ارداقتى تۋىستار، باۋىرلار! تاعدىرلاس، تىنىستاس اعايىن!
تۇرسىنحان زاكەنۇلى
كەشەلى بەرگى سۇم حابار ءبارىمازدىڭ قابىرعامىزدى قايىستىرىپ، شاراسىز جاعدايعا قالدىرىپ وتىر.
وتە وكىنىشتى، قابىلداۋعا تىم اۋىر جاعداي.
نەگە بىلاي بولدى، نە سەبەپتەن جازىقسىزدان جازىقسىز اق-الال تىرلىگىمەن ءومىر ءسۇرىپ، بالا-شاعاسىن اسىراپ جۇرگەن ازاماتتار كىسى قولىنان مەرت بولدى؟ سول قىرىق قارا، قۋ جەمتىك ءۇش ازاماتتى جولىنا مەرت قىلارداي كىمنىڭ جىرتىعىن جامايتىن ەدى؟ قانىشەرلەر سول قىرىق قارانىڭ سىلەكەيىنە بولا ءوز تۋىسىن، باۋىرىن قولدارى قالت ەتپەي قالاي ولىمگە قيا الدى؟-دەگەن سۇراقتار مازا بەرەر ەمەس. بۇعان دەيىن دە الماتى وڭىرىندە وسىنداي وقيعالار ورىن العانى بەلگىلى. ەندى مىنە، ايدىڭ كۇننىڭ امانىندا تاعى ءۇش بىردەي ازاماتتى وتارلى مالىمەن قوسا بارىمتالاپ، وزدەرىن اۋىل اراسىندا ءولتىرىپ، ماشينالارىن ورتەپ كەتىپ وتىر. بۇل شەكتەن شىققان ارەكەتكە كوز جۇما قاراۋعا بولمايدى. بۇل ادال كاسىپپەن اينالىساتىن اعايىنداردىڭ زاڭدى قۇقى بۇزىلىپ قانا قويماي، كەز-كەلگەن ۋاقىتتا ولاردىڭ مال مەن باسىنىڭ اماندىعىنا ەشبىر كەپىلدىك جوقتىعىن، وڭىردەگى قۇقىق قورعاۋ سالاسىنىڭ قىزمەتى سىن كوتەرمەيتىنىن كورسەتەدى. سونداي-اق، قالىپتاسقان جاعداي ءبىزدىڭ قوعامىمىزدا شەتتەن كەلگەن اعايىنداردىڭ ءالى دە بولسا قورعانسىز الەۋمەتتىك توپ ەكەنىن دالەلدەدى. ولاردىڭ بوتەن ءتىل مەن قوعامداعى بيۋروكراتيادان، ميگرانتوفوبيالىق كوڭىل-كۇيدەن كورگەن قاعاجۋى از ەمەس ەدى، ەندىگى جەردە وسىنداي زورلىق-زومبىلىققا ۇشىراۋى جانعا باتادى. قازاق ءوز باۋىرىنا كەلگەندە مال مەن قونىستى «ولەتۇعىن تاي ءۇشىن، كوشەتۇعىن ساي ءۇشىن» تالاسپايىق دەپ جان مەن اردىڭ ساداعاسى ساناماۋشى ما ەدى. بۇرىن ەلى ءۇشىن جان بەرەتىن ازاماتتار ەندى مال ءۇشىن باۋىرلاسىنىڭ قانىن موينىنا جۇكتەپ، باسىن تاۋەكەلگە تىگەتىن بولعانى ما؟ ەڭ قيىنى ءۇش ازاماتتىڭ ءومىرى قيىلۋمەن بىرگە، ءۇش وتباسى اسىراۋشىسىنان، ال اتا-اناسى ارىستاي ۇلدارىنان ايىرىلدى. ەلىمىزدە جەتىم-جەسىر مەن كوزى جاستى، كوڭىلى كۇپتى اتا-انانىڭ قاتارى كوبەيدى. ال شەتتەگى اعايىندار بولسا ماسەلەنىڭ ءمان-جايىن بىلمەي اڭتارىلىپ وتىر. سول سەبەپتەن قوعامدا ۇلكەن ءدۇمپۋ تۋدىرعان بۇل جاعداي رەسپۋبليكالىق دەڭگەيدە قاتاڭ باقىلاۋعا الىنىپ، قىلمىسكەرلەر ءادىل جازالانىپ، قىلمىس بولعان وڭىردەگى قاتىستى لاۋازىمدى تۇلعالار مەن قۇقىق قورعاۋ سالاسىنىڭ ادامدارى زاڭدى جاۋاپكەرشىلىككە تارتىلۋىن جانە تەرگەۋ ءىسىنىڭ بارىسى قوعامعا اشىق جاريا ەتىلۋىن تالاپ ەتەمىز. وسى ىستە جەدەل، جان-جاقتىلى ءارى ءادىل تەرگەۋ جۇرگىزىلىپ، زاڭنىڭ ۇستەمدىگى سالتانات قۇرادى دەپ سەنەمىز. قايتىس بولعان ازاماتتاردىڭ وتباسىنا قايعىسىنا ورتاقتاسىپ كوڭىل ايتا وتىرىپ، تۋعان-تۋىسقاندارىن، كوڭىلى كۇپتى اعايىندى سابىرعا شاقىرامىز. اللا تاعالا حالقىمىزعا قايىر-بەرەكە، يمان جانە ىنساپ بەرىپ، سىرتقى سۇعاناقتان، ىشكى ىرتكىدەن امان ساقتاپ، سالاۋاتتى، ءبىر-بىرىمىزگە باۋىرمال، قايىرىمدى ءارى جاراسىمدى ەل بولۋعا ءناسىپ ەتكەي دەپ تىلەيمىز.
پىكىر قالدىرۋ