اقش وكىلى ەۋروپانى رەسەيگە قارسى سانكتسيانى ساقتاۋعا شاقىرماق
ۆاشينگتون بەرلين مەن پاريجگە جۇمساپ وتىرعان اقش-تىڭ ارنايى وكىلى ادام شۋبين «رەسەيگە قاتىستى سانكتسيالىق قىسىمدى قولداۋدىڭ ماڭىزدىلىعىنا» ەۋروپالىق وداقتاستاردى كوندىرۋ ءۇشىن ماۋسىمنىڭ 7-8 كۇندەرى ەۋروپاعا ساپارمەن بارادى. بۇل تۋرالى اقش قارجى مينيسترلىگى حابارلادى.
اقش قارجى ءمينيسترىنىڭ تەرروريزممەن كۇرەس جانە قارجى بارلاۋى جونىندەگى ورىنباسارى مىندەتىن اتقارۋشى ادام شۋبين قارجى جانە ەكونوميكا مينيسترلىكتەرىنىڭ جوعارعى لاۋازىمدى شەنەۋنىكتەرىمەن، سونىمەن بىرگە ديپلوماتتارمەن جانە ەۋروپالىق جەكە مەنشىك بانكتەر مەن قارجى مەكەمەلەرى وكىلدەرىمەن كەزدەسپەكشى.
ماسكەۋ بيلىگى ۋكرايناعا قاتىستى «مينسك كەلىسىمدەرىن ورىندامايىنشا» ەۋروپالىق وداقتاستاردى رەسەيگە قارسى سانكتسيالاردى قولداۋعا شاقىرۋمەن بىرگە شۋبين يرانمەن جاسالعان يادرولىق كەلىسىمنىڭ ورىندالۋى تۋرالى ماسەلەلەردى جانە «يرانعا يەك ارتاتىن تەرروريزمگە جانە وزگە دە ىرىتكى سالاتىن ءىس-ارەكەتكە قارسى كۇرەس بويىنشا كۇش-جىگەردى جالعاستىرۋ» جايىن تالقىلايدى» دەلىنگەن اقش قارجى مينيسترلىگىنىڭ حابارلاماسىندا.
ازات ەۋروپا / ازاتتىق راديوسى
پىكىر قالدىرۋ