ساۆچەنكوعا “ۋكراينا قاھارمانى” اتاعى بەرىلدى
25 مامىر كۇنى تۇتقىن ايىرباستاۋ كەلىسىمى بويىنشا رەسەيدە قاماۋدان بوساتىلىپ، كيەۆكە جەتكىزىلگەن نادەجدا ساۆچەنكوعا ۋكراينا پرەزيدەنتى پەتر پوروشەنكو “حالىق قاھارمانى” اتاعىن بەردى.
2014 جىلعى ماۋسىمنان بەرى قاماۋدا وتىرعان اسكەري ۇشقىشتى قارسى الۋ شاراسىندا ءسوز سويلەگەن پوروشەنكو ساۆچەنكونى بوساتۋ ىسىنە ۇلەس قوسقان بارشا حالىققا، حالىقارالىق ۇيىمدار مەن باتىس ەلدەرىنىڭ جەتەكشىلەرىنە العىس ءبىلدىردى. پرەزيدەنت اكىمشىلىگىندەگى كەزدەسۋ كەزىندە ءبىر جىميماعان نادەجدا ساۆچەنكو “حالىقتىڭ تالاپ-تىلەگى بولماسا ساياساتكەرلەردىڭ ءوزىن قۇتقارىپ الۋى نەعايبىل ەدى” دەگەن كۇدىگىن ايتتى. ول قاھارمان اتاعىن قابىل الا تۇرىپ: “ۋكراينا حالقىنا قىزمەت ەتەمىن!” دەدى.
سالتاناتتى شاراعا نادەجدا ساۆچەنكونىڭ وتباسى دا قاتىستى.
ەكى جىل بۇرىن دونباستا رەسەيشىل سەپاراتيستەردىڭ قولىنا ءتۇسىپ، 2015 جىلعى ناۋرىزدا رەسەيدىڭ روستوۆ وبلىسىندا 22 جىلعا سوتتالعان ساۆچەنكوعا “رەسەيلىك ەكى ءجۋرناليستى ءولتىردى” دەگەن ايىپ تاعىلعان. تىكۇشاق پيلوتى كىناسىز ەكەنىن ايتىپ، ء“وز ءىسىنىڭ ساياسي استارى بار” دەپ مالىمدەپ كەلگەن.
ازات ەۋروپا / ازاتتىق راديوسى
پىكىر قالدىرۋ