جاڭالىقتار تاريح تۇلعالار قازاق حاندىعىنا 550 جىل ادەبي الەم
الماتىدا قازاقتىڭ كورنەكتى عالىمى قايىم مۇحامەدحانوۆتىڭ 100 جىلدىعىنا ارنالعان سالتاناتتى كەش ءوتتى
kerey.kz
2016 جىلدىڭ 16 مامىر كۇنى كەشتە م.اۋەزوۆ اتىنداعى قازاق مەملەكەتتىك اكادەميالىق دراما تەاترىنداعالىم، ابايتانۋشى، اقىن، قر مەملەكەتتىك سىيلىعىنىڭ يەگەرى، قوعام قايراتكەرى قايىم مۇحامەدحانوۆتىڭ 100 جىلدىعىنا ارنالعان سالتاناتتى كەش ءوتتى.
الماتى قالاسى اكىمدىگىنىڭ ۇيىمداستىرۋىمەن وتكەن كەشكە زيالى قاۋىم وكىلدەرى، ادەبيەتشىلەر مەن ونەر مايتالماندارى قاتىستى.
مەرەيتويلىق كونتسەرتتىڭ باستالۋ ءسوزىن الماتى قالاسى مادەنيەت باسقارما باسشىسىنىڭ مىندەتىن اتقارۋشى
وتەلبايۇلى عالىمجان الماتى قالاسىنىڭ اكىمى باۋىرجان بايبەكتىڭ قۇتتىقتاۋ ءسوزىن جەتكىزىۋمەن باستادى.
اقىن ءشومىشباي ساريەۆتىڭ قايىم مۇحامەدحانوۆتىڭ 100 جىلدىق مەرەيتويىنا ارناۋ ولەڭى، قايىم مۇحامەدحانوۆقا ارنالعان «جان اعا» ءانى، قايىم مۇحامەدحانوۆتىڭ «جامبىل» اتتى داستانىنا ءۇزىندى ورىندالدى. كەشتە سونداي-اق، ابايدىڭ ءانى «ايتتىم سالەم، قالامقاس»، شاكارىمنىڭ ءانى «ءان تۋرالى»، حالىق ءانى «احاۋ، سەمەي!»، «جەرىم مەنىڭ» جانە ت.ب. ەل، تۋعان جەرگە ارنالعان اندەر شىرقالدى.
قايىم مۇحامەدحانوۆ (عابدۋلقايىم) (1916-2004) 5 قاڭتاردا شىعىس قازاقستان وبلىسى سەمەي قالاسىندا تۋعان.
قايىم مۇحامەدحانوۆ عالىم، ابايتانۋدى عىلىمي نەگىزدەۋشى، ءارى العاشقى تەكستولوگى، ۇستاز، اقىن، جازۋشى، دراماتۋرگ. شاكارىمتانۋدىڭ نەگىزىن قالاۋشى. قازاق كسر گيمنىنىڭ اۆتورى، كسرو جازۋشىلار وداعىنىڭ مۇشەسى، ادەبي اۋدارماشى، سەمەيدە ابايدىڭ مۇراجايىن ۇيىمداستىرۋشىسى. قازاقستاننىڭ مەملەكەتتىك سىيلىعىنىڭ، جازۋشىلار وداعى سىيلىعىنىڭ، حالىقارالىق «الاش» ادەبي سىيلىعىنىڭ جانە حالىقارالىق اباي اكادەمياسىنىڭ (لوندون) التىن مەدالىنىڭ يەگەرى، پروفەسسور، كسرو جانە قازاقستان حالىق اعارتۋ ءىسىنىڭ ۇزدىگى; سەمەي قالاسىنىڭ، اياگوز، جاڭاسەمەي، اباي اۋداندارىنىڭ قۇرمەتتى ازاماتى; جاريالانعان 800-دەن اسا عىلىمي ەڭبەكتىڭ اۆتورى. «ابايدىڭ اقىن شاكىرتتەرى» اتتى ءتورت كىتاپتان تۇراتىن جيناق قۇراستىردى. «اباي» جۋرنالىنىڭ قايتا جارىق كورۋىنە كوپ ەڭبەك ءسىڭىردى. «تولقىن»، «مايداننان مايدانعا»، «ەر ءبىلىسباي» پەسالارىنىڭ اۆتورى. ءازىربايجان دراماتۋرگى ۋ.گادجيبەكوۆتىڭ «ارشين مول الان»، تاتار جازۋشىسى ش.كامالدىڭ «قاجى اپەندى ۇيلەنەدى» پەسالارىن قازاقشالاعان. 1996 جىلى «اباي» ەنتسيكلوپەدياسىن شىعارۋداعى ەڭبەگى ءۇشىن قر مەملەكەتتىك سىيلىعىنىڭ لاۋرەاتى اتاندى. كسرو جانە قازاق كسر اعارتۋ ءىسىنىڭ ۇزدىگى. سەمەي قالاسىنىڭ قۇرمەتتى ازاماتى. ابايدىڭ دۇنيەجۇزىلىك اكادەمياسىنىڭ التىن مەدالىمەن ماراپاتتالعان.
جۇماباي ءمادىبايۇلى
kerey.kz
پىكىر قالدىرۋ