|  |  | 

كوز قاراس ساياسات

قىتاي ەكسپانسياسىنىڭ قاتەرى

جازۋشى-پۋبليتسيست مارات ءبايدىلداۇلى (توقاشباەۆ):
72c42dcbff72cde5a46255e269d53899

قىتايلىق 51 (55) زاۋىتتى قازاقستانعا كوشىرۋ جوباسى حالقىمىزعا ماڭگى قۇتىلمايتىن بوداندىق قامىتىن كيگىزۋى ىقتيمال. قىتاي بەرەدى دەپ ۇمىتتەنىپ وتىرعان 26,5 ملرد دوللار قازاقستان تاعدىرىن تالكەككە سالاتىن قاقپان تىلشىگىندەگى «ءدامدى سىرعا» ۇقسايدى.
قازاقستانعا كوشىرىلەتىن 51 زاۋىتپەن كەلەتىن قىتايلار قازاقتاردى بايىتادى دەۋ اقىلعا سىيمايدى! ءىس جۇزىندە 51 قىتاي زاۋىتىن كوشىرىپ كەلۋ قازاقستان ۇكىمەتىنىڭ ەل ەكونوميكاسىن باسقارۋعا مۇلدە قابىلەتسىز ەكەندىگىن كورسەتەتىن دارمەنسىز ارەكەت. مەملەكەت رەيدەرلىك باسقىنشىلىقسىز، كوررۋپتسياسىز جاعداي تۋعىزىپ بەرسە ءوز بيزنەسمەندەرىمىز-اق 50 ەمەس 500 زاۋىت سالىپ بەرۋگە قۇمىل.
قازاقستاندا جالپى ىشكى ءونىم نەگە جىلدان جىلعا ورلەمەيدى؟ بۇعان وسى كەزگە دەيىن بىردە ءبىر ۇكىمەت جاۋاپ بەرگەن ەمەس. بۇرىن ەشقانداي ۇكىمەتتىك باعدارلامالاردا كوزدەلمەگەن، ەشقاشان تالقىلانباعان «51 قىتاي كومپانياسىن قازاقستانعا كوشىرۋ تۋرالى» كەلىسىم وقىستان نەگە پايدا بولدى؟
ۇكىمەت باسىندا ونشاقتى جىل وتىرعان كارىم ءماسىموۆ، ودان كەيىنگىلەر قازاقستان ەكونوميكاسىن تىعىرىققا تىرەگەنى ءۇشىن حالىق الدىندا نەگە جاۋاپ بەرمەيدى؟ ايتپەسە ەلىمىزدە سوڭعى 20 جىل ىشىندە قانشاما باعدارلامالار، كلاستەرلەر، باعىتتار، ءوندىرىس وشاقتارى تۋرالى جوسپارلار قابىلداندى دەسەڭىزشى. سونىڭ كوپشىلدىگى جۇزەگە اسپادى. ەڭ باستىسى ەكونوميكانى ءارتاراپتاندىرۋ تۋرالى جوسپارلار مۇلدە ورىندالمادى. ەندى كەلىپ قىتاي زاۋىتتارىن قازاقستانعا كوشىرمەكشىمىز؟
قىتاي ەش نارسەنى جايدان جاي جاساي سالمايدى. بۇل ارەكەتتەردىڭ نەگىزىندە ءۇش سەبەپ جاتىر. بىرىنشىدەن، الىستى كوزدەيتىن ساياسي سەبەپ – بۇل قىتايدىڭ بەيبىت ەكسپانسياسى. جەر كولەمى وراسان قازاقستان قىتايدى اۋماقتىق جاعىنان قىزىقتىرماۋى مۇمكىن ەمەس. قىتايعا قانداي سەبەپپەن بولسا دا ءوزىنىڭ قازاقستانعا جاپپاي ەنۋىن قامتاماسىز ەتەتىن جوبالار اۋاداي قاجەت. «51 كاسىپورىن» سونىڭ تاپتىرماس جولى. ال قىتاي ءبىر كىرگەن جەرىنەن شىقپايدى. رەسەيدىڭ قىتايعا جالعا بەرگەن جەرى سونىڭ دالەلى. بەيبىت ەكسپانسيا – قىتايدىڭ رەسمي ساياساتى ەمەس، ول قىتايدىڭ عاسىرلاردان قالىپتاسقان ءۇردىسى، قىتايلىق مەنتاليتەتى.
ەكىنشىدەن، بىزگە كوشىرىلەتىن زاۋىتتار قىتايدىڭ ەكولوگيالىق پروبلەمالارىن قازاقستانعا كوشىرەدى. ويتكەنى ءدال بۇگىندە قىتاي ەكولوگيالىق قيىندىقتاردىڭ اۋىر زارداپتارىن باستان كەشىرۋدە. قىتاي كومپانيالارى مەن قىتاي كولىكتەرى نەگىزىنەن ارزان وتىنمەن، ديزەلمەن جۇمىس ىستەيدى. New York Times گازەتى اتاپ وتكەنىندەي، قىتايدىڭ مەملەكەتتىك كاسىپورىندارى، اسىرەسە قىتايدىڭ مۇناي، حيميا كورپوراتسيالارى مەن ەنەرگەتيكالىق كومپانيالارى حالىقتىڭ دەنساۋلىعىنان گورى تاباتىن ەكونوميكالىق پايداسىن جوعارى قويادى. سوندىقتان شەنەۋنىكتەر ەكولوگيالىق جاڭا نورماتيۆتەردىڭ قابىلدانۋىنا جول بەرمەي وتىر. ماسقاراسى، قىتايدا ەكولوگيالىق ستاندارت جوق! «ءوزىنىڭ بەتىن اياماعان كىسىنىڭ بەتىن شيەدەي قىلادى» دەمەكشى، ءوز ەلىن اياماعان قىتاي كاسىپورىندارى قازاقستان حالقىن اياۋى مۇمكىن ەمەس.
51 زاۋىت قازاقستان ءۇشىن ەكولوگيالىق، الەۋمەتتىك وراسان پروبلەمالار تۋعىزارى انىق. ەرتەڭ كىرگىزىپ العان سوڭ ول زاۋىتتاردىڭ جۇمىسىن نە توقتاتا الماي، نە ەلدەن قايتا شىعارا الماي وزىمىزگە ءوزىمىز پروبلەمالار تاۋىپ الارىمىز ءسوزسىز. قازاقستاننىڭ ءوز ەكولوگياسىنىڭ دا جاعدايى جەتىسىپ تۇرعان جوق.
ۇشىنشىدەن، قىتاي جاعى «مىنە، سىزدەرگە 51 زاۋىتىمىزدى بەردىك، ەندى وزدەرىڭىز ىستەي بەرىڭىزدەر» دەپ قاراپ وتىرمايدى. 51 زاۋىت ورتاشا ەسەپپەن ارقايسىسى مىڭ ادامنان جۇمىسشى، مامان كىرگىزەتىن بولسا 51 مىڭ قىتاي كىرەدى دەگەن ءسوز. ولارعا قىتاي مۇعالىمدەرى، قىتاي دارىگەرلەرى، قىتاي اسپازدارى كەرەك بولادى. ارى قاراي وتباسىلارى، تۋىستارى، ءتۇرلى قىزمەت سالالارى قاپتايدى. «جەردى ساتپايمىز!» دەگەن ايقايىمىزدى جىلاعان بالانىڭ داۋىسى سياقتى ەشكىم قۇلاعىنا ىلمەيتىن بولادى. قىسقا مەرزىمدە ەكونوميكا ارقىلى ەلىمىزدەگى ساياسي، الەۋمەتتىك احۋال قىتاي پايداسىنا قاراي بەت بۇرادى. شىن مانىندە قازاقستانعا كوشىرىلمەك قىتاي زاۋىتتارى تاۋەلسىزدىگىمىزگە تونگەن قاۋىپ!
ءيا، بۇگىنگى تاڭدا قازاقستان مەن رەسەي عانا ەمەس بۇكىل الەم قىتاي ەكسپانسياسى تۋرالى اتتان سالىپ جاتىر. بۇل سونشالىق ۇرەيلى مە؟ ويتكەنى قىتايدىڭ الەمدىك ەكونوميكاعا ءالى دە ىقپالى ارتا تۇسەتىنى راس. قىتاي شىنىندا وراسان الىپ نارىق.
قحر، گونكونگ، تايۆان، سينگاپۋردى، سونداي-اق باسقا ءتۇرلى ەلدەردەگى ەتنيكالىق قىتايلاردىڭ جەكە كومپانيالارىن قوسىپ العاندا كۇللى قىتاي دياسپوراسىنىڭ جيىنتىق جالپى ىشكى ءونىمى 2 تريلليون دوللاردان اسىپ كەتەدى. بۇل سومانىڭ تەڭ جارتىسى قىتايدان تىسقارى، الەمنىڭ 140 ەلىندە تۇراتىن 80 ميلليون قىتايعا تيەسىلى.
ۋ گوگۋان مەن ۆان چجاوتسزيۋن سياقتى كورنەكتى سينولوگتار ايتپاقشى، قىتاي «دەموگرافيالىق ەكسپانسيانى» شەبەر پايدالانادى. «دەموگرافيالىق ەكسپانسيا قىتايدىڭ كۇللى پروبلەماسىن وڭاي شەشەدى، قىتاي ەلىندەگى حالىقتىڭ 10 پايىزى ءوز ەلىنەن سىرتقا ۇمتىلاتىن بولسا ول الەمنىڭ كەز كەلگەن ەلىنە تىپ تىيپىل بولۋ قاۋپىن توندىرەدى»، – دەيدى ولار.
بۇعان قاراپايىم دالەلدەردىڭ ءبىرى مىناۋ: ءۇندى مۇحيتىنداعى رەيۋنون ارالىندا 1861 جىلى العاشقى قىتاي دۇڭگىرشەگى پايدا بولسا، 1897 جىلى دۇڭگىرشەكتەردىڭ سانى 547-گە جەتكەن. تاعى ءبىر 20 جىلدان كەيىن تەك ساۋدا عانا ەمەس ارالداعى بۇكىل ەكونوميكا قىتاي دياسپوراسىنىڭ قولىنا كوشىپ كەتكەن.
قىتايدان سىرتقارى تۇراتىن قىتايلاردىڭ (حۋاتسياو) باقىلاۋىنداعى اكتيۆتەر 1,5-نان 2 تريلليون دوللارعا دەيىن دەپ باعالانادى. ماسەلەن، مالايزيادا حالىقتىڭ ۇشتەن ءبىرى قىتايلار، ولار ەلدىڭ ۇلتتىق بايلىعىنىڭ 70 پايىزىن باقىلاۋدا ۇستاپ وتىر. تايلاندتا قىتايلار نەبارى 15-اق پايىز، الايدا ولار ەل ەكونوميكاسىنىڭ 80 پايىزىنا يەمدەنگەن. ۇندەنەزيادا نەبارى 4 پايىز حۋاتسياو ەكونوميكانىڭ 73 پايىزىن تىرپ ەتكىزبەي قولىنا شوعىرلاندىرعان. فيليپپين ەلىندەگى نەبارى 1 پايىز عانا قىتاي ۇلتتىق بايلىقتىڭ 60 پايىزىن ۋىسىندا ۇستاپ وتىر. سينگاپۋرىڭىزدىڭ ەكونوميكاسى 100 پايىز قىتاي دياسپوراسىنىڭ بيلىگىندە. ازياداعى ەڭ باي 100 ميللياردەردىڭ 39-ى – قىتاي. اقش-تاعى نوبەل سىيلىعى لاۋرەاتتارى اراسىندا جەتەۋى – قىتايلىق.
قىتاي كاسىپورىندارى سالىنعان رەسەي مەن افريكا ەلدەرى ەكولوگيالىق احۋالدىڭ ناشارلاۋىنان زار قاعىپ وتىر. قىتايدىڭ ءوزى ەۋروپانىڭ وزىق تەحنولوگياسىنا مۇقتاج. ولار وزىق تەحنولوگياسىن قىتايدىڭ تۇمسىعىنا يىسكەتپەيدى دە. وزىندەگى ءىلدالاپ وتىرعان ورتان قول تەحنولوگياسىن قىتاي بەرە قويماسى انىق. قىتاي قازاقستانعا وزدەرى قۇتىلا الماي وتىرعان كاسىپورىندارىن تىقپالايدى. ەڭ سۇمدىعى قىتايدا ءالى كۇنگە ەكولوگيالىق مەملەكەتتىك ستاندارتتار قابىلدانعان ەمەس. مونوپوليستەر ۇنەمى توسقاۋىل قويىپ كەلەدى. ءبىز «كەدەرگى قويادى» دەپ ۇمىتتەنگەن قازاقستاننىڭ ەكولوگيالىق ستاندارتتارىنا ولار پىسقىرمايدى دا. قىتاي – ءپىل بولسا، قازاقستان – قۇمىرسقا. قىتايدىڭ سىرتقى بيزنەسىندە پاراعا بەرىلەتىن قاراجات الدىن الا بيۋدجەتكە ەنگىزىلىپ قويادى. وعان ءبىزدىڭ شەنەۋنىكتەرىمىزدىڭ كوك قاعازعا دەگەن «سۇيىسپەنشىلىگىن» قوسىڭىز. قىتاي تاراپىنىڭ كەز كەلگەن قۇجاتىن قۇلدىق ۇرىپ جوندەپ بەرەتىنىنە كۇمان جوق.
ال 51 زاۋىت – وراسان ەكولوگيالىق پروبلەما، ول از دەسەڭىز 51 زاۋىت – 51 «چاينا تاۋن». ابىلاي اتامىز كەزىندە «قىتايعا تۇسسەڭ قىل بۇراۋ» دەگەن، سول قىل تۇزاققا باسىمىزدى ءوز ەركىمىزبەن نەگە تىعامىز؟ تاۋەلسىزدىككە تونەر قاۋىپ رەتىندە «51 زاۋىت» باعدارلاماسىن دەرەۋ توقتاتۋ كەرەك!
سوندىقتان، مەملەكەت باسشىسى بۇل جوباعا موراتوري جاريالاپ، تۇبەگەيلى توسقاۋىل قويۋدىڭ جولدارىن قاراستىرعانى ءجون دەپ ەسەپتەيمىن. ايتەۋىر بارماعىمىزدى تىستەپ قالمايىق. قىتايمەن ويناۋعا بولمايدى!
مارات توقاشباەۆ. «پرەزيدەنت جانە حالىق» گازەتى. 18 قاڭتار 2017 ج

Related Articles

  • شىمكەنت اكىمى ەرلان ايتاحانوۆتى قىزمەتىنەن الىپ تاستاپتى عوي. ماعان ءبىر پايداسى تيگەن اكىم ەدى. 

    2015 جىلى اقپاندا سارىاعاشتا قازاق پەن تاجىك اراسىندا كونفليكت بولدى ەمەس پە؟ شەنەۋنىك بوپ ىستەيتىن قازاق جىگىتىن جىلىجايداعى تاجىك جىگىتى ءولتىرىپ، جىك ءتۇستى. ىنتىماق دەگەن اۋىلدا 20-عا جۋىق تاجىك ءۇيىن ورتەپ، ءبىر كۇندە دۇنيە استاڭ-كەستەڭ بولدى. اسكەر كىرگىزدى. الەۋجەلىڭ بىردە بار، بىردە جوق. وقيعادان ءۇش كۇن وتە رەداكتسيا تاپسىرماسىمەن سارىاعاشقا جەتتىم. ءارى قاراي اۋىلعا بارايىن دەسەم تاكسيستەر مىناۋ ساقىرلاعان كامەرا، فوتواپپاراتىڭىزبەن كىرگىزبەيدى دەپ باسپايدى. اقشاسىن مولداۋ بەرىپ كوندىردىم بىرەۋىن. ءبىر توپ پوليتسيا سارىاعاشتان شىعا بەرىستە ءبىر، اۋىلعا كىرە بەرىستە ەكى تەكسەردى. قۇرال–سايماندى تاكسيستىڭ تەمىر-تەرسەگىنىڭ استىنا تىعىپ تاستاعام، قۇداي ساقتادى. اۋىلعا كىرىپ كەلسەك پوليتسيا، اسكەر، ومون-سومون، بتر-عا دەيىن تەحنيكا سامساپ تۇر ەكەن. اتتاپ باستىرمايتىنى بەلگىلى بولدى. قايدان تۇسىرەيىن دەدى تاكسيسىم. قايدان

  • لۋكاشەنكو رەسەيدىڭ قازاقستانعا مۇناي تاسىمالداۋعا رۇقسات بەرمەي وتىرعانىن ايتتى

    بەلارۋس پرەزيدەنتى الەكساندر لۋكاشەنكو. بەلارۋس پرەزيدەنتى الەكساندر لۋكاشەنكو 21 قاڭتاردا مينسك قالاسىندا مۇناي تاسىمالداۋ ماسەلەسىنە ارنالعان جيىندا “رەسەي قازاقستانعا بەلارۋسقا مۇناي ساتۋعا رۇقسات بەرمەي وتىرعانىن” ايتتى. “قازىر راسىمەن رەسەي مۇنايىن تولىق الماستىراتىن باسقا كوز جوق. مۇنايدى جان-جاقتان الۋ كەرەكپىز. ءبارىبىر مۇنايدىڭ 30-40 پايىزىن رەسەيدەن ساتىپ الامىز. قالعانىن30 پايىزىن بالتىق ەلدەرىنەن، 30 پايىزىن ۋكراينادان الۋىمىز قاجەت. ەگەر رەسەي كەلىسسە، قازاقستان دا بىزگە مۇناي جەتكىزىپ بەرە الادى. ءبىزدىڭ ءبىر وداقتاسىمىز ەكىنشى وداقتاسىمىزعا مۇناي تاسىمالداۋعا كەلىسىم بەرمەي وتىرعانى تاڭ قالدىرادى” دەدى لۋكاشەنكو. 2020 جىلدىڭ 1 قاڭتارىنان باستاپ رەسەي بەلارۋس ەلىنە مۇناي تاسىمالداۋدى توقتاتقان. وسىدان سوڭ بەلارۋس ەلىندە مۇناي تاپشىلىعى باستالدى. لۋكاشەنكو مەن رەسەي مۇناي تاسىمالداۋ تۋرالى بىرنەشە رەت كەلىسسوز جۇرگىزگەنىمەن ناتيجە شىقپادى. ازات

  • قاستەر مەن مۇراگەر قىتايعا قايتارىلمايدى

    سوت زايسان اۋدانى ارقىلى (شقو -اۆت.) «شەكارانى زاڭسىز كەسىپ ءوتتى» دەپ ايىپتالعان قاستەر مۇساحانۇلى مەن مۇراگەر ءالىمۇلىنا قاتىستى ۇكىم شىعاردى. ۇكىم وقىلار الدىندا «بوستاندىق» دەپ ايقايلاعان قاستەر مەن مۇراگەردىڭ جاقتاستارى سوت زالىنا باسىپ كىردى، دەپ حابارلايدى Azattyq ءRýhyتىلشىسى. قازاقستاننىڭ تۇكپىر-تۇكپىرىنەن جينالعان بەلسەندىلەر سوت وتىرىسى ءۇشىن كەڭىرەك زال بەرۋدى تالاپ ەتتى. سوت پروتسەسىنە كىرمەك بولعان ادامداردى پوليتسيا توقتاتپاقشى بولعانمەن، ولار ەسكەرتۋگە قۇلاق اسپادى. ءتىپتى، ايعايعا باسقان ازاماتتار ءتارتىپ ساقتاۋدى تالاپ ەتكەن پوليتسيا قىزمەتكەرلەرىن يتەرىپ، سىرتقا شىعارىپ تاستادى. تۇسكە دەيىن بولعان سوت وتىرىسىندا پروكۋرور ەرجان ازىمباەۆ قاستەر مۇساحانۇلى مەن مۇراگەر ءالىمۇلىن ءبىر جىلعا باس بوستاندىعىنان ايىرىپ، قىتايعا دەپورتاتسيالاماۋدى سۇراعان. ادۆوكات ءلاززات احاتوۆانىڭ ايتۋىنشا، پروكۋروردىڭ جەڭىل جازا سۇراۋىنا ەكى جىگىتتىڭ تەرگەۋمەن اشىق جۇمىس ىستەگەندەرى، ءارى كامەلەتتىك جاسقا تولماعان جاس بالالارىنىڭ

  • ارقادان التايعا اۋعان ەلدىڭ ءىزى (ياعني ارقادان التايعا اۋعان اباق كەرەيدىڭ كەرۋەن كوشى ءجايىندا)

    باياحمەت جۇمابايۇلى  كىندىك ءسوز: كەرەي تايپاسىنىڭ ەجەلگى مەكەندەرى ارقادان التاي بەتىنە ىرگەلى ەلدىڭ قاقپايىنان اۋعانى راسپا؟». «اباق كەرەي ەلدى ارقادان التايعا «اقمىرزانىڭ ولىمىنە سەبەپشى بولىپ كوشكەنى» راس پا؟ «بۇقار جىراۋ ابىلاي حاننىڭ بۇيرىۋىمەن كەرەي كوشىن توقتاتۋعا الدىنان شىعىپ جوتاسىن كورسەتكەنى راسپا؟» ت. ب. سۇراقتار توڭىرەگىندە تاريحشى بولماسامدا ىزدەنىستىڭ ناتيجەسىندە ءوز الىمشە كوزعاراس ءبىلدىرۋدى ءجون كوردىم. ارتىق – كەمىن كەشىرممەن قارارسىزدىر. شىنى كەرەك، وسى تاقىرىپقا قاتىستى جازبا دەرەكتەر از بولعاندىقتان، دالەلسىز ءسوزدىڭ دارمەنى شامالى بولار دەگەن ويمەن، تارتىنشاقتاپ كەلگەن ەدىم. جۋىقتان بەرگى الەۋمەتتىك جەلىلەردە بۇل تاقىرىپ توڭىرەگىندە تالاس-تارتىستار مالىعا باستاعانىن كورىپ قولىما قالام الىپ، وسىدان ءبىر قانشا جىل بۇرىن «قازاقتىڭ قىسقاشا تاريحى» دەگەن ەڭبەگىمەن ەكى ميلليارد قىتايعا عانا ەمەس، شەت ەلدەردەگى

  • ازيا سوقپاعى قايدا اپارادى؟

    قۋانىشبەك قاري سولدان وڭعا قاراي: ازەربايجان پرەزيدەنتى يلحام اليەۆ، رەسەي پرەزيدەنتى ۆلاديمير پۋتين، قازاقستان پرەزيدەنتى قاسىم-جومارت توقاەۆ جانە فيليپپين پرەزيدەنتى رودريگو دۋتەرتە. ۆالداي پىكىرتالاس كلۋبى، سوچي، رەسەي، 3 قازان 2019 جىل. اقوردا سايتىنداعى سۋرەت. قازاقستان پرەزيدەنتىنىڭ سوچيدە ايتقان رەسەيدىڭ ورتالىق ازياداعى ورنى تۋرالى پىكىرىن ەلدەگى رەسمي ءباسپاسوز جاريالامادى. ساراپشىلاردىڭ كەيبىرى توقاەۆتىڭ ايتقاندارىن قىتايعا ساپاردان كەيىنگى اقتالۋ رەتىندە باعالاسا، كەيبىرى ديپلوماتيالىق ىلتيپاتپەن بايلانىستىرادى. وتكەن اپتادا رەسەيدىڭ سوچي قالاسىندا حالىقارالىق “ۆالداي” پىكىرتالاس كلۋبىندا سويلەگەن سوزىندە قازاقستان پرەزيدەنتى قاسىم-جومارت توقاەۆ رەسەيدى “ۇلى مەملەكەت” دەپ اتادى. قازاقستان باسشىسى ورتالىق ازيانىڭ رەسەي يمپەرياسىنىڭ ءبىر “بولىگى” بولعانىن ايتىپ، قازىر دە ماسكەۋدىڭ ورتالىق ازيادا “جەتەكشى ورىنعا يە بولۋى كەرەكتىگىنە” توقتالدى. الايدا ونىڭ رەسەي تۋرالى پىكىرى قازاقستانداعى رەسمي

پىكىر قالدىرۋ

ەلەكتورندى پوشتاڭىز سىرتقا جاريالانبايدى. بەلگى قويىلعان ءورىستى تولتىرۋ مىندەتتى *

اتى-ءجونى *

Email *

سايتى

Kerey.kz/كەرەي.كز

ءبىز تۋرالى:

تەل: +7 7071039161
Email: kerey.qazaq@gmail.com

Kerey.kz ءتىڭ بۇرىنعى نۇسقاسىن http://old.kerey.kz تەن وقي الاسىزدار!

KEREY.KZ

سايت ماتەريالدارىن پايدالانعاندا دەرەككوزگە سىلتەمە كورسەتۋ مىندەتتى. اۆتورلار پىكىرى مەن رەداكتسيا كوزقاراسى سايكەس كەلە بەرمەۋى مۇمكىن. جارناما مەن حابارلاندىرۋلاردىڭ مازمۇنىنا جارناما بەرۋشى جاۋاپتى.

سايت ساناعى: