، قۇلاعى ءھام ءتىلى” – كازيت-جورنالدىڭ ءتىلشىسىن قولىن ارتىنا قايىرىپ اكەتەتىن سۇمدىق، و زامان دا، بۇ زامان قاي داستۇرىڭدە بار ەدى؟ بىلگەنگە بۇل – ءبىرجاندى ازنابايدىڭ ەسەرلەرىنە ساباتقانىنان نەسى كەم؟
ءداستۇردى ايتپاعاندا وسى زامانعى مىڭ قۇبىلما زاڭىڭا دا سىيمايدى عوي. سەنى اكەتكەنى – “حالىقتىڭ كوزى كورمەسىن، قۇلاعى ەستىمەسىن، ءتىلى شىقپاسىن، ءبىز بىلگەنىمىزدى ىستەي بەرەيىك” دەگەنى. وتكەندە ازاتتىقتىڭ اقتاۋداعى ءتىلشىسى ءسانيانى جاڭاوزەنگە جىبەرمەي، جولىن بوگەپ سارساڭعا سالعانىن بىلەسىڭ. شىندىقتى ايتاتىن بىرەن-ساران باسىلىمنىڭ تىلشىلەرىن ۋقيت-سۋقيتپەن قامايتىنىن كورىپ ءجۇرسىڭ. سوندىقتان ازنابايدىڭ ساباتاتىنا ىشتەي ءوزىڭ دە دايىنسىڭ. كوپ بولسا ەكى-ءۇش ساعات ۇستايدى، سوسىن جىبەرەدى. نە ءۇشىن ۇستاعانىن ادام سەكىلدى ايتپايدى دا ساعان. بولدى كەت دەيدى، كەتە بەرەسىڭ. نۇرتايدى، نۇرتاي سياقتى رەپورتەرلەردى نەگە ماجبۇرلەيسىڭدەر، ۇيات قايدا، قياس قايدا دەيتىن ەشكىم بولمايدى. ەستۋىمشە الگى ايتا بەرەتىن 50 ەلدە “رەپورتەرگە شەكارا جوق”، “رەپورتەرلەرگە قول تيگىزبەۋ”، ء“سوز بوستاندىعىن شەكتەمەۋ” دەيتىن ۇعىم بار ەكەن. رەپورتەردى ماجبۇرلەمەك تۇگىلى تيەسىلى اقپارات بەرمەسە بيلىگى قىر اسپاي، وماقاسا قۇلايدى ەكەن. سەنىڭ كىناڭ – سەنىڭ ەلىڭنىڭ 50 ەلدىڭ ىشىندە جوق بولعانىندا. سەنىڭ كوپتەگەن تۋىستارىڭ، تانىستارىڭ، جەرلەستەرىڭ، دوستارىڭ، ءتىپتى مەكتەپتە جۇمىس ىستەيتىن ايەلىڭ دە ەلۋ ەلدىڭ ىشىنە كىرگىزە المايتىن ازنابايلاردى جاقسى كورەدى، سايلاۋ سايىن سوعان داۋىس بەرەدى. سوندىقتان كىنا وزىڭنەن دە بار. ەندى ماتشاعا تاۋفيق بەرگەنشە وسى كورگەنىڭ كورگەن. پوليتسايلار ءداتى جەتىپ 15 كۇنگە جاپسا، ىستىق تاماق اپارامىن. ءداتى جەتپەسە، كەشكى اسىڭ كەمپىرىڭنەن. ەش ۋايىمداماعىن.
ايتپاقشى، مەرەكەڭ قۇتتى بولسىن! وتان قورعاۋ دەگەن وسىلاي وت پەن سۋ، اباقتىدان باستالعان:)
اسىلحان ماماشۇلىنىڭ facebook پاراقشاسىنان الىندى
پىكىر قالدىرۋ