ەلەۋسىنوۆ “قازاقستان سالماعىندا” التىن الدى
بوكستان 69 كيلوگرامدا قازاقستان بوكسشىسى دانيار ەلەۋسىنوۆ وليمپيادا چەمپيونى اتاندى. قازاقستان بۇل سالماقتا ءتورتىنشى وليمپيادا قاتارىنان ۇزدىك شىقتى.
قازاقستان ءتورتىنشى وليمپيادا قاتارىنان بوكستان 69 كيلوگرامم سالماقتا التىن مەدال يەلەندى. فينالدا دانيار ەلەۋسىنوۆ وزبەكستاندىق 23 جاستاعى شاحرام گياسوۆتى جەڭدى. ءۇش تورەشى دە ءبىرىنشى، ەكىنشى راۋندتا باسىم ۇپاي سانىن قازاقستان بوكسشىسىنا، ءۇشىنشى راۋندتا وزبەكستان سپورتشىسىنا بەردى.
ەلەۋسىنوۆ قورعانا ءجۇرىپ قارسى شابۋىلعا شىعىپ، كوبىرەك ءدال سوققى جاساۋمەن بولدى. جارتىلاي فينالدا قارسىلاسىنىڭ باسى سوعىلىپ، ماڭدايىنا جاراقات سالعان قازاق بوكسشىسىنىڭ اقتىق جەكپە-جەكتە بارىنشا ساقسىنعانى دا بايقالدى.
بۇل سالماقتا افينادا باقتيار ارتاەۆ، پەكيندە باقىت سارسەكباەۆ، لوندوندا سەرىك ساپيەۆ چەمپيون اتانعان. سپورت ماماندارى مەن جانكۇيەرلەر اراسىندا “69 كيلوگرامم – قازاقستاننىڭ سالماعى” دەگەن ءسوز دە قالىپتاسىپ كەتكەن. BBCمەن Daily Mail سياقتى ۇلىبريتانيالىق باسىلىمدار دا قازاقستاننىڭ سوڭعى ءتورت وليمپيادا ويىندارىندا ءدال وسى سالماقتا جەڭىمپاز بولعانىن اتاپ ءوتتى. وزبەكستاندىق رەسمي باق-تاردىڭ ءبىرى ەلەۋسىنوۆتى ء“ۇش راۋندتا دا جەڭىسكە جەتتى” دەپ حابارلادى.
ريوداعى رينگتە رەفەري ەلەۋسىنوۆتىڭ قولىن كوتەرگەن ساتتە بوكسشى قۋانعاننان ءبىر سەكىرىپ، قارسىلاسىن قۇشاقتاپ قۇرمەت قىلدى. كورەرمەندەرگە ءيىلىپ ىزەت قىلعاسىن، قازاقستان تۋىن جامىلىپ الىپ، زالدى اينالىپ شىقتى. ەلەۋسىنوۆ ءوزىن القالاعان توپتىڭ ىشىندە الدىمەن لوندون وليمپياداسىنىڭ چەمپيونى سەرىك ساپيەۆتىڭ قولىن الدى دا، بارلىق جانكۇيەرلەردىڭ قۇشاعىنا ەنىپ كەتتى. بوكسشى ماراپاتتاۋ راسىمىندە ءانۇراندى تولىق ايتىپ، كوزىنە جاس الىپ تۇردى.
- قارسىلاسىم ەكى راۋند جەڭىلىپ جاتقانىن ءبىلىپ ءۇشىنشى راۋندتا دورەكى بوكستاسا باستادى. بۇل – مەنىڭ عانا ەڭبەگىم ەمەس. باپكەرلەر مەن دارىگەرلەردىڭ دە ەڭبەگى. سپورتتان كەتەم بە، كەتپەيمىن بە ءالى بىلمەيمىن. ءبىراز ەس جيىپ الايىن. قازىر ول تۋرالى ويلايتىن شامام دا جوق. لەۆيتتىڭ جەڭىلىسىن بىلەمىز. بىراق فينال الدىندا جامان نارسە ويلامادىم. بەرمەي قويسا بۇيىرعانى دەپ ويلادىم، – دەدى بوكسشى.
“جاراقاتى اۋىر بولدى”
ەلەۋسىنوۆ جارتىلاي فينالدا سۋلەيمەن سيسسوكومەن بوكستاسىپ جاتقاندا قارسىلاسىنىڭ باسى ءتيىپ، ماڭدايى مەن قاباعىن جىرتىپ العان. بوكسشىنىڭ اكەسى ءارى جەكە باپكەرى مارات ەلەۋسىنوۆ “ۇلىمدى جاراقاتىنا بايلانىستى فينالعا شىعارماي قويار” دەپ قاۋىپتەنگەن.
- جاراقاتى وتە اۋىر بولدى. قاباعى 10 سانتيمەتردەي جىرتىلىپ كەتتى. كوزىنە جەتىپ قالعان ەدى. دارىگەرلەر الدىمەن ىشىندەگى ەتىن تىگىپ الدى. ودان كەيىن سىرتىن تىكتى. قاتتى سوققى تيسە تىككەن جەرى قايتا جىرتىلىپ كەتەر ەدى. جاراقات العان ماڭدايىن دا ساقتاپ ءجۇردى. وزبەكستان بوكسشىسى العا ءجۇرىپ شابۋىلدايدى. سوندىقتان دانيار قورعانا ءجۇرىپ جىلدام قوزعالىپ، قارسىلاسى شابۋىلداعاندا كۇتىپ الىپ سوققى دارىتۋ كەرەك بولدى. باستىسى – ءۇمىتىمىزدى اقتادى، – دەدى بوكسشىنىڭ اكەسى ازاتتىق تىلشىسىنە.
دانيار ەلەۋسىنوۆ ايتۋىنشا، “جاراقاتىن ەمدەۋگە قۇرامانىڭ دارىگەرلەرى مەن AIBA دارىگەرلەرى بىرىگىپ كومەكتەسكەن”.
“كاپيتان رەتىندە التىن الۋ مىندەت بولدى”
ال قازاقستان قۇراماسىنىڭ باس باپكەرى مىرزاعالي ايتجانوۆ فينالدان كەيىن ۇزاق قول سوعىپ، كەيىن بوكسشىنىڭ بەتىنەن ءسۇيدى. باپكەردىڭ قۋانعاننان كوزىنە جاس العانى دا بايقالىپ تۇردى.
دانيار ەلەۋسىنوۆ – سەرىك ساپيەۆتەن كەيىن وليمپيادادا جانە الەم چەمپيوناتىندا التىن العان ەكىنشى قازاق.
- بۇل – ۇلكەن جانە كوپ ەڭبەكتىڭ ناتيجەسى. وليمپيادا – بەيبىت كۇندەگى تارتىس. دانياردىڭ الدىندا ۇلكەن ميسسيا تۇردى. ونىڭ الدىندا كوماندا كاپيتانى رەتىندە چەمپيون اتانۋ مىندەتى تۇردى. دانيار ەلەۋسىنوۆ – سەرىك ساپيەۆتەن كەيىن وليمپيادادا جانە الەم چەمپيوناتىندا التىن العان ەكىنشى قازاق. فينال وتەتىن كۇنى تاڭعى جەتىدە جارىستى اياقتاعان بوكسشىلار بار، ەندى كەزدەسۋگە شىعاتىندارى بار بارلىعى تۇرىپ دانياردىڭ دايىندىعىنا كومەكتەستى. كوماندا بولىپ دايىندالدىق. كەزدەسۋ الدىندا بارلىعىمىز “باسقا بوكسشىلاردىڭ كەتكەن ەسەسىن سەن قايتار” دەپ ساتتىلىك تىلەگەنبىز. دانيار – ايلا-ءتاسىلى مول بوكسشى. وعان بارلىق قارسىلاسى دايىندالىپ كەلگەنى انىق. بىراق ول وليمپيادادا ۇراتىن جەردە ۇرىپ، قاشاتىن جەردە قاشىپ، ساۋاتتى بوكستاستى، – دەدى ايتجانوۆ.
جۋرناليستەر سپورتشىلار مەن باپكەرلەردەن سۇحبات الاتىن ميكس-زونادا وزبەكستان بوكسشىسى كەلىپ، تىلشىلەرمەن سويلەسىپ تۇرعان ايتجانوۆتى “لايىقتى جەڭىس، قۋانىشتىمىن” دەپ قۇتتىقتادى. ال جارتىلاي فينالدا ەلەۋسىنوۆتەن جەڭىلىپ، قولا العان فرانتسيالىق سيسسوكو “ول جەڭىسكە لايىقتى بولدى، چەمپيون. جاراقات ءۇشىن كەشىرىم سۇرايمىن” دەدى.
ەلەۋسىنوۆتىڭ التىن مەدالىنەن كەيىن ءۇش التىن، ءۇش كۇمىس، التى قولامەن قازاقستان جالپى ەسەپتە 20-ورىننان 17-ورىنعا كوتەرىلدى.
بۇعان دەيىن اۋىر اتلەتيكادان نيجات راحيموۆ پەن جۇزۋدەن دميتري بالاندين التىن جۇلدە العان. جازيرا جاپپارقۇل (اۋىر اتلەتيكا) مەن ەلدوس سمەتوۆ (دزيۋدو) كۇمىس مەدال ەنشىلەگەن. گالبادراح وتگونتسەتسەگ (دزيۋدو), كارينا گوريچەۆا مەن فارحاد حاركي (ەكەۋى دە – اۋىر اتلەتيكا), ولگا رىپاكوۆا (جەڭىل اتلەتيكا), ەلميرا سىزدىقوۆا (ايەلدەر كۇرەسى) قولا مەدال يەلەنگەن. قازاقستان 17 تامىزداعى كوماندالىق ەسەپتە 17-ورىندا تۇر.
رۋسلان مەدەلبەك
“ازاتتىق” راديوسى
پىكىر قالدىرۋ