Jahan jañalıqtarı Mädeniet Äleumet
QIINDIQTAN KIİZ QWTQARĞAN AUIL
Amerikanıñ National Geographic jurnalında jariyalanğan «Zarşığanaq auılınıñ kiizşi qazaq äyelderi» degen maqalada Sovet odağı ıdırap, künköris qiındağannan keyingi zamanda Pavlodar oblısındağı şağın auıl äyelderiniñ tiimdi biznesti qalay bastağanı bayandalğan. «Ekonomikalıq qiındıqtar men Sovet odağınıñ josparlı ekonomikasınıñ küyreui Zarşığanaq twrğındarın qıspaqta qaldırdı, biraq narıqtıq qatınastar tolqını olardıñ jağalauına da jaylap jetti. [Auıl twrğını Qalimaş Baymwhanova] men onıñ körşileri üy janındağı uçaskelerinde kökönis ösirip, qoralı qoy men iri qara bağıp, tirşilik üşin küreske köşti. Özge närse satıp aluğa olardıñ aqşası bolmadı» dep jazadı National Geographic.
1990 jıldardıñ ayağında Zarşığanaq auılına pavlodarlıq biznesmen Arman Swltanbek barğan. Onıñ eti tiri azamattarğa üyden şıqpay-aq käsip aşuğa bolatını jaylı ötkizgen seminarı Qalimaştıñ ömirine özgeris äkeldi. Ol auıl äyelderine qoy jüninen kiiz basıp, odan sırmaq, tekemet tärizdi türli bwyımdar jasap, satuğa bolatının wqtı. Bwrın kiizben jwmıs istep körmegen Qalimaş jergilikti äyelderge kiiz isiniñ qır-sırın üyretu üşin Oñtüstik Qazaqstannan birneşe şeber şaqırğan.
«2002 jılı auılda olardıñ alğaşqı kiiz basu sabaqtarı nemese jazğı lageri ötti. Auıl äyelderi 10 kün boyı jünnen tekemet basudı, kiizden ayaq kiim men qalpaq jasaudı üyrendi. Olar kündelikti problemaların wmıtıp, jwmıstıñ qızığına berildi. Dımqıl jünniñ iisi ata-babaların eske tüsirdi. Äuelde bwl bastamadan birdeñe şığarına senbegen küyeuleri de üstel qwrastırıp, jün jinauğa kömektesip jwmısqa aralasqan, al bireui tipti tañğı dene jattığuların ötkizip twrğan» dep jazadı National Geographic.
Biraz täjiribe jinap, töselgennen keyin äyelder kiizden köptegen bwyımdar jasap, Qalimaş olardı Pavlodardıñ bazarına aparıp satqan. Jwrt älgi bwyımdardan tük qaldırmay satıp alıp ketken. Bwl bastamanı qoldaytın demeuşi tauıp, äyelderdi äri qaray üyretu jäne tapqan aqşanıñ bir böligin damu jobalarına jwmsau üşin Qalimaş qoğamdıq birlestik qwrğan. Birlestikti «wzaq qıstıñ qwrsauınan bosağan dalada jandana bastağan tirşiliktiñ alğaşqı jarşısı – bäyşeşek güline» wqsatıp «Jauqazın» dep atağan.
Azattıq radiosı
Pikir qaldıru