الماتىدا بانك قىزمەتكەرىنىڭ ولىمىنە قاتىسى بار كۇدىكتى قاماۋعا الىندى
الماتىدا 28 جاستاعى نۇرشات روزيەۆتىڭ ولىمىنە قاتىسى بار كۇدىكتى قاماۋعا الىندى، – دەپ حابارلايدى Tengrinews.kz تىلشىسى قالالىق سوتتىڭ ءباسپاسوز قىزمەتىنە سىلتەمە جاساپ.
“الماتى قالالىق تۇركسىب اۋداندىق سوتىنىڭ شەشىمىمەن 1994 جىلى دۇنيەگە كەلگەن ب.ج. ەسىمدى كۇدىكتى قاماۋعا الىندى. ول الدىن الا كەلىسىم بويىنشا قىلمىس جاساعانى ءۇشىن كۇدىكتى دەپ تانىلدى”، – دەپ حابارلادى قالالىق سوتتىڭ ءباسپاسوز قىزمەتىندەگىلەر. ايتا كەتەيىك، كۇدىكتى ەكى ايعا – 2016 جىلدىڭ 14 قاراشاسىنا دەيىن قاماۋعا الىندى.
وسىعان دەيىن الماتىدا بانك قىزمەتكەرىنىڭ جوعالىپ كەتكەنى حابارلانعان بولاتىن. قازاقستاندىق بانكتەردىڭ بىرىندە بولىمشە باسشىسى بولىپ قىزمەت ەتەتىن ونى سوڭعى رەت 3 قىركۇيەكتە كەشكى 18.00 شاماسىندا كورگەندەر بار. ول جاتتىعۋدان كەيىن ۇيىنە قايتىپ كەلە جاتقان. كەلەسى كۇنى تاڭعى ۋاقىتتا كورشىلەرى روزيەۆ تۇراتىن ۇيدەن ءورت شىققانىن بايقاعان. ءورت ءسوندىرىلىپتى، بىراق ءۇي يەسى مەن ونىڭ كولىگى بولماعان.
ال 11 قىركۇيەكتە الماتىدا ءىز-ءتۇسسىز جوعالىپ كەتكەن بانك قىزمەتكەرىنىڭ دەنەسى تابىلعان ەدى.
پىكىر قالدىرۋ