قوجاناسىردىڭ قويتاسى
قادىرلى دوستار، اعايىن! تىلەكتەرىڭىزگە كوپ راقمەت! قۇداي ەسىركەپ، كوڭىلدەرىڭىزدى كوتەرسىن! “قىرما ساقال قىرىققا تولعان قالاي ەكەن; قارتايىپ، قايعى ويلاپ جاتىرسىڭ-اۋ؟” دەپ قاجاپ قويادى كەيبىر قۇرداستار، وزدەرىنىڭ دە بىرنەشە اپتا، يا بىرەر ايدان سوڭ وتىزدىڭ سوڭعى جىلىن ۋاقىت دەگەن ۇزىن كۇيەۋگە ۇزاتىپ جىبەرەتىندەرىن ۇمىتقانسىپ:) مەنى مۇسىركەمەك بولادى، بىراق ءوز ۇندەرىندەگى مۇڭ ون سەگىز مىڭ عالامدى كەمسەڭدەتىپ تۇر:) “قىلشىلداعان قامال الار قىرىق قالاي ەكەن؟” دەپ تامسانا سۇرايدى كەيبىر ەلۋ مەن الپىسقا قاراي ەرىكسىز اعىزىپ بارا جاتقان اعالارىم. بۇل كىسىلەردىڭ دە داۋىستارىنداعى ساعىنىشتىڭ جالىنى عارشى-كۇرسىنى كۇيدىرە شارپيدى:)
بارىنە ايتقان جاۋابىم مىناداي بولدى: “مەن ءوزىم تۋمىسىمنان كارى اداممىن:) باياعىدا تۋعان اۋىلىمدا مارقۇم قۇرمانباي دەگەن ءبىر سوزگە شەشەن، قۋشىكەشتەۋ جايساڭ اعامىز جاسىم بەستەن اسىپ، ءسۇت ءتىسىم تۇسە باستاعان ءتۇرىمدى كورگەن سايىن: ء“اي، كارى عالىم، حالىڭىز جاقسى ما؟” دەپ امانداسۋشى ەدى. سودان بەرى ءبىر اتىم “كارى عالىم” بوپ كەتكەن. سول لاقاپ اتىم اسەر ەتتى مە، بىلمەيمىن، بالا كەزدەن قازىرگە دەيىن قاريالارمەن اڭگىمەم كوبىرەك جاراسادى، كوپ دوستارىم وزىمنەن 10-20, ءتىپتى 30 جىل ۇلكەن بولىپ كەلەدى. مۇنداي تۋمىسىنان كارتەمىش ادامعا جيىرما بەسى نە، وتىزى نە، قىرقى نە – ءبارىبىر”
بىردە قوجاناسىردان دوستارى: “اۋ، قوجەكە، پايعامبار جاسىنا تاياپ قالدىڭىز. قايران جيىرما بەستەگى كۇش-قۋاتىڭىزدى اڭسايتىن شىعارسىز؟” دەپ سۇراپتى. “جوق” دەپ ساڭق ەتە قالىپتى قوجەكەڭ، “سول كۇشىم – سول كۇش، سول قايراتىم – سول قايرات!” “اپىرماي، ونى قالاي ءبىلدىڭىز؟” دەپ سۇراپتى جۇرت. “اناۋ ەسىك الدىندا جاتقان ءداۋ قارا تاستى كورىپ تۇرسىڭدار ما؟” دەپتى قوجەكەڭ، “سول قويتاستى جيىرما بەس جاسىمدا كوتەرە المايتىنمىن، ءالى كوتەرە المايمىن. دەمەك، كۇشىم ءبىر مىسقال كەمىگەن جوق!”
قوجەكەڭنىڭ قويتاسى مەن ءۇشىن بالا كەزدەن بەرى ادامنىڭ اڭسارىن اۋدارىپ، قيسىنىن قىتىقتاپ تۇراتىن “كوك اسپاننىڭ ار جاعىندا نە بار؟ شەكسىزدىكتىڭ سىرى نە؟ مىنا قارا جول انا توبەدەن اسقان سوڭ قانداي جولعا اينالادى؟” دەگەن ماڭگى سۇراق. شاكەرىم قاجىنىڭ تىلىمەن ايتقاندا “كەلدىم قايدان؟ نەتسەم پايدام؟ ولگەننەن سوڭ نە بولام؟” دەگەن جۇمباق. بۇل جۇمباقتىڭ شەشۋىنە قىزۋ كىرىسكەن جاندى ۋاقىت دەگەن ۇزىن كۇيەۋدىڭ داۋلەت پەن مانساپ اتتى قالىڭمالى قىزىقتىرمايدى. قيىندىعى مەن قىزىعى، بەينەتى مەن زەينەتى، سىيى مەن سىناعى قاتار جۇرەتىن بۇل جالعاندا “الدىمنان تاعى قانشا جاقسى ادام شىعار ەكەن؟ ءوزىم قايتىپ جاقسى ادام بوپ قالام؟” دەگەن ءۇمىت پەن كۇدىكتىڭ ورتاسىندا ويقۇمار سەرگەك عۇمىر كەشۋ ارقىلى كەز-كەلگەن جان ۋاقىت پەن كەڭىستىكتىڭ شەگىنەن بوساپ، ەركىن ءومىر سۇرمەك. ءبىر قۋاناتىنىم، ينتەرنەت تەحنولوگياسى مەن الەۋمەتتىك جەلى دامىعان داۋىردە ءومىر ءسۇرۋ باقىتى ماڭدايىما جازىلىپ، كۇن سايىن قانشاما ويى ەركىن اداممەن تانىسىپ، دوستاسىپ جاتىرمىن. بارىڭىزگە كوپ راقمەت! بارشاڭىزدىڭ اۋلالارىڭىزدا ءبىر-بىردەن قوجاناسىردىڭ قويتاسى تۇرسىن دەپ تىلەيمىن!
عالىم بوقاشتىڭ facebook پاراقشاسىنان الىندى
پىكىر قالدىرۋ