QOJANASIRDIÑ QOYTASI
Qadirli dostar, ağayın! Tilekteriñizge köp raqmet! Qwday esirkep, köñilderiñizdi kötersin! “Qırma saqal qırıqqa tolğan qalay eken; qartayıp, qayğı oylap jatırsıñ-au?” dep qajap qoyadı keybir qwrdastar, özderiniñ de birneşe apta, ya birer aydan soñ otızdıñ soñğı jılın Uaqıt degen wzın küyeuge wzatıp jiberetinderin wmıtqansıp:) Meni müsirkemek boladı, biraq öz ünderindegi mwñ on segiz mıñ ğalamdı kemseñdetip twr:) “Qılşıldağan qamal alar qırıq qalay eken?” dep tamsana swraydı keybir elu men alpısqa qaray eriksiz ağızıp bara jatqan ağalarım. Bwl kisilerdiñ de dauıstarındağı sağınıştıñ jalını ğarşı-kürsini küydire şarpidı:)
Bärine aytqan jauabım mınaday boldı: “Men özim tumısımnan käri adammın:) Bayağıda tuğan auılımda marqwm Qwrmanbay degen bir sözge şeşen, quşıkeşteu jaysañ ağamız jasım besten asıp, süt tisim tüse bastağan türimdi körgen sayın: “Äy, Käri Ğalım, halıñız jaqsı ma?” dep amandasuşı edi. Sodan beri bir atım “Käri Ğalım” bop ketken. Sol laqap atım äser etti me, bilmeymin, bala kezden qazirge deyin qariyalarmen äñgimem köbirek jarasadı, köp dostarım özimnen 10-20, tipti 30 jıl ülken bolıp keledi. Mwnday tumısınan kärtemiş adamğa jiırma besi ne, otızı ne, qırqı ne – bäribir”
Birde Qojanasırdan dostarı: “Au, Qojeke, payğambar jasına tayap qaldıñız. Qayran jiırma bestegi küş-quatıñızdı añsaytın şığarsız?” dep swraptı. “Joq” dep sañq ete qalıptı Qojekeñ, “Sol küşim – sol küş, sol qayratım – sol qayrat!” “Apırmay, onı qalay bildiñiz?” dep swraptı jwrt. “Anau esik aldında jatqan däu qara tastı körip twrsıñdar ma?” depti Qojekeñ, “Sol qoytastı jiırma bes jasımda kötere almaytınmın, äli kötere almaymın. Demek, küşim bir mısqal kemigen joq!”
Qojekeñniñ qoytası men üşin bala kezden beri adamnıñ añsarın audarıp, qisının qıtıqtap twratın “Kök aspannıñ ar jağında ne bar? Şeksizdiktiñ sırı ne? Mına qara jol ana töbeden asqan soñ qanday jolğa aynaladı?” degen mäñgi swraq. Şäkerim qajınıñ tilimen aytqanda “Keldim qaydan? Netsem paydam? Ölgennen soñ ne bolam?” degen jwmbaq. Bwl jwmbaqtıñ şeşuine qızu kirisken jandı Uaqıt degen wzın küyeudiñ däulet pen mansap attı qalıñmalı qızıqtırmaydı. Qiındığı men qızığı, beyneti men zeyneti, sıyı men sınağı qatar jüretin bwl jalğanda “Aldımnan tağı qanşa jaqsı adam şığar eken? Özim qaytip jaqsı adam bop qalam?” degen ümit pen küdiktiñ ortasında oyqwmar sergek ğwmır keşu arqılı kez-kelgen jan uaqıt pen keñistiktiñ şeginen bosap, erkin ömir sürmek. Bir quanatınım, internet tehnologiyası men äleumettik jeli damığan däuirde ömir süru baqıtı mañdayıma jazılıp, kün sayın qanşama oyı erkin adammen tanısıp, dostasıp jatırmın. Bäriñizge köp raqmet! Barşañızdıñ aulalarıñızda bir-birden Qojanasırdıñ qoytası twrsın dep tileymin!
Ğalım BOQAŞtıñ facebook paraqşasınan alındı
Pikir qaldıru