حيللاري كلينتون

اقش-تىڭ بۇرىنعى مەملەكەتتىك حاتشىسى حيللاري كلينتون فيلادەلفيادا ماۋسىم ايىندا وتكەن پارتيا سەزىندە ۆەرمونت شتاتىنان سايلانعان سەناتور بەرني ساندەرسپەن اراداعى اۋىر تارتىستان كەيىن پرەزيدەنتتىككە دەموكراتتار اتىنان تۇسەتىن كانديدات رەتىندە تاڭدالعان.

اقش-تىڭ بۇرىنعى پرەزيدەنتى بيلل كلينتوننىڭ جۇبايى حيللاري – نەگىزگى ەكى پارتيانىڭ ءبىرىنىڭ اتىنان پرەزيدەنت سايلاۋىنا ءتۇسىپ جاتقان العاشقى ايەل.

سايلاۋ ناۋقانى كەزىندە حيللاري كلينتون ورتا تاپتىڭ تابىسىن كوبەيتە تۇسۋگە; مەيلىنشە كوپ ازاماتتاردىڭ جوعارى ءبىلىم الۋىنا جاعداي جاساۋعا; دەنساۋلىق ساقتاۋ جۇيەسىندە 2010 جىلى باراك وبامانىڭ باستاماسىمەن باستالىپ، وسى كۇنگە دەيىن سىنعا ۇشىراپ جۇرگەن “وباماكەير” رەفورماسىن جەتىلدىرۋگە ۋادە بەردى.

حيللاري كلينتون رەسەيدىڭ ۋكراينا مەن سيرياداعى ارەكەتتەرىنە قارسى ءارى بۇل تاراپتاعى پوزيتسياسى قاتاڭ. مەملەكەتتىك حاتشى بولعان كەزىندە سيرياداعى شابۋىلدى كۇشەيتە ءتۇسۋدى بىرنەشە مارتە ۇسىنعان، الايدا ونىڭ ۇسىنىسىن پرەزيدەنت وباما قولدامادى.

ول مەملەكەتتىك حاتشى بولعان كەزىندە جەكەمەنشىك پوچتا سەرۆەرىن پايدالانعانىنا قاتىستى جانجالدىڭ ۇلعايۋىنا جول بەرمەي، دەر كەزىندە توقتاتتى. ماۋسىم ايىندا فبر قىلمىستىق ءىس قوزعاۋعا سەبەپ جوق ەكەنىن مالىمدەدى. قازاننىڭ 28-ءى كۇنى فبر ديرەكتورى دجەيمس كومەي وزدەرىنىڭ جاڭا تابىلعان ەلەكتروندىق حاتتاردى قاراپ جاتقانىن حابارلادى، بىراق قاراشانىڭ 6-سى كۇنى «جاڭا تەكسەرىستەر باستاپقى شەشىمدى وزگەرتپەدى» دەپ مالىمدەدى.

اقش پرەزيدەنتى سايلاۋىنا دەموكراتيالىق پارتيا اتىنان ءتۇسىپ جاتقان كانديدات حيللاري كلينتون. وگايو شتاتى، 6 قاراشا 2016 جىل.

مۇنىمەن قاتار، حيللاري كلينتون وزىنە تاعىلعان «دەموكراتيالىق پارتيا باسشىلىعى ونى پرايمەريز كەزىندە ساندەرسكە قاراعاندا كوبىرەك قولدادى» دەگەن ايىپتان دا، حالىققا بەرگەن ۋادەلەرىنە قاراماستان «كاسىپكەرلەر (ساۋدا) ەركىندىگىن» قولدايدى دەگەن ايىپتاۋدان دا سىتىلىپ شىعا الدى.

كلينتون ءوزىنىڭ ساياساتتاعى تاجىريبەسىن العا تارتىپ، پرەزيدەنت سايلاۋىنداعى قارسىلاسى رەسپۋبليكاشىل دونالد ترامپتىڭ جوعارعى باس قولباسشى بولۋعا «دايىن ەمەس» ەكەنىن ايتتى.

كلينتون دەموكراتيالىق پارتيا پرايمەريزىندە وبامادان جەڭىلگەن سوڭ، وباما اكىمشىلىگىندە 2009–2013 جىلدارى مەملەكەتتىك حاتشى قىزمەتىن اتقارعان.

حيللاري كلينتون 1947 جىلى قازاننىڭ 26-سى كۇنى چيكاگودا دۇنيەگە كەلگەن، بالالىق شاعى سوندا وتكەن. ونىڭ تەگىندە ۆالليلەر، شوتلاندتار، اعىلشىندار بار.

حيللاري كلينتون مەملەكەتتىك مەكتەپتەردە وقىعان. وقۋ ۇلگەرىمى جاقسى بولعان، ۇيىرمەلەرگە قاتىسقان. جەتكىنشەك جاسىندا پرەزيدەنت سايلاۋىنا تۇسكەن رەسپۋبليكاشىل كانديداتتاردى، سونىڭ ىشىندە بارري گولدۋوتەر مەن ريچارد نيكسوندى قولداعان.

1969 جىلى ول ۋەلسلي كوللەدجىندە – باكالاۆر دارەجەسىن، ال 1973 جىلى يەل ۋنيۆەرسيتەتىندە قۇقىق دوكتورى دارەجەسىن العان.

ۋنيۆەرسيتەتتى بىتىرگەن سوڭ بالالار قۇقىعىن قورعاۋ سالاسىندا زاڭگەر قىزمەتىن اتقاردى، پرەزيدەنت نيكسونعا قاتىستى يمپيچمەنت پروتسەدۋراسىنىڭ باستالۋىنا سەبەپ بولعان ۋوتەرگەيت جانجالى كەزىندە كونگرەسس مۇشەلەرى كەڭەسشىسى بولدى.

ول بيلل كلينتونعا تۇرمىسقا 1975 جىلى شىقتى. مۇنان سوڭ كوپ ۇزاماي ولار اركانزاس شتاتىنا كوشىپ، بيلل كلينتون سول شتاتتا باس پروكۋرور قىزمەتىنە تاعايىندالدى.

حيللاري كلينتون اركانزاس ۋنيۆەرسيتەتىندە قۇقىقتان ءدارىس وقيدى، ال 1979 جىلى بيلل گۋبەرناتور بولىپ سايلانعاندا، شتاتتىڭ ءبىرىنشى حانىمى بولدى. كلينتوندار ۆاشينگتونعا 1992 جىلى بيلل پرەزيدەنت بولىپ سايلانعان سوڭ كوشىپ كەلدى.

حيللاري اقش-تىڭ ءبىرىنشى حانىمدارى ىشىندەگى بەلسەندىسى بولدى. سەگىز جىلدىڭ ىشىندە ول 79 ەلدى ارالادى، اقش-تا دەنساۋلىق ساقتاۋ سالاسىندا رەفورما جۇرگىزۋگە تالپىندى، الايدا بۇل باستامانى كونگرەسس قولدامادى.

2000 جىلى ءبيلدىڭ پرەزيدەنتتىك مەرزىمىنىڭ سوڭىندا ول نيۋ-يورك شتاتىنان سەناتور بولىپ سايلاندى. 2006 جىلى وسى قىزمەتكە قايتا سايلاندى.

كلينتونداردىڭ چەلسي ەسىمدى قىزى، ەكى نەمەرەلەرى بار. حيللاري – حريستيان ءدىنىنىڭ پروتەستانت شىركەۋىنىڭ مەتوديستىك اعىمى وكىلى.

تيم كەين

ۆيردجينيا شتاتىنان سايلانعان سەناتور تيم كەين – دەموكراتيالىق پارتيا اتىنان ۆيتسە-پرەزيدەنتتىككە كانديدات.

ۆيردجينيانىڭ بۇرىنعى گۋبەرناتورى تيم كەين 2016 جىلى شىلدەنىڭ 22-ءسى كۇنى، دەموكراتتار سەزىنە بەس-اق كۇن قالعاندا، پارتيا اتىنان پرەزيدەنتتىككە كانديدات حيللاري كلينتوننىڭ دوداعا بىرگە قاتىسۋ تۋرالى ۇسىنىسىن قابىلدادى.

ساياسي كوزقاراسى بويىنشا ول «ورتاڭعى» قاتارعا جاتادى ءارى «ناعىز دەموكرات» سانالادى. ول ىشكى جانە سىرتقى ساياساتتى جەتىك بىلەدى، ونى كەيدە ءتىپتى «ساياسي مىجىما» دەپ تە اتايدى.

كاتوليك بولعاندىقتان تيم كەين ابورتتى قولدامايدى، دەگەنمەن ۇكىمەت جاساندى تۇسىك جاساتقىسى كەلگەن ايەلدەرگە كەدەرگى جاساماۋى كەرەك دەپ سانايدى.

58 جاستاعى تيم كەين ءبىر كەزدەرى كوللەدجدە وقىتۋشى بولىپ تا، ادۆوكات بولىپ تا قىزمەت ىستەگەن. ۆيردجينيانىڭ استاناسى ريچموندتىڭ مەرى دە بولعان. 2001 جىلى كەين ۆيردجينيانىڭ ۆيتسە-گۋبەرناتورى بولىپ سايلانعان. ال 2006 جىلى وسى شتاتتىڭ گۋبەرناتورى بولدى. 2012 جىلى سەناتور بولىپ سايلانعانعا دەيىن ول ەكى جىل بويى ۇلتتىق دەموكراتيالىق كوميتەت توراعاسى بولعان.

ميننەسوتادا دۇنيەگە كەلگەن. ونىڭ اتا-بابالارى يرلانديا مەن شوتلانديادان شىققان. تيم كەين كانزاس-سيتيدە وسكەن. 1979 جىلى ميسسۋري ۋنيۆەرسيتەتىن ۇزدىك ءبىتىرىپ، ەكونوميكا باكالاۆرى دارەجەسىن الىپ شىعادى.

1983 جىلى قۇقىقتانۋ بويىنشا گارۆارد ۋنيۆەرسيتەتىنىڭ دوكتورى اتانادى. وقۋ كەزىندە ءبىر جىلداي گوندۋراستاعى كاتوليك شىركەۋىندە جۇمىس ىستەپ، سوندا يسپان ءتىلىن ۇيرەنگەن. ۇيلەنگەن، ءۇش بالاسى بار.

دونالد ترامپ

نيۋ-يوركتەن شىققان بيزنەسمەن ءارى رەاليتي-شوۋ جۇرگىزۋشىسى دونالد ترامپ بيىل جازدا كۇتپەگەن جەردەن پرايمەريزدە جەڭىپ شىعىپ، رەسپۋبليكالىق پارتيا اتىنان پرەزيدەنت سايلاۋىنا ءتۇسىپ جاتىر.

وجارلاۋ ميللياردەر ساياساتتانۋشىلار مەن پارتيا باسشىلىعىن تەگىس تاڭعالدىرىپ، باسقا 16 ۇمىتكەردى شاڭ قاپتىرىپ، شىلدە ايىندا كليۆلەندتەگى پارتيا سەزىندە كانديدات رەتىندە رەسمي تۇردە ۇسىنىلدى.

اقش پرەزيدەنتى سايلاۋىنا رەسپۋبليكالىق پارتيا اتىنان ءتۇسىپ جاتقان كانديدات دونالد ترامپ. ۆيردجينيا شتاتى، 7 قاراشا 2016 جىل.

ترامپ ساياساتپەن اينالىسپاعان، سوندىقتان ول يستەبليشمەنتكە قارسى كانديدات سانالادى. ول تەلەدەبات كەزىندە نەمەسە Twitter پاراقشاسىندا ءوزىنىڭ تاجىريبەلى قارسىلاستارىن دورەكى تۇردە ءجيى سىناپ كەلەدى.

ترامپتىڭ پارتيا ىشىندەگى سوڭعى قارسىلاستارى تەحاستان سايلانعان سەناتور تەد كرۋز بەن وگايو گۋبەرناتورى دجون كەيسيك بولدى. ولاردى جەڭگەن سوڭ دونالد ترامپ دەموكراتيالىق پارتيانىڭ كانديداتى حيللاري كلينتونعا قارسى باستى ساياسي باسەكەگە قاتىسۋعا رەسمي تۇردە مۇمكىندىك الدى.

ترامپتىڭ سايلاۋ كامپانياسى جۇمىس ورىندارىن كوبەيتىپ، سالىقتاردى ازايتۋ ارقىلى «امەريكانى قايتادان ۇلى ەلگە اينالدىرامىز» دەگەن ۇرانمەن ءوتتى. دەگەنمەن ول بۇل جوسپارىنىڭ جاي-جاپسارىن تولىق ايتقان جوق ءارى كوزقاراسىن ءجيى وزگەرتىپ وتىردى.

«زاڭ مەن ءتارتىپتى كۇشەيتەمىن» دەگەن ول زاڭسىز يمميگراتسياعا توسقاۋىل قويۋ ءۇشىن اقش پەن مەكسيكا اراسىنا بيىك دۋال تۇرعىزاتىنىن، ءارى ونىڭ شىعىندارىن مەكسيكاعا وتەتكىزەتىنىن مالىمدەدى.

بۇعان قوسا، ول تەرروريستەردى تابۋ ءۇشىن مۇسىلمان يمميگرانتتاردى «قاتاڭ تۇردە» تەكسەرتكىزەتىنىن، ءتىپتى مۇسىلمانداردىڭ اقش-قا كىرۋىنە تولىق تىيىم سالاتىنىن دا ايتتى، بىراق كەيىننەن بۇل يدەياسىنان باس تارتتى.

70 جاستاعى ترامپ باراك وبامانى ءالسىز باسشى سانايدى، ال ونىڭ سيريا مەن باسقا دا تۇراقسىز ايماقتارداعى ساياساتىن تۇككە العىسىز دەپ ەسەپتەيدى. ول اسىرەسە 2015 جىلى ۆاشينگتوننىڭ بەلسەندى تۇردە قاتىسۋىمەن قول قويىلعان يرانمەن اراداعى يادرولىق كەلىسىمدى قاتتى سىنادى.

حيللاري كلينتوندى اقش تاريحىنداعى «ەڭ ناشار مەملەكەتتىك حاتشى» دەپ سيپاتتاعان ول پۋتينگە كەلگەندە مارتتىك تانىتىپ، ونى «تاماشا باسشى» دەپ ماقتادى.

ترامپ سىرتقى ساياساتتا كوپ جايتتان حابارسىز ەكەنىن بىرنەشە رەت بايقاتتى. ماسەلەن، ول رەسەيدىڭ قىرىمدى اسكەري جولمەن باسىپ العانىن بىلمەيتىن بولىپ شىقتى.

ترامپتىڭ بويىندا نەمىس پەن شوتلاند قانى بار. ول نيۋ-يوركتە، اۋقاتتى دەۆەلوپەر فرەد ترامپتىڭ وتباسىندا دۇنيەگە كەلگەن.

ترامپ «نيۋ-يورك اسكەري اكادەمياسى» اتالاتىن جەكەمەنشىك مەكتەپ-ينتەرناتتى بىتىرگەن، سودان سوڭ ءبىراز ۋاقىت برونكستەگى فوردەم ۋنيۆەرسيتەتىندە وقىعان. 1968 جىلى ول پەنسيلۆانيا ۋنيۆەرسيتەتىنىڭ بەدەلدى سانالاتىن ۋورتون بيزنەس مەكتەبىن ءبىتىرىپ، ەكونوميكا باكالاۆرى دارەجەسىن العان.

ترامپ اسكەردە بولماعان. ۆەتنام سوعىسى كەزىندە ستۋدەنت رەتىندە نەمەسە دەنساۋلىعىنا بايلانىستى اسكەرگە الىنباي قالعان.

ول كوللەدجدە وقىپ ءجۇرىپ-اق اكەسىنىڭ جىلجىمايتىن مۇلىك سالاسىنداعى كومپانيالارىنىڭ بىرىندە جۇمىس ىستەگەن. 1999 جىلى اكەسى قايتىس بولعان سوڭ ترامپ سول كومپانيانىڭ باسشىسى بولدى. ترامپتىڭ كورپوراتسياسى الەمنىڭ ءار تۇكپىرىندە ءزاۋلىم عيماراتتار مەن ويىنحانالار سالعان. ول تۇرعىزعان عيماراتتاردىڭ كوبى نيۋ-يوركتە. سوڭعى كەزدەرى ترامپ گولف الاڭدارىن سالىپ، امەريكادا جانە الەمدە قىزداردىڭ سۇلۋلىق بايقاۋىن ۇيىمداستىرىپ ءجۇر.

ترامپ كومپانيالارى بىرنەشە رەت بانكروت بولىپ جاريالانعان. بۇعان قوسا، ونىڭ ۋنيۆەرسيتەت اشۋ يدەياسى جۇزەگە اسپاي قالدى، ءوز ماركاسىمەن بوتەلكەدەگى سۋ مەن ستەيك شىعارۋ تۋرالى جوسپارى دا قۇردىمعا كەتتى.

3 – 3,7 ميلليارد دوللار بايلىعى بار دەپ سانالاتىن دونالد ترامپ 2004 جىلى ەكرانعا شىققان «كانديدات» رەاليتي-شوۋىنىڭ جۇرگىزۋشىسى رەتىندە تانىلدى. ءار سەريانىڭ سوڭىندا ول جوبانىڭ ءبىر قاتىسۋشىسىنا «سەن كەتەسىڭ!» دەپ ويىننان شىعارىپ وتىرادى. 2016 جىلى «ەن-بي-سي» تەلەارناسى ترامپ ەمميگرانتتارعا قاتىستى جايسىز پىكىر ايتقان سوڭ حاباردى جاۋىپ تاستادى.

ترامپتىڭ ءۇش ايەلدەن بەس بالاسى، سەگىز نەمەرەسى بار. قىزى يۆانكا مەن ۇلدارى – كىشى دونالد پەن ەريك ونىڭ سايلاۋ كامپانياسىندا ماڭىزدى ءرول وينايدى. ول پروتەستانتيزمنىڭ ءبىر باعىتى – پرەسۆيتەريان شىركەۋىن قولدايدى.

مايك پەنس

ينديانا شتاتىنىڭ گۋبەرناتورى مايك پەنس – رەسپۋبليكالىق پارتيا اتىنان ۆيتسە-پرەزيدەنتتىككە كانديدات.

كونگرەستىڭ بۇرىنعى دەپۋتاتى مايك پەنس دونالد ترامپتىڭ سايلاۋعا بىرگە ءتۇسۋ تۋرالى ۇسىنىسىن شىلدەنىڭ 15-ءى كۇنى پارتيا سەزىنە ەكى اپتا قالعاندا قابىل العان.

ول الەۋمەتتىك جانە سالىق ماسەلەلەرىنە تىم كونسەرۆاتيۆتىك تۇرعىدا قارايدى. ءوزىن «قۇدايعا قاتتى سەنەتىن حريستيان» اتايدى.

2008 جانە 2012 جىلدارى ونى پرەزيدەنت سايلاۋىنا تۇسەتىن ادام دەپ اتاعان. الايدا ول ەشقاشان پرەزيدەنتتىك دوداعا تۇسپەگەن.

ساياساتقا ارالاسقانعا دەيىن پەنس زاڭگەر جانە راديوحابار جۇرگىزۋشىسى قىزمەتتەرىن اتقارعان.

57 جاستاعى مايك پەنس ينديانادا، يرلاندتاردىڭ كاتوليك اۋلەتىندە دۇنيەگە كەلگەن. 1981 جىلى حانوۆەر كوللەدجىن، ال 1986 جىلى ينديانا ۋنيۆەرسيتەتىن بىتىرگەن. زاڭگەر دارەجەسى بار.

بىرنەشە جىل پروكۋراتۋرادا قىزمەت ىستەگەن، 1988 جانە 1990 جىلدارى كونگرەسكە سايلاۋعا تۇسكەن. سول كەزدە ول زاڭگەرلىك قىزمەتى مەن ساياسات تاقىرىبىنا ارنالعان «مايك پەنس شوۋى» حابارىنىڭ جۇرگىزۋشىلىگىن قاتار الىپ جۇرگەن.

2000 جىلى كونگرەسكە سايلانىپ، سوندا 2012 جىلعا دەيىن جۇمىس ىستەگەن. ارتىنشا ينديانا شتاتىنىڭ گۋبەرناتورلىعىنا تالاسىپ، سايلاۋدا جەڭىپ شىققان.

2009 جىلى ول رەسپۋبليكالىق پارتيانىڭ كونگرەستەگى ءۇشىنشى ءىرى لاۋازىمدى قىزمەتىنە تاعايىندالعان.

وكىلدەر پالاتاسىنىڭ سىرتقى ساياسات كوميتەتىندە جۇمىس ىستەگەن، حالىقارالىق قاتىناستار مامانى سانالادى. گۋبەرناتور كەزىندە سالىقتى ازايتىپ، ينديانا شتاتىنىڭ بيۋدجەت ءپروفيتسيتىن قالىپتاستىرعان.

جاقىندا لگبت قاۋىمداستىعى ونىڭ گۋبەرناتور كەزىندە قول قويعان زاڭى وزدەرىن كەمسىتەدى دەپ مالىمدەپ، داۋ شىقتى. بۇكىل ەل اۋماعىندا وتكەن نارازىلىق شەرۋلەرىنەن كەيىن زاڭعا تۇزەتۋ ەنگىزىلدى.

سايلاۋعا ءتۇسىپ جاتقان باسقا كانديداتتار

بۇلارمەن قوسا، پرەزيدەنتتىك قىزمەتكە تاعى 24 كانديدات تالاسىپ جاتىر. بىراق بارلىق 50 شتاتتاعى بيۋللەتەندەردە ولاردىڭ ىشىندە تەك بىرەۋىنىڭ – ليبەرتارياندىق پارتيا وكىلى گەري دجونسوننىڭ ەسىمى عانا جازىلادى.

«جاسىلدار» پارتياسىنىڭ وكىلى دجيلل ستاين مەن تاۋەلسىز كانديدات ەۆان ماكمالليننىڭ دە ەسىمدەرى ءبىرشاما تانىمال.

ليبەرتاريان پارتياسىنىڭ وكىلى گەري دجونسون. بوستون، 27 تامىز 2016 جىل.

نيۋ-مەكسيكو شتاتىنىڭ بۇرىنعى گۋبەرناتورى گەري دجونسون 2012 جىلعى سايلاۋعا ليبەرتارياندىق پارتيا اتىنان ۇمىتكەر رەتىندە قاتىسىپ، 1% داۋىس جيناعان.

دجونسون سالىقتى تومەندەتىپ، فەدەرالدىق ۇكىمەتتىڭ فۋنكتسيالارىن ازايتۋ كەرەك دەپ سانايدى ءارى شەتەلدەگى اقش اسكەرىن قىسقارتۋعا ۋادە بەرەدى.

ونىڭ ۇستىنە 63 جاستاعى گەري دجونسون – ماريحۋانانى زاڭداستىرۋدى قولدايتىنداردىڭ ءبىرى.

قىركۇيەك ايىندا ءتىلشى سيريانىڭ ەڭ ۇلكەن قالاسىندا بولىپ جاتقان اسكەري قاقتىعىس تۋرالى سۇراعاندا ول «الەپپو دەگەن نە؟» دەپ قايىرا سۇراپ باق نازارىنا ىلىكتى. تاعى ءبىر سۇحباتىندا ول ءوزى قاتتى قولدايتىن شەتەلدىك ساياساتكەر تۋرالى سۇراققا جاۋاپ بەرە الماي، توسىلىپ قالعان.

دجونسونمەن بىرگە ۆيتسە-پرەزيدەنتتىككە ءتۇسىپ وتىرعان كانديدات – رەسپۋبليكالىق پارتيا وكىلى، ماسساچۋسەتس شتاتىنىڭ بۇرىنعى گۋبەرناتورى ۋيليام ۋەلد.

دجونسون «باستى ماقساتى – سايلاۋدا 5% داۋىس جيناۋ» ەكەنىن ايتقان.

نيۋ-مەكسيكودا تۋىپ-وسكەن ول 1985 جىلى جەرگىلىكتى ۋنيۆەرسيتەتتى «ساياساتتانۋشى» ماماندىعىمەن بىتىرگەن.

ساياساتقا بارعانعا دەيىن قۇرىلىس كومپانياسىن قۇرىپ، ونىسى ءساتتى جۇمىس ىستەگەن. دجونسون اجىراسقان، ەكى بالاسى بار.

تاۋەلسىز كانديدات ەۆان ماكماللين.

ەۆان ماكماللين – پرەزيدەنت سايلاۋىنا قاتىساتىنىن تەك تامىز ايىندا جاريالاعان تاۋەلسىز كانديدات.

مۇنىڭ الدىندا ول كونگرەستە كەڭەسشى بولىپ، ورتالىق بارلاۋ باسقارماسىندا (تسرۋ), بۇۇ-نىڭ بوسقىندار جونىندەگى جوعارى كوميسسارىنىڭ باسشىلىعىندا جۇمىس ىستەگەن. ءوزىن دونالد ترامپ پەن حيللاري كلينتونعا بالاما ۇمىتكەر سانايدى.

تسرۋ-دەن كەتكەن سوڭ ول Goldman Sachs ينۆەستيتسيالىق بانكىندە جۇمىس ىستەگەن، سودان سوڭ وكىلدەر پالاتاسىنىڭ سىرتقى ساياسات كوميتەتىندە اعا كەڭەسشى بولعان.

ماكمالليندى رەسپۋبليكالىق پارتيانىڭ ترامپقا قىرىن قارايتىن بىرنەشە قارجىلىق دونورى قولدايدى.

ماكماللين ۆاشينگتون شتاتىندا تۋىپ-وسكەن. بريگام يانگ ۋنيۆەرسيتەتىن حالىقارالىق قۇقىق بويىنشا بىتىرگەن ول كەيىن پەنسيلۆانيا ۋنيۆەرسيتەتىنەن ىسكەرلىك باسقارۋ بويىنشا ماگيستر دارەجەسىن العان.

ونىمەن بىرگە Twitter-ءدىڭ بۇرىنعى قىزمەتكەرى، تسيفرلىق مەديا بويىنشا ستراتەگ ميندي فينن ۆيتسە-پرەزيدەنتتىككە ءتۇسىپ جاتىر.

ماكماللين 40 جاستا، ۇيلەنبەگەن. ول ۋنيۆەرسيتەتتەگى وقۋىن ءۇزىپ، برازيلياداعى مورموندار ميسسياسىندا قىزمەت ەتىپ كەلگەن.

دجيلل ستاين حانىم – سايلاۋعا «جاسىلدار» پارتياسىنان ءتۇسىپ جاتقان كانديدات.

ستايننىڭ ماماندىعى دارىگەر، ءارى ول – ەكولوگيانى قورعاۋ باستامالارىنا ءجيى قاتىساتىن قوعامدىق بەلسەندى. ماسساچۋسەتس شتاتىنىڭ گۋبەرناتورى قىزمەتىنە تالاسقان، 2012 جىلى «جاسىلدار» پارتياسى اتىنان پرەزيدەنت سايلاۋىنا ءتۇسىپ، 0,4% داۋىس جيناعان.

“جاسىلدار” پارتياسىنىڭ اتىنان اقش پرەزيدەنتى سايلاۋىنا ءتۇسىپ جاتقان دجيلل ستاين.

ستاين حانىم بۇل سايلاۋداعى ەڭ سولشىل كانديداتتاردىڭ ءبىرى سانالادى. ول رەسەيدىڭ ۋكرايناداعى ارەكەتتەرىنە قولداۋ بىلدىرگەن. بۇعان قوسا، ول 2014 جىلى «ەۋرومايدان» كەزىندە ۋكرايناداعى مەملەكەتتىك توڭكەرىسكە سەپتەستى دەپ اقش ۇكىمەتىن ايىپتاعان.

ستاين يزرايل پرەمەر-ءمينيسترى بينيامين نەتانياحۋدى «سوعىس قىلمىسكەرى» دەپ اتاعان. بۇل كانديدات اتا-بابالارى قۇلدىقتا بولعان افروامەريكالىقتارعا وتەماقى بەرۋ ۇسىنىسىن جاقتايدى.

ۆيتسە-پرەزيدەنتتىكتەن ۇمىتكەر رەتىندە ول قۇقىق قورعاۋشى ادجاما باراكتى تاڭداعان.

66 جاستاعى ستاين چيكاگودا تۋىپ-وسكەن. ول – رەسەيدەن اۋعان ەۆرەي يمميگرانتتارىنىڭ نەمەرەسى، ءوزىن اگنوستيك سانايدى.

گارۆارد ۋنيۆەرسيتەتىنەن مەديتسينا باكلاۆرى جانە دوكتورى دارەجەسىن العان. بوستوندا تەراپەۆت بولىپ جۇمىس ىستەي ءجۇرىپ، ساياسي بەلسەندىلىكتى دە ۇمىتپاعان.

بۇعان قوسا، ستاين بارابان مەن گيتارا ويناي الادى، ءتىپتى Somebody’s Sister فولك-توبىمەن بىرلەسىپ البوم دا جازعان.

تۇرمىستا، ەكى ەرەسەك بالاسى بار.

مۇحتار ەكەي

ازاتتىق راديوسى