ماسكەۋ كەنەسارى حاننىڭ باسىن قايتارۋ جايىن قاراستىرماق
كارىم ءماسىموۆ دميتري مەدۆەدەۆپەن كەنەسارى حان مەن كەيكى باتىردىڭ باسىن قايتارۋ ماسەلەسىن تالقىلادى.بۇل تۋرالى قازاقستان پرەمەرىنىڭ رەسمي سايتىندا حابارلاندى.
قر پرەمەر-ءمينيسترى كارىم ءماسىموۆ ءوزى ۋادە ەتكەندەي، رف ۇكىمەت توراعاسى دميتري مەدۆەدەۆپەن كەزدەسۋى بارىسىندا وتكەن ءجۇز جىلدىقتاعى ۇلت-ازاتتىق قوزعالىستىڭ كوشباسشىلارى كەنەسارى حان مەن كەيكى باتىردىڭ مۇردەلەرىن ەلگە قايتارۋ تۋرالى ماسەلەنى كوتەردى.
دميتري مەدۆەدەۆ بۇل ماسەلەنى انىقتاپ، شەشۋ ءۇشىن قاجەتتى تاپسىرمالار بەرەتىنىن ايتتى.
«مەن اۋىزشا جانە ەگەر قاجەت بولسا، جازباشا تاپسىرما بەرىپ، بۇل ماسەلەنىڭ انىق-قانىعىن انىقتايتىن بولامىن»، – دەپ جاۋاپ بەردى د.مەدۆەدەۆ ك.ءماسىموۆتىڭ ۇلت كوسەمدەرىنىڭ مۇردەلەرىن كومۋ ءۇشىن قازاقستانعا قايتارۋ تۋرالى وتىنىشىنە.
بۇدان بۇرىن كارىم ءماسىموۆ دميتري مەدۆەدەۆپەن اتالمىش جادىگەردى قايتارۋ تۋرالى ماسەلەنى تالقىلايتىنى تۋرالى ءوزىنىڭ تۆيتتەرىندە جازعان ەدى.
قازاقستان ءۇشىن اسا قۇندى جادىگەردى كەڭەس داۋىرىنەن بەرى قايتارۋعا بىرنەشە مارتە ۇمتىلىس جاسالدى. سوڭعى كەزدەرى بۇل تاقىرىپ، اسىرەسە، الەۋمەتتىك جەلىلەردە ءجيى كوتەرىلە باستادى. ماسەلەن، قازاقستاندىق نۇرلان امىرەقۇلوۆ Facebook الەۋمەتتىك جەلىسىندە وسى تاقىرىپتاعى پوستىن جاريالادى.
رەسەيلىك ارىپتەسىمەن كەزدەسۋ كەزىندە كارىم ءماسىموۆ استانادا وتەتىن XIII ايماقارالىق ىنتىماقتاستىق فورۋمىنا قاتىستى ماسەلەلەردى دە تالقىلادى. اتاپ ايتقاندا، باتىس ەۋروپا-باتىس قىتاي ءتارىزدى ءىرى كولىك جوبالارىن جۇزەگە اسىرۋ بارىسى ءسوز بولدى. جايىق ترانسشەكارالىق وزەنىنە قاتىستى تاقىرىپقا باسا نازار اۋدارىلدى. پرەمەر-مينيستر بۇل ماسەلە بويىنشا ۇكىمەتارالىق كەلىسىمگە قول قويۋدى ۇسىندى.
سونىمەن قاتار لوگيستيكا، شەكارا ماڭى ىنتىماقتاستىعى جانە ناقتى ەكونوميكا سالاسىنداعى باسقا دا ماڭىزدى ماسەلەلەر بويىنشا وزەكتى تاقىرىپتار تالقىعا سالىندى.
دميتري مەدۆەدەۆ كورشىلەس مەملەكەتتەردىڭ ەكىجاقتى قارىم-قاتىناسى تۇراقتى ءارى جوعارى دەڭگەيدە ەكەنىن اتاپ ءوتتى.
پىكىر قالدىرۋ