Alaş arısı Rayımjan Marsektiñ ata-tegi jöninde.
kerey.kz
Resey imperiyasınıñ otarlıq ezgisine qarsı twrıp, odan keyingi kommunistik-şovinistik kezeñde wlt müddesin qorğap, wlttıq sayasi partiya qwrıp, qazaqtıñ memlekettiligin qayta jañğırtuğa talpınğan qazaq ziyalıları men oqımıstılarınıñ jarıq jwldızdarınıñ, iri qayratkerleriniñ biri nayman-teristañbalıdan şıqqan Rayımjan Marsek edi. Rayımjan Marsektiñ ömiri, qazası jöninde birtalay zertteuler jürgizilip, kitaptar da jazılğan. Alaş arısınıñ artında qalğan wrpaqtarı jöninde, Raymıjannıñ tuğan inisi Şeriyazdannıñ qızı Twrdıqan apayımızdıñ «Keşuler» attı kitäbinde tolığımen aytılğan. Osı apayımızdıñ jazğan kitäbi men tarih ğılımdarınıñ doktorı Äbjanovtıñ jauaptı redaktorlığımen jazılğan Rayımjan Marsek turalı «Qazaq qayda bara jatır?» attı kitäpterde aytılmağan birer derekterdi keltirudi jön kördim.
Töñkeristen keyin Rayımjan Marsektiñ kontrrevolyuciyaşıl atalğanı belgili. Bıltır jazda bayjigittiñ ataqtı şejiresi bolğan, Däuletbay batırdıñ egizi Esengeldi bidiñ wrpağı Mälik ağa Mwqaşwlı jürek talmasınan dünieden ötken edi. Kezinde osı Mälik ağa marqwm Tarbağatay audanınıñ äskeri komissariatında qızmet jasap jürip köptegen qwpiya derekterdi bilgen bolğan. Elinde «tiri enciklopediya» atanğan Mälik ağanıñ qolınan men eñ alğaş osı Rayımjan Marsek jönindegi çekisterdiñ deregin kördim. Bir kezdeskenimizde satıbaldılarmen qwdandas ekenimizdi estigen Mälik ağa, Rayımjannıñ babası teristañbalı Satıbaldı batır turalı äñgimesin bastap ketip, kezinde, äskeri komissariatta qızmet jasap jürgen künderinde şekaraşıl çekisterge qızmet etken Raşid Merkurbanovtan Rayımjan Marsek turalı estigenderin aytıp berdi. Merkurbanov Zaysannıñ tatarı edi. «Tarbağataydıñ qızıl qırandarı» attı bol'şevikterdiñ äygili äskeri otryadı Qıtaymen şekarada kontrrevolyuciyaşıldardıñ şabuıldarına tötep biruge jwmıldırğanı belgili. Osı Merkurbanov pen Aqjar auılınıñ azamatı bolğan Intin Qasen attı aqsaqaldar, Qıtayğa ötip ketken Rayımjannıñ atınıñ Zaysan-Tarbağatay öñirinde jañğırıp twrğanın aytıp ketedi. Rayımjannıñ: «Kökpekti, Tarbağatay, Qalba, Böken, Qızığın qayta aynalıp körer me eken?!» dep kezinde öleñ aytıp jürgeni beker bolmağan. Alaş qozğalısına şeksiz berilgen Rayımjan Marsek qızıldardıñ Semeyde üstemdikke ie bolıp, Alaştan Rayımjandı küşpen ayırğan kezde ol Zaysan qalasına kelip Alaşorda komitetin qwrıp, oğan basşılıq jasağan. Demek, Wlan audanınıñ tuması bolğan Rayımjan Zaysan-Tarbağatay halqına da tanımal bolğan. Eñ aldımen ol öziniñ batırlığımen, alğırlığımen közge tüsken. Keyin, Baqtı arqılı Qıtayğa ötip ketkende kontrrevolyuciyaşıl top jinap, eki künniñ birinde «qızıldardı şabamın!» dep jüredi eken. Sol kezde Qıtaydağı Qızır töre Rayımjannıñ osı qızbalığın bilip, elimen aqıldasıp: «Osığan aramızdan bir qız berip qosalıq, balalı-şağalı bolğan soñ, sotqarlığın qoyar!» dep kereydiñ Nwrjamal degen qızına qosqan. Rayımjan üylenip, bala oqıtıp jürse de, öziniñ kontrrevolyuciyaşıl äreketterin qoymağanı jöninde, Mälik ağanıñ qolınan alğan derekten de añğaruğa boladı. Öziniñ is-äreketterin Rayımjan janwyasına sezdirmegen deydi. 1992-şi jılı «Aqiqat» jurnalında jarıq körgen bwl derekte bılay delingen eken:
«Qıtaydağı qazaqtıñ Kontr. Rev. Ortalığınıñ qızmeti turalı», Şekaranıñ arğı betinen tüsken materialdardağı mälimet boyınşa, şekaranıñ arğı betindegi wltşıl qazaq kontrrev. Ortalığınıñ jetekşisi Marsekov ötken jıldıñ soñğı künderinde Djanrdan Şara-Sume qalası audanına kelgen: jolşıbay Märsekov qabıqtağı bay Aqış Şeredinovqa toqtağan. Marsekov keybir qazaqtarğa öziniñ Altaydağı mañğol baylarımen birigudi közdeytinin mälimdegen, Märsekovtıñ izinşe-aq qañtardıñ alğaşqı künderinde qabıq arqılı üş liniyalı vintovkamen 30 adamdıq Alaş otryadı jürip ötken. Dam mekeninde otryad Qonısbaev Hasenge toqtağan. Otryad Altayğa ketip baradı. Saparları anıqtalmağan».
Mine, osı mälimetterden keyin arğı bettegi Rayımjan çekisterdiñ nısanasına mıqtılap alınğan edi. Anau-mınau qaşqın emes, orıstıñ Savinkovı siyaqtı, Qıtaydağı kontrevolyuciyalıq Ortalıqtıñ basşısı bolğan Rayımjannıñ qazası turalı ärtürli nwsqalar aytıladı. «Tiridey kömdi» degenniñ qaydan aytılğanı jöninde Mälik ağa, Merkurbanov pen Intin Qasenniñ auzınan estigenderin de mağan aytıp berdi. 1938-şi jılı Stalinniñ tapsırmasımen Qıtaydağı kontrrevolyucionerlerdiñ bäri de twtqınğa alınıp, jüz şaqtı adam ölim jazasına kesiledi. Ükimdi orındauşılardıñ köbisi qıtay kommunisteriniñ qatarındağı wyğırlar eken. Olar qoldarı arttarına baylanğan qazaqtardı Sayapil dalasına aparıp şetterinen bauızdap öltire bastağanda, Rayımjan boy bermey ketken soñ, sonı ğana basınan atıp qwlatqan. Qazaqtardı äketkende satırlatıp atılğan mıltıqtardıñ dauısı ädettegidey estilmegen soñ, el arasında «tiridey kömdi» degen laqap tarap ketken. Mine, bergi jaqta atağınan at ürkigen, qızıl qırandardıñ özderiniñ nazarında bolğan Rayımjannıñ qazası jöninde qızıl qırandar otryadına osınday mälimet kelgen eken.
Bwl näubetten qarataydıñ Äbdikerim bolısınıñ batır wlı Şabdan ğana qwtılıp ketken edi. Özimizdiñ mataylıq Ädi Şäripov ağamız Keñes däuirinde Londonğa barğanında osı Şabdandı köripti. Ağılşın äyeline üylengen, eki qızı bar eken. «Men Äbdikerimniñ Şabdanımın, men tirimin!» dep ayqay salğan deydi aqın-jazuşı Şekerbanu Rahmetoldaqızı öziniñ jazğan «Este qalar esimder» attı kitäbinde.
Endi bir aqın-jazuşı, Qıtaydan qaytqan oralman bauırımız törtuıldıq Imanğazı Nwrahmetwlı Qıtayda jürgen kezderinde Äbdikerim bolıstıñ eki nemeresin körse, Imanğazınıñ qayın atası Rayımjandı körgen eken. Rayımjan Imanğazınıñ qayın jwrtı Esirgepterge «tuısımız» dep kelip jürgen deydi. Bir teristañbalı bolğan soñ «tuısımız» dep aytqan bolsa kerek. Rayımjannıñ tuğan bauırı Şeriyazdan, tersitañbalı Jänibek batırdıñ wrpağı Düsip qajınıñ qızı Oqa apanı alğan edi. Esirgeptegi Meyirbaevtardıñ şeşeleri Masara apa da osı Jänibek batırdıñ wrpağı boladı. Oqa apa da, Masara apa da Rayımjannıñ zamandastarı bolğan soñ, osı qwdandalıqtı bilip «tuısımız» dedi me eken, kim bilsin. Kezindegi Marsek bolıstıñ wrpaqtarı, nemere inileri, Satıbaldı äuletiniñ ökilderi qazirgi Qasım Qaysenov kentindegi mektepke Rayımjannıñ atın berip, aldına müsinin qoyıp önegeli is bitirdi. Alaş qayratkeri Rayımjan Marsekti qwrmetteu iltipatı osımen toqtamau kerek deymin.
Tersitañbalı Aqtanadan Aytqwl, Satıy, Jarılğaptar siyaqtı, Rayımjannıñ babası Satıbaldı da batır bolğan. 1771-şi jılı Kökjal Baraq qırğızdıñ qalıñ qolınıñ qorşauına tüskende, özderi tügelimen qırılsa elge habar jetpey qalatının sezip, mergen bolğan soñ quğınğa aldırtpas dep Satıy batırdı babamız qorşaudan şığartıp jibergen eken. «Kökjal Baraq qaşqanda quıp pa ediñ?» degen şapıraştı Süyinbaydıñ elinde bwl oqiğalar aytılıp jüredi. Dulattardıñ aytqanında Şu özeniniñ mañında Kökjal Baraqtıñ eki adamı qorşaudan qwtılıp ketken eken. Ekinşi adamdı men Satıbaldı ma dep jüruşi edim. Keyin, Makanşıdağı tuma Şıñqoja batırdıñ wrpaqtarınan ekinşi adamnıñ osı Şıñqoja bolğanın estidim. Alay da, Şıñqoja batır İleden ötkende suğa ağıp ketedi. Satıydan suıq habardı estigen sarıjomarttıq Tanaş batır men şanışqılı Berdiqoja batırlar Kökjal Baraq babamnıñ kegin qaytaru üşin qırğızğa barğanda, ağayındı Satıbaldı men Satıy batırlar babamızdıñ qazasına sebepşi bolğan qırğızğa kirme, tübi sayaq-şapıraştı Sadır batırdıñ eki wldarın Sadırdıñ közinşe bauızdap tastağan. Satıy batır sadağımen atıp atınan wşırğan Sadırdı Berdiqojanıñ özi bauızdaydı. Tanaş batır jekpe-jekte qatarınan eki qırğızdıñ batırın öltiredi. Keyin, äkesin öltirgen Tanaş batırdı oljağa alınğan qırğızdıñ qızı, batırdıñ suğa tüsip jürgen kezinde sadaqpen atıp öltiredi. Berdiqojanı seksen qırğız kelip Ayaköz mañında wstap alıp öltirip, denesin müşelep qarnına tığıp ay dalada tastap ketken eken. Sonıñ üşin wstalğan qırğızdıñ bir manabınıñ balasın Berdiqoja batırdıñ tört äyeli: «qırğızdı bizge beriñder» dep, öz koldarımen pışaqtap öltiredi. «Berdekemniñ mingeni qaraalayaq, swm qırğız keskilepti ayamay-aq!» dep joqtau aytadı. Mine, joñğarlardı qwrtqannan keyin solardan bos qalğan jerlerge qazaq-qırğız talasınıñ bel ortasında teristañbalı Satıy men Satıbaldı batırlar da jürgen. Satıy batır Şığıs Qazaqstan jerin joñğarlardan azat etude basşılıq etken. Osı oqiğalar jöninde joğarğı Şekerbanu Rahmetoldaqızı jeñgemiz Almatıda tarihi roman jazu üstinde. Bıltırğı jazda Şekerbanu jeñgemiz Satıy batırdıñ wrpağı Baqıtgül hanımğa erip, Ayırtaudıñ tübindegi säuegey üñgirdiñ qasındağı Satıy batırdıñ bwlağınıñ basına Qabanbay, Kökjal Baraq, Satıy, Satıbaldı batırlardıñ kezdesken jerin köruge barıp qayttı. Joñğarlardı qwrtu josparında Sibege kelip joñğarlardıñ qamalın alğandar Qabanbay batır, Baraq swltan, Kökjal Baraq, toğas Baybaraq batır, sadır Maylı batır, taraqtı Bayğozı batır, teristañbalı Jarılğap, Satıy men Satıbaldı batırlar edi. Qazirgi tañda Şığıs Qazaqstan oblısınıñ äkimi Danial Ahmetovtıñ bastauımen Ablaykit atalatın osı joñğardıñ qamalı qaytadan qalpına keltirilip jatır. Alay da, bwl batırlardı eşkim de esine alıp otırğan joq. Bwl qamaldı Qaldan Seren qiratqan dep adasıp jür. Bwl qamaldıñ bas jağındağı jartasta meniñ babam Kökjal Baraqtıñ joñğarlarmen bästesip köterip äkelip qoyğan tastıñ twrğanın da bilmeydi. Al endi, jergilikti halıq bolsa, bwl añızdı jatqa aytadı. Kökjal Baraq bwl qamaldı bwzbasa, bwl añız qaydan kalğan? Iä, ruhani jañğırıp jatqanımızdıñ siqı osı bolar. Babalarımız qırıp tastağan joñğardı jañğırtıp jatırmız. Baraq babamnıñ endi bir wrpağı, tarihşı Sovethan Qaliğojin ağamız öziniñ jazğan jırında:
«Sarıqwl, Atığay men Satıbaldı,
Jauına jolbarıstay atıladı,
Bir jılda jiırma bir jau batırın,
Jayratıp jekpe-jekte atın aldı».
- degen eken. Satıbaldınıñ batır bolğanı Keñes däuirinde Rayımjannıñ babası bolğan soñ, köp aytılmağan edi.
Qayrat Zarıphan. Şejiretanuşı.
kerey.kz
Pikir qaldıru