Ezutartar Köz qaras Suretter söyleydi
Seniñ kinäñ – seniñ eliñniñ 50 eldiñ işinde joq bolğanında…
Äriptesim Nwrtayğa hat!
Bügin alañğa barğan birli-jarım belsendilermen birge seni de işki ister bölimine ayaq qolıñdı jerge tigizbey alıp ketipti degendi estip qapa boldım. OMON policaylar fotoapparatıñdı salaqtatıp, videokamerañdı dırıldatıp avtobusqa süyrep salğanda ne oylağanıñdı şamalap otırmın. Qazaqtıñ dästürli mädenietimen ösken jigitsiñ, eñ äueli “bas kespek bolsa da, til kespek joq edi, mına biliktiñ bw ne qılğanı” degen oy kelgen şığar. Ata-babam büy degen dep aytpay-aq qoy, bw küngi qazaq siyaqtılardan dästürdi dämetpe dep talay ayttım. Osı jolı köziñ jetken bolar. Äytpese, Baytwrsınov atañ aytpaqşı “halıqtıñ közi, qwlağı häm tili” – käzit-jornaldıñ tilşisin qolın artına qayırıp äketetin swmdıq, o zaman da, bw zaman qay dästüriñde bar edi? Bilgenge bwl – Birjandı Aznabaydıñ eserlerine sabatqanınan nesi kem?
Dästürdi aytpağanda osı zamanğı mıñ qwbılma zañıña da sıymaydı ğoy. Seni äketkeni – “halıqtıñ közi körmesin, qwlağı estimesin, tili şıqpasın, biz bilgenimizdi istey bereyik” degeni. Ötkende Azattıqtıñ Aqtaudağı tilşisi Säniyanı Jañaözenge jibermey, jolın bögep sarsañğa salğanın bilesiñ. Şındıqtı aytatın biren-saran basılımnıñ tilşilerin uqit-suqitpen qamaytının körip jürsiñ. Sondıqtan Aznabaydıñ sabatatına iştey öziñ de dayınsıñ. Köp bolsa eki-üş sağat wstaydı, sosın jiberedi. Ne üşin wstağanın adam sekildi aytpaydı da sağan. Boldı ket deydi, kete beresiñ. Nwrtaydı, Nwrtay siyaqtı reporterlerdi nege mäjbürleysiñder, wyat qayda, qiyas qayda deytin eşkim bolmaydı. Estuimşe älgi ayta beretin 50 elde “reporterge şekara joq”, “reporterlerge qol tigizbeu”, “söz bostandığın şektemeu” deytin wğım bar eken. Reporterdi mäjbürlemek tügili tiesili aqparat bermese biligi qır aspay, omaqasa qwlaydı eken. Seniñ kinäñ – seniñ eliñniñ 50 eldiñ işinde joq bolğanında. Seniñ köptegen tuıstarıñ, tanıstarıñ, jerlesteriñ, dostarıñ, tipti mektepte jwmıs isteytin äyeliñ de elu eldiñ işine kirgize almaytın Aznabaylardı jaqsı köredi, saylau sayın soğan dauıs beredi. Sondıqtan kinä öziñnen de bar. Endi matşağa taufiq bergenşe osı körgeniñ körgen. Policaylar däti jetip 15 künge japsa, ıstıq tamaq aparamın. Däti jetpese, keşki asıñ kempiriñnen. Eş uayımdamağın.
Aytpaqşı, merekeñ qwttı bolsın! Otan qorğau degen osılay ot pen su, abaqtıdan bastalğan:)
Asılhan Mamaşwlınıñ facebook paraqşasınan alındı
Pikir qaldıru