Nazarbaevtıñ ornın «wjımdıq basşılıq» basadı degen boljam bar
Batıs baspasözi Nwrswltan Nazarbaev bilikten ketken soñ Qazaqstanda «wjımdıq basşılıq jüyesi ornauı mümkin» degen boljam aytadı.
JAÑA NWSQA
Wlıbritaniyanıñ Financial Times basılımında jariyalanğan «Nazarbaevtan keyingi Qazaqstan: özgeris jeli soğayın dedi me?» attı blogta qazirgi prezident Nwrswltan Nazarbaev bilikten ketken soñ bilikti auıstıru scenariyi özgerui mümkin ekeni jaylı jazadı.
Verisk Maplecroft saraptamalıq wyımı ökili Kamila Heyjland öz maqalasında Nwrswltan Nazarbaevtıñ Qazaqstanda 25 jılğa sozılğan «sayasi twraqtılıqtı» saqtağan jetekşilik rölin atap ötip, onıñ bolaşaqta bilikten ketui investorlardı aytarlıqtay alañdatatının eskertken. «Nazarbaev otbası müşelerine qatıstı lauazım auıstıru jäne institutcionaldıq reformalar onı almastıruğa dayındıq jaqın bolaşaqta boluı mümkin ekenin körsetedi» dep jazadı avtor.
«Oqiğalardıñ örbui Qazaqstan bilik qwrılımında tübegeyli özgerister qarastırılıp jatqanın körsetti – bilikte mıqtı köşbasşı emes, barınşa wjımdıq jetekşilik jüyesi ornauı mümkin, ol birşama kürdeli sayasi landşaftqa äkeledi» dep jazadı Financial Times basılımı.
Otbasındağı qızmet auıstırudıñ mısalı retinde prezidenttiñ ülken qızı Dariğa Nazarbaevanıñ 2015 jılı prem'er-ministr orınbasarlığına jäne prezidenttiñ nemere inisi Samat Äbiştiñ wlttıq qauipsizdik komiteti törağasınıñ orınbasarı bolıp tağayındaluı atalğan. «Samat Äbiş bolaşaqta törağalıqqa tağayındalğan jağdayda tübinde bilik özge qolğa ötetindiginen belgi bergen bolar edi» delingen maqalada.
Bwğan qosa Nazarbaevtar otbası «şeteldegi dünie-mülikterin otanına qaytarıp jatır» degen sıbıs bar. «Mülikti [Qazaqstanğa] qaytarudı sayasi auısımğa dayındıq retinde qarastıruğa boladı. Investiciyanı üyge – Qazaqstanğa äkelu arqılı otbası özin eldiñ ekonomikalıq damuın ıntalandırıp, bağalaytın «jauapkerşiligi bar elita» retinde körsetedi… [Osı isimen] Nazarbaevtar otbası el biligi investiciyaların Qazaqstanğa qaytaruğa ıntalandırıp jürgen basqalarğa ülgi körsetedi» dep jazadı Financial Times.
Nazarbaev «wlt köşbasşısı» retinde özin almastıra alatın naqtı eşkim joğın «jaqsı biledi» delingen maqalada. «Sonıñ nätijesinde mıqtı instituttar mañızı eseli türde artadı, solayşa Nazarbaev özine mirasqor tabuğa tırısa ma, älde mıqtı instituttarğa süyengen wjımdıq basqaru stiline öte me degen saual tuındaydı. Bwl oğan Nazarbaevtar äuletiniñ bolaşağın qamtamasız etu üşin otbası müşelerin negizgi qızmetterge ornalastıru arqılı, keleşekte jalğız mwrager tağayındau boyınşa elita tarabınan da, twrğındar jağınan da keri reakciyağa jol bermeu üşin qosımşa payda tigizui mümkin» deydi maqala avtorı.
QAZAQSTAN JÄNE AFRIKA
Singapurlıq Channel News Asia telearnası saytında Qazaqstanğa Qıtaydıñ Şıñjañ-Wyğır avtonomdıq audanı (ŞWAA) törağası Çjan Çun'syannıñ kelgeni, kezdesu barısında qwnı eki milliard dollardıñ kelisimderine qol qoyılğanı turalı jazadı. Telearnanıñ sözinşe, bwl soma energiya, auılşaruaşılıq jäne önerkäsip salasındağı jobalarğa bölinbek.
Afrikalıq All Africa jañalıqtar saytında ötken aptada Qazaqstan men Belarus Liberiyamen diplomatiyalıq qarım-qatınastar ornatqanı, «bwğan deyin basqalar da aytqanday, barlıq sala boyınşa dostıqtı nığaytu jäne qoldauğa uäde bergeni» jaylı habarlağan.
Sonımen birge sayt Liberiyanıñ şeteldegi diplomatiyalıq missiyasın qamtamasız etu üşin «köp aqşa jwmsap jatqanın» sınğa alıp, al bwl uaqıtta özge elder – sonıñ işinde Liberiya diplomatiyalıq missiyaların aşqan memleketter de bar – «şığındarın azaytıp jatqanı» turalı jazğan. Äsirese Liberiya twrğındarına Şengen vizasın alu üşin körşi Gana, Kot-d’Ivuar nemese Nigeriyadağı europalıq elderdiñ elşilikterine baruğa tura keletindikten, viza olarğa tım qımbatqa tüsedi.
Anna KLEVCOVA
Azat Europa / Azattıq radiosı
Pikir qaldıru