سالىستىرۋ
ستامبۋلدىڭ 17 ميلليونداي حالقى بار. ءبىر مەر، ءبىر باس حاتشى مەن جەتى ورىنباسارى 26 دەپارتامەنت ديرەكتورىن جۇمساپ ەركىن باسقارىپ وتىر. مەر قالانىڭ اۋزى دۋالى اقساقالدارىنان باستاپ، ەتى ءتىرى كاسىپكەرلەرىنە دەيىنگى كوزى قاراقتى جاميعاتىن جاقسى تانيدى. جوندەلىپ جاتقان جولدىڭ، سالىنىپ جاتقان ءۇيدىڭ ەسەبىن بىلەدى. قاي مەشىتتە قانداي ۋاعىز ايتىلاتىنىنان، قاي تەاتردا قانداي سپەكتاكل قويىلاتىنىنان قال-قادارىنشا حاباردار. نازارىنا ىلىنبەي قالعان جايتتاردى ءار سالا بويىنشا ورىنباسارلارى ەكىباستان جەتىك بىلەدى دەگەندەي. الەمدىك ءىرى تۋريزم ورتالىعى سانالاتىن، كۇن سايىن ونداعان مىڭ ساياحاتشى قابىلدايتىن قالاداعى ديناميكالىق دامۋ مەن ەكونوميكالىق ءوسۋ تۋرالى ايتپاي-اق قويايىن.
ەندى 17 ميلليونداي حالقى بار كەيبىر مەملەكەتتى پرەزيدەنت پەن ونىڭ تۇتاس ءبىر اكىمشىلىگى، اكىمشىلىك جەتەكشىسى مەن الگىنىڭ ءسۇرىنىپ-قابىنىپ جۇرگەن ورىنباسارلارى، پرەمەر مەن ونىڭ الىپ ۇكىمەتى ءھام كانتسەليارياسى، ۆيتسە-پرەمەرلەر مەن مينيسترلەر ءھام ولاردىڭ شۇبىرعان ورىنباسارلارى، ونداعان وبلىس اكىمى مەن ولاردىڭ جۇزدەگەن ورىنباسارى ءھام اپپارات جەتەكشىسى، جۇزدەگەن قالا مەن اۋدان اكىمى جانە ولاردىڭ وزدەرىنەن بىرنەشە ەسە كوپ ورىنباسارلارى، مىڭداعان كومەكشىسى، قيسابىنا قيال جەتپەيتىن دەپارتامەنت ديرەكتورلارى، ولاردىڭ شوپىرسىز جۇرە المايتىن ورىنباسارلارى، وسىنشاما ادام ءبىر-بىرىنە سىلتەي قول قويىپ تومەنگە سىرعىتاتىن حالىقتىڭ ارىز-وتىنىشىنە كالكا تىلىندە تۇسىنىكسىز جاۋاپ حات جازۋمەن اينالىساتىن قاراسى قالىڭ باس ماماندار، جانە وسىناۋ الىپ ماحوۆيكتى اينالدىرۋعا وزىنشە ۇلەس قوسىپ اكىمنىڭ بايانداماسىن جازىپ جۇرگەن كەڭەسشىلەر مەن شاي تاسىپ جۇرگەن سانسىز سەكرەتارشالار ارمياسى “باسقارىپ” وتىر. بۇل بيلىكتىڭ ورتالىق تارماعى تۇرماق، وبلىستىق دەڭگەيدەگى باسشىلارى مەن ورىنباسارلارى ەل ىشىندەگى ءبىر ماسەلەمەن تانىسۋعا ساۋ ەتىپ كەلە قالعاندا سوڭىنداعى نوكەرلەرىنىڭ شاڭى ءبىر اپتاعا دەيىن تاراماي تۇرادى. الگى وبلىستىق اكىم-قارا (پرەزيدەنت بىلاي قالسىن) جىلىنا جۇزدەگەن مىڭ ليتر بەنزين جاعىپ دجيپتەرىمەن قۇيىنداتا قۇيعىتىپ جۇرگەندە قاراماعىنداعى ءار اۋىلدان ءبىر-ءبىر بەلسەندىنىڭ بولسىن اتىن جاتتاپ تا ۇلگەرمەي قىزمەتتەن كەتىپ جاتادى.
وسى ءبىر شابارماندار شاپقىنشىلىعىنا ۇشىراعان ەلگە قاراپ وتىرىپ، “قانشا دەگەنمەن مەملەكەتتىڭ تەرريتورياسى قالادان ۇلكەن بولادى، باسقارۋشىعا دا بارىپ-كەل، شاۋىپ-كەلسىز قيىن عوي” دەپ ىشتەي ءۋاج تاپقانسيمىن. بىراق اتقارۋشى بيلىكتىڭ تەرريتورياعا ەمەس، ناقتى ادامعا قىزمەت ەتەتىنى ويىمنان شىقپايدى. “اينالىپ كەلگەندە الدارىنداعى ادام سانى 17-اق ميلليون عوي؟” دەيدى ىشكى داۋىسىم. ال ەندى ول قيسىندى ارى كەتسە جارتى-اق ميلليون حالقى بار وبلىستى باسقارىپ وتىرسا دا، ات ۇستىندە شىرەنگەندە ۇزەڭگى شىداتپايتىن “قايراتكەرلەرگە” ءھام ولاردىڭ ءنوپىر نوكەرلەرىنە ۇقتىرىپ كورىڭىز.
عالىم بوقاشتىڭ facebook پاراقشاسىنان الىندى
پىكىر قالدىرۋ