Doing Business: قازاقستان 35-ورىنعا شىقتى
قازاقستان دۇنيەجۇزىلىك بانكتىڭ بيزنەس جاساۋعا قولايلىلىقتى انىقتايتىن Doing Business 2017 رەيتينگىندە التى ورىن كوتەرىلىپ، 35-ورىنعا شىقتى. بىلتىر جاريالانعان رەيتينگتە قازاقستان 41-ورىندا بولعان ەدى.
دۇنيەجۇزىلىك بانكتىڭ “Doing Business 2017: Equal Opportunity for all” دەپ اتالاتىن ەسەبىندە قازاقستان برۋنەي، كەنيا، بەلارۋس، يندونەزيا، سەربيا، گرۋزيا، پاكىستان، بىرىككەن اراب امىرلىكتەرى جانە باحرەينمەن بىرگە 2015-2016 جىلدارى بيزنەسكە قولايلى جاعداي تۋعىزۋدا ۇلكەن جەتىستىكتەرگە جەتكەن ون ەل قاتارىنا كىرگەنى ايتىلادى.
بيزنەسكە ەڭ قولايلى ەلدەر ءتىزىمىن بيىل جاڭا زەلانديا باستاعان. ەكىنشى ورىنداعى سينگاپۋر بۇعان دەيىن ون جىل بويى ءتىزىمنىڭ باسىندا بولعان ەدى. العاشقى وندىققا سونىمەن قاتار دانيا، گونكونگ، وڭتۇستىك كورەيا، نورۆەگيا، ۇلىبريتانيا، اقش، شۆەتسيا جانە ماكەدونيا كىرگەن.
رەيتينگتە پوستسوۆەتتىك ەلدەردەن بەلارۋس 37, ارمەنيا 38, رەسەي 40, قىرعىزستان 75, وزبەكستان 87, تاجىكستان 187-ورىندا تۇر. رەيتينگتە بارلىعى 190 مەملەكەتتىڭ كورسەتكىشى سارالانعان.
Doing Business ەسەبىندە مەملەكەتتەردىڭ ازاماتتاردىڭ بيزنەستى اشىپ، جۇرگىزۋىنە قولايلى جاعدايلار جاساۋى مەن كەدەرگى كەلتىرۋى، سىرتقى ساۋدا جۇرگىزۋ قىزمەتى، سالىق تولەمدەرى، ينۆەستورلار مۇددەسىن قورعاۋ دەڭگەيىنە قاتىستى 190 كورسەتكىشى تالدانعان.
ازات ەۋروپا / ازاتتىق راديوسى
پىكىر قالدىرۋ