ARDAQTI TUISTAR, BAUIRLAR! TAĞDIRLAS, TINISTAS AĞAYIN!
Twrsınhan Zäkenwlı
Keşeli bergi swm habar bärimäzdiñ qabırğamızdı qayıstırıp, şarasız jağdayğa qaldırıp otır.
Öte ökinişti, qabıldauğa tım auır jağday.
Nege bılay boldı, ne sebepten jazıqsızdan jazıqsız aq-alal tirligimen ömir sürip, bala-şağasın asırap jürgen azamattar kisi qolınan mert boldı? Sol qırıq qara, qu jemtik üş azamattı jolına mert qılarday kimniñ jırtığın jamaytın edi? Qanışerler sol qırıq qaranıñ silekeyine bola öz tuısın, bauırın qoldarı qalt etpey qalay ölimge qiya aldı?-degen swraqtar maza berer emes. Bwğan deyin de Almatı öñirinde osınday oqiğalar orın alğanı belgili. Endi mine, aydıñ künniñ amanında tağı üş birdey azamattı otarlı malımen qosa barımtalap, özderin auıl arasında öltirip, maşinaların örtep ketip otır. Bwl şekten şıqqan äreketke köz jwma qarauğa bolmaydı. Bwl adal käsippen aynalısatın ağayındardıñ zañdı qwqı bwzılıp qana qoymay, kez-kelgen uaqıtta olardıñ mal men basınıñ amandığına eşbir kepildik joqtığın, öñirdegi qwqıq qorğau salasınıñ qızmeti sın kötermeytinin körsetedi. Sonday-aq, qalıptasqan jağday bizdiñ qoğamımızda şetten kelgen ağayındardıñ äli de bolsa qorğansız äleumettik top ekenin däleldedi. Olardıñ böten til men qoğamdağı biyurokratiyadan, migrantofobiyalıq köñil-küyden körgen qağajuı az emes edi, endigi jerde osınday zorlıq-zombılıqqa wşırauı janğa batadı. Qazaq öz bauırına kelgende mal men qonıstı «öletwğın tay üşin, köşetwğın say üşin» talaspayıq dep jan men ardıñ sadağası sanamauşı ma edi. Bwrın eli üşin jan beretin azamattar endi mal üşin bauırlasınıñ qanın moynına jüktep, basın täuekelge tigetin bolğanı ma? Eñ qiını üş azamattıñ ömiri qiılumen birge, üş otbası asırauşısınan, al ata-anası arıstay wldarınan ayırıldı. Elimizde jetim-jesir men közi jastı, köñili küpti ata-ananıñ qatarı köbeydi. Al şettegi ağayındar bolsa mäseleniñ män-jayın bilmey añtarılıp otır. Sol sebepten qoğamda ülken dümpu tudırğan bwl jağday Respublikalıq deñgeyde qatañ baqılauğa alınıp, qılmıskerler ädil jazalanıp, qılmıs bolğan öñirdegi qatıstı lauazımdı twlğalar men qwqıq qorğau salasınıñ adamdarı zañdı jauapkerşilikke tartıluın jäne tergeu isiniñ barısı qoğamğa aşıq jariya etiluin talap etemiz. Osı iste jedel, jan-jaqtılı äri ädil tergeu jürgizilip, Zañnıñ üstemdigi saltanat qwradı dep senemiz. Qaytıs bolğan azamattardıñ otbasına qayğısına ortaqtasıp köñil ayta otırıp, tuğan-tuısqandarın, köñili küpti ağayındı sabırğa şaqıramız. Alla tağala halqımızğa qayır-bereke, iman jäne ınsap berip, sırtqı swğanaqtan, işki irtkiden aman saqtap, salauattı, bir-birimizge bauırmal, qayırımdı äri jarasımdı El boluğa näsip etkey dep tileymiz.
Pikir qaldıru